सभोपदेशक 3

सप्पा क्याल्सागोळ्द समय निश्चित आद

1हर ऊंद मात इन उपयुक्त मौका, अदिक धरती मा माळोद क्याल्सा अन्द निर्धारित समय ईरतद: 2जन्म इन समय; अदिक सायोद भी समय, बोऊसोद समय; अदिक बोऊसकु आग्याद अदरी कित्तोद भी समय आद. 3कोन्नोद समय, अदिक चंगा माळोद समय, ढाऊसोद समय अदिक माळोद भी समय निर्धारित आद. 4वर्लोद समय, अदिक नेग्गोद समय, शोक मानसोद समय, अदिक कुण्णोद भी समय आद. 5कल्लगोळ इक बगरूसोद समय, अदिक कल्लगोळ इक जमा माळोद समय, कुतक्या अक हचोद समय अदिक कुतक्या टु दुर ईरोद भी समय ईरतद. 6ढुंढसोद समय, अदिक काळोद भी समय, ईटोद समय, अदिक भीळोद भी समय निर्धारित आद. 7हरोद समय, अदिक अइक होलोद भी समय, सुंगा ईरोद समय, अदिक माताळोद भी समय निश्चित आद. 8प्यार माळोद समय, अदिक घृणा माळोद भी समय, युद्ध माळोद समय, अदिक शांती माळकु ईटोद भी समय आद. 9क्याल्सा माळावाळा अक ताक मेहनत देल येन लाभ आगतद? 10ना नोळदीन कि परमेश्वर मंळसा जाती मा याट भारी बोझ हाक्यान. 11आव हर ऊंद वस्तु अक आऊन साटी सही समय मा अच माळदुन, आव मंळसा अन मन दा अनन्तकाल इन एहसास इक जाग्सदुन, तरी भी मंळसा सम्स सकालुन कि परमेश्वर सुरूवात टु आखरी ताका येन माळदुन. 12अत: नान इक ईद अनुभव आत कि मंळसा अन्द साटी इदुर से वळ्लीद अदिक यातु मात हैलेच कि आव जीवन-तीम सुख देल अदिक खुशी मान्सतेला ईरूल. 13ईद परमेश्वर उन वरदान आद कि हर ऊंद मंळसा व्‍हाट्टतीम तिनुल-कुडुल अदिक खुशी देल मेहनत माळुल. 14ना ईद जान्सतीन कि जो येनारा परमेश्वर माळतान, अद हमेशा बन्सकु ईत्तीत; अदुर्दा येनु जोळ्सकु आग सकाल्द अदिक येनु गोर्त माळकु आग सकाल्द. परमेश्वर ईद इदुरसाटी माळदुन ताकी मंळसा आऊन से अंजुल. 15जो आद, अद आगेग्याद, अदिक जो आगावाळा आद, अद भी आगेग्याद. परमेश्वर आऊक ढुंढ्सतान, जो खेदाळ्सकु आग्यान.

संसार दा अन्याय

16ना सूर्य अन ल्यालमा धरती मा ईद भी नोळदीन: न्याय इन जागा मा अन्याय आगेत्याद, धार्मिकता अन जागा मा अधर्म आगेत्याद. 17ना तान दिल दा अंदीन, “परमेश्वर हर ऊंद मात अदिक हर ऊंद क्याल्सा अन्द समय निश्चित माळकु ईट्यान; अत: आव धार्मिक मंळसा अदिक दुष्ट येढ्ढु मुंदुर्द न्याय माळ्यान.” 18ना मंळसा अन्द औलाद इन बारा दा ईद सोचदीन : परमेश्वर आंदरी ईद सच्चाई कलसोर साटी परखुसेत्यान कि आंदुर जनावर उन अलावा येनु हैलेच. 19मंळसा अदिक पशु ऊंद अच दशा अक प्राप्त आगतार. ह्यांग पशु सायतद हांग अच मंळसा भी. अऊर सप्पा मुंदुर दा ऊंद अच घाई जीव आद. मंळसा पशु से श्रेष्ट हैलेच. अत: सप्पा व्यर्थ आद. 20सप्पा आखरी दा ऊंद अच जागा दा होगतार. सप्पा मुण्ण देल बनस्कु आर, अदिक मुण्ण दा अच मिलुसेदार. 21याव अन सकतान कि मंळसा अन्द जीव म्याकुच होगतद अदिक जनावर इन जीव ल्यालमा दी होगकु मुण्ण दा मिलुसेगतद? 22अत: नानी मालुम आत कि मंळसा अन्द साटी इदुर से येक्‍कुल वळ्लीद मात अदिक यातोदु हैलेच कि आव खुशी देल तान क्याल्सा माळुल, यतिकी क्याल्सा माळोद अच आऊन नियति आद. याव मंळसा यातोवारा मंळसा अन्द सायोद बाद्दा आऊक वापस तंदकु भविष्य अन्द मातगोळ तोर्स सकतान?