परमेश्वर उन वचन
सभोपदेशक 10
सोतकु नॉणगोळ सुगंधित याण्णा अक दुर्गंध दा बदलुस बुळताव, ईदा प्रकार थ्वाळासा मूर्खता बुद्धि अदिक मान-सम्मान मा नीर फेर्सबुळताव. बुद्धिमान उन दिल आऊक उचित हादी इन दी माळतद, लेकीन मूर्ख उन मन बुराई इन दी आऊक प्रेरित माळतद. “याग मूर्ख हादी मा नळुतान आग भी आऊन दा समझ इन कमी ईरतद. अदिक आंदुर सप्पा मुंदरी तोर्सतान कि, आव याट मूर्ख आन.” अगर शासक नीन से नाराज आन रा नीव तान जागा बिळ बाळी. यतिकी धैर्य गंभीर अपराध भी सुधार्स कोमतान. ना धरती मा ऊंद बुराई नोळदीन. ई बुराई इन जिम्मेदार शासक आन. मूर्ख ऊंचा जागागोळ मा कुर्सकु आगतार, अदिक धनी ल्यालमा अन जागागोळ दा. ना गुलामगोळ इक घ्वाळागोळ मा होगतेला नोळदीन, जब कि शासक गुलामगोळ घाई पैदल नळोर. जो दुसरा मंळसा अन्द साटी खॉदरा अगुळतान, आव खुद अदुर्दा बिद्दान. जो चोरी इन साटी दीवार वोडुतान, आऊक हाव कच्चीत. जो सीमा अन्द दिवार इन कल्लगोळ इक सरकुसतान, आऊक कल्लगोळ देल चोट हत्तीत. जो सीमा अन्द हुल्लीगोळ इक कळदान, आऊक अऊर से खतरा ईत्तीत. अगर कोळ्ली बोथळ ईरूल, अदिक मंळसा अदुर्द धार पैना माळबाळुल, रा आऊक उपयोग माळदुर दा येक्कुल ताकत हचोद बिद्दीत. लेकीन बुद्धि सफलता अन्द कुंजी आद. अगर मंत्र से पयला हाव कच्चबुळुल, रा मंत्र फुकसावाळा से येन लाभ? बुद्धिमान मंळसा अन्द बाय इन शब्द आऊन साटी दुसरा अन्द कृपा अन्द साधन आद. लेकीन मूर्ख मंळसा अन्द टुट्टी आऊन विनाश इन कारण आद. मूर्ख उन बाय देल होळ्त शब्द शुरू टु आखरी ताका मूर्खता देल पुरा आगताव: आऊन मात इन अन्त दुष्टतापुर्ण पागलपन आगतद. मूर्ख मंळसा ऊंद मात इन येढ्ढ मातगोळ माळतान, इदुरसाटी याऊ जानसालुन कि भविष्य दा येन आगोद आद; अदरी याव हेळ सकतान कि आऊन बाद्दा येन आदीत. मूर्ख अन्द मेहनत आऊक थक्सतद, ईट कि आऊक वापसी इन साटी शहर इन हादी भी समसाल्द. हे द्याश! धिक्कार आद नीनी, अगर नीन राजा अनुभव-हीन सेवक आन; अदिक अगर नीन सामन्त प्रांत: टु अच तिनोर-कुडोद दा जुटुस्तार. हे द्याश, धन्य आय नी, अगर नीन राजा कुलीन वंशज आन, अदिक अगर नीन सामन्त निर्धारित समय मा तिनतार-कुडुतार, ताकत प्राप्त माळोर साटी, न कि मतवालापन इन साटी. आलस इन कारण छत बिदोगतद, सुस्ती देल मान्ना चुनुसली हततद. भोज आनंद इन साटी माळकु आगतद, अंगुर इन रास्सा कुडदुर देल जीवन आनन्दित आगतद. रूपये देल सप्पा येनारा प्राप्त आग सकतद. तान मन दा भी राजा अक अपशब्द अनबाळी, अदिक न तान शयन कक्ष दा धनवान उक बुरा शब्द अनबाळी. आकाश इन पक्षी नीन शब्द ओतान, उळुसावाळा जीव-जन्तु खबर माळ बुट्टीत.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.