सभोपदेशक 5

उतावली दा मन्नत ईला मानसोद

1याग नीव परमेश्वर उन मंदिर दा होगतीर आग तान आचरण इन ध्यान ईटी. मूर्ख द्वारा येर्सकु बलि इन अपेक्षा परमेश्वर उन मंदिर दा बरोद, अदिक आऊन वचन केळोद उत्तम आद. यतिकी मूर्ख ईद जानसालुन कि जो क्याल्सा आव माळतान, अद बुरा आद. 2तान बाय दा टु यातोदारा मात जल्दी तेगु बाळी, अदिक उतावली दा तान दिल इन मात परमेश्वर उन मुंद प्रकट माळबाळी, यतिकी परमेश्वर रा स्वर्ग दा आन, अदिक नीव पृथ्वी मा. अत: नीम्द शब्द थ्वाळासा अच ईरूल. 3जसा क्याल्सा अन्द अधीनता अन्द कारण मंळसा कांसा नोळतान, हांग अच हापाळ बकवास देल मूर्ख अन्द मूर्खता प्रकट आगतद. 4याग नीव परमेश्वर उन साटी मन्नत मान्सतार आग अदरी पुरा माळदुर दा देरी माळबाळेतीर, यतिकी परमेश्वर मूर्खगोळ देल प्रसन्न आगालुर. जो मन्नत नीव मान्सतीर अदरी पुरा माळी. 5मन्नत मान्सकु अदरी पुरा ईला माळदुर देल मन्नत इन ईला मानसोद अच वळ्लीद आद. 6नीव तान बाय देल हिंग शब्द तेगुबाळी जो नीम इक पाप दा फसुसुल. स्वर्गदूत उन मुंद ईद अनबाळी कि नान से भूल आगेत. ईलारा परमेश्वर नीम्द आवाज केळकु खुश आगतीदील, अदिक आव मेहनत देल माळ्द नीम्द क्याल्सा अक नष्ट माळ बुट्टान. 7याग मंळसा येक्‍कुल से येक्‍कुल कांसा नोळली कुरतान, आग आऊन व्यर्थ मातगोळ भी वाळुसतद. लेकीन नीव परमेश्वर उन अंज्क मान्सी.

जीवन बेकार आद

8अगर नीव यातोदारा प्रदेश दा गरीबगोळ मा अत्याचार आगतेला नोळीर, अगर नीव अल‍ न्याय अदिक धर्म अन्द कुतक्या घोट्सकु आगतेला नोळीर, रा आश्चर्य माळ बाळेतीर; यतिकी ऊंद अधिकारी इन म्याकुच आऊन से धोळ अधिकारी ईरतान अदिक आऊन से भी म्याकुच उच्च अधिकारी ईरतान. 9केई इन फसल सप्पा मुंदुर साटी आद, लेकीन केई देल राजा अन भी क्याल्सा होट्ट बुळतद.

10पैस्या से प्यार माळावाळा पैस्या से यागलु संतुष्ट ईरालुन; अदिक न हिंग मंळसा, यारी धन से प्यार आद, आऊन येक्‍कुल से येक्कुल लाभ देल संतुष्ट आगतान. ईद भी व्यर्थ आद. 11याग सम्पत्ति वाळुस्तद आग अदरी तिनावाळेर भी वाळुसतार. अत: आऊन स्वामी इक आऊन से येन लाभ? सिर्फ ईद कि आव अदरी केवल कण्ण देल नोळुल! 12मजदूर उन साटी वरदान आद, सय जप, चाहे आव आरधा व्हाट्टा तिनुल चाहे व्हाट्टा तीम. लेकीन धनवान उन धन वाळुसदुर देल आऊन कण्णगोळ से जप हारेगतद. 13ना धरती मा ऊंद दुखद बुराई नोळदिन : धन इन स्वामी तान हानि इन साटी धन जमा माळतान. 14अगर आऊन धन सट्टेबाजी दा हारेगतद, अदिक आऊन मान्ना दा पार जन्म ताकोमतान रा आऊन कय दा येनु मिक्‍कु ईराल्द. 15जसा आव तान मोय इक गर्भ टु पैदा आगीदुन हांग अच नंगा वापस होदान, आव तान कय दा तान मेहनत इन फल वय सकालुन. 16ईद दुखद बुराई आद, जसा आव बंदीदुन ठीक हांगा ईल टु वापस होदान. आऊक तान मेहनत देल येन लाभ आत? 17आव व्यर्थ अच मेहनत माळदुन, आव तान पुरा जीवन उदासी अदिक दुख दा, चिन्ता अदिक रोग दा, सिट्ट दा व्यतीत माळदुन. 18नोळी, जो भला मात ना अनुभव माळदीन, अदिक जो उचित भी आद, अद ईद आद : “मंळसा परमेश्वर द्वारा कोटकु आग्याद तान अल्पकाल इन जीवन दा धरती मा खुशी देल मेहनत माळुल, तिनुल अदिक कुडुल, यतिकी ईदा आऊन भाग हुन.” 19हर ऊंद मंळसा, याऊक परमेश्वर धन-सम्पत्ति कोटुन अदिक आऊक भोगसोद सामर्य्थ भी कोट्टुन, आव तान भाग इक स्वीकार माळुल अदिक खुशी देल मेहनत माळुल. ईद परमेश्वर उन वरदान आद. 20मंळसा तान पुरा जीवन इक हमेशा अन साटी याद ईटतीदील, यतिकी परमेश्वर मंळसा अक आ क्याल्सागोळ दा अच हचकु ईटतान, या क्याल्सागोळी माळदुर दा आ मंळसा रुची ईटतान.