दानिय्येल 2

दानिएल राजा नबूकदनेस्सर उन कांसा अन्द मतलब हेळतान

1राजा नबूकदनेस्सर उन राज्‍य अन्द दूसरा वर्ष ईरोद. आव हिंग कांसा अदिक दृश्य नोळदुन अदुर कारण आऊन मन व्याकुल आगेत अदिक आऊन कण्णगोळ दा टु जप हारेत.

2राजा आदेश कोट्टुन कि भविष्य नोळावाळा, तांत्रिक, जादू-टोना माळावाळेर अदिक कसदी पंडित कारूकु आगुल ताकी आंदुर राजा अक आऊन कांसा हेळुल. अत: आंदुर बंदुर अदिक राजा अन्द मुंद नीदरेदुर. 3राजा आंदुर से अंदुन, “ना ऊंद कांसा अदिक दृश्य नोळदीन अदुर कारण नान मन अशांत आद. ना कांसा अदिक अऊर मतलब जानसोद चाहसतीन.”

4कसदी पंडितगोळ अरामी भाषा दा राजा से निवेदन माळदुर, महाराज सदा चिरंजीवी ईरूल! नी नामी तान कांसा हेळ, अदिक नाव नीन इक अदुर मतलब समझुस बुट्टेव. 5राजा कसदी पंडितगोळ इक उत्तर कोट्टुन, “नान वचन अटल आद! अगर नीव नान कांसा अदिक अदुर मतलब नान इक हेळतीदील, रा नीव निश्‍चय जान्सी कि नीम्द मय इन तुकळा-तुकळा माळकु आदीर, अदिक नीम्द मान्ना खंडर माळकु आदव. 6लेकीन अगर नीव अर्थ-सहित नान कांसा नान इक हेळ बुट्टीर रा ना नीम इक पुरस्‍कारगोळ-उपहारगोळ देल लाद्स बुळाईन, अदिक नीम्द बड़ा सम्‍मान माळाईन. अच्‍छा, ईग नान इक नान कांसा अदिक अदुर मतलब हेळी.”

7आंदुर राजा से दूसरा घन निवेदन माळदुर, “महाराज, तान सेवकगोळ इक तान कांसा हेळ अदिक नाव, नीनोर सेवक, महाराज उक अदुर मतलब समझुस बुट्टेव.” 8राजा उत्तर कोट्टुन, “ना निश्‍चयपूर्वक जान्सतीन कि नीव ईव मातगोळ केवल समय कडोर साटी अनेतीर; यतिकी नीव जान्सतीर कि नान ईद वचन अटल आद. 9कि अगर नीव नान कांसा नान इक हेळतीदील, रा नीम साटी प्राणदण्‍ड निश्‍चित आद. नीव आपस दा ई मात दा ऊंदमत आगेदीर कि आ समय ताका नीव नान से ख्वाटा मात माताळी, नान इक ख्वाटा उत्तर कोळी यागासताका नान ध्‍यान न भटकुसुल. इदुरसाटी ईग तुरन्‍त नान इक नान कांसा हेळी यदुर देल नान इक मालूम आगेगुल कि नीव नान इक अदुर्द मतलब भी हेळ सकीर.”

10कसदी पंडितगोळ राजा अक उत्तर कोट्टुर, महाराज, “संसार दा हिंग याऊ मंळसा हैलेच जो नीन मात इक पुरा माळ सकुल. यावारा भी महान अदिक हाकिम ज्‍योतिषिगोळ, तांत्रिकगोळ, अदिक कसदी पंडितगोळ से यागलु हिंग मात केळीदील. 11जो मात राजा नाम से केळेत्यान, अद कठिन आद, अदिक केवल द्यावगोळ अच राजा अक आऊन कांसा हेळ सकतान. लेकीन द्यावगोळ रा मंळसागोळ्द न्याड्या ईरालव.”

12ईद मात केळकु राजा नाराज आगेदुन. आऊन गुस्सा भळकुस्त. आव राजा आग्या कोट्टुन कि बेबीलोन द्याश इन पुरा दरबारी विद्वान-ज्‍योतिषी, तांत्रिक, जादू-टोना माळावाळेर अदिक कसदी पंडित-मौत इन घाट ईळकु आदार. 13ईद राज आग्या पुरा द्याश दा प्रसारित माळकु आत कि दरबार इन सप्पा विद्वानगोळ्द वध माळकु आदीत. राजा अन्द अंगरक्षक दानिएल अदिक आऊन संगीगोळ्द वध माळोर साटी आंदरी ढूंडसोर.

परमेश्वर उन द्वारा दानिएल मा अर्थ प्रकट माळोद

14आग दानिएल राजा अन्द अंगरक्षकगोळ्द प्रधान अर्योक से सोच-सम्सकु, बुद्धिमानी देल मातगोळ माळदुन. अर्योक बेबीलोन द्याश इन पुरा दरबारी विद्वानगोळ्द वध माळली होटीदुन.

15दानिएल प्रधान अर्योक से केळदुन, महाराज ईट कठिन राज आग्या यती प्रसारित माळदुन? आग अर्योक दानिएल उक कारण हेळदुन. 16अत: दानिएल राजमहल दा होदुन, अदिक आव राजा नबूकदनेस्सर से निवेदन माळदुन, “राजा, नीव नान साटी यातोदारा समय निश्‍चित माळबुळी; यतिकी ना ई निश्‍चित समय मा महाराज उन कांसा अदिक अदुर्द मतलब हेळ बुळाईन.”

17अदुर बाद्दा दानिएल तान मान्नी होदुन, अदिक अल आव तान संगीगोळ हनन्याह, मीशाएल अदिक अजर्याह अक ईद मात हेळदुन, 18अदिक आव आंदुर से अंदुन कि आंदुर ई रहस्‍य अन्द संबंध दा स्‍वर्गिक परमेश्‍वर से प्रार्थना माळकु आऊन दया प्राप्‍त माळुल ताकी बेबीलोन इन सप्पा दरबारी विद्वानगोळ सांगुळ दानिएल अदिक आऊन संगीगोळी भी नष्‍ट माळकु आग बाळुल. 19अदिक ईळ्लक इन समय दर्शन इन माध्‍यम देल दानिएल मा रहस्‍य प्रकट माळकु आत. दानिएल टु स्‍वर्गिक परमेश्‍वर उक धन्‍यवाद कोट्टुर. 20आव अंदुन:

परमेश्‍वर उन हेसुर युग-युगांत धन्‍य आद,

बुद्धि अदिक पराक्रम आऊंदा हुन.

21परमेश्‍वर अच काल इन नियंता अदिक

ऋतुगोळ्द परिवर्तनकर्त्ता आन.

आवा राजागोळ इक सिंहासन मा कुर्सतान,

अदिक आवा आंदरी पदच्‍युत माळतान.

परमेश्‍वर अच बुद्धिमान उक बुद्धि अदिक

समझदार उक समझ कोळतान.

22परमेश्‍वर अच रहस्‍यमय भेदगोळ इक प्रकट माळतान;

आव अंधकार दा होचकु भेद इक जान्सतान;

आऊन सांगुळ ज्योति इन निवास आद.

23“हे परमेश्‍वर, नान पूर्वजगोळ्द परमेश्‍वर,

ना नीन इक धन्‍यवाद कोळतीन, अदिक नीन स्‍तुति माळतीन.

नी इच नान इक बुद्धि अदिक बल प्रदान माळ्द;

अदिक ईग नी आ रहस्‍य अक नाम मा प्रकट

माळ्द, जो नाव नीन से बेळदेव;

नी नामी राजा अन्द कांसा हेळ बुट्ट.”

राजा अक कांसा अदिक अदुर्द अर्थ अन्द हेळोद आगोद

24दानिएल अर्योक उन हात्ती होदुन, यारी राजा बेबीलोन इन दरबारी विद्वानगोळ्द वध माळोर साटी नियुक्‍त माळीदुन. दानिएल आऊन निवेदन माळदुन, “नीव बेबीलोन इन दरबारी विद्वानगोळ्द हत्‍या माळबाळी. कृपया, नीव नान इक राजमहल दा महाराज उन हात्ती ओई. ना महाराज उक आऊन कांसा अदिक अदुर मतलब हेळाईन.”

25अत: अर्योक दानिएल उक बिना देरी माळ्त राजा अन्द महल दा ओतुन. आव राजा से हिंग अंदुन, महाराज, “नान इक यहूदा प्रदेश इन प्रवासिगोळ दा ईव मंळसा सिकदुन, जो नीम्द कांसा अदिक अदुर्द मतलब नीम इक हेळ सकतान.” 26दानिएल, आऊन हेसुर बेलतशस्‍सर ईरोद, राजा नबूकदनेस्सर केळदुन, येन नीन दा ईट सामर्थ्य आद कि नी नान नोळ्द कांसा अक अदिक अदुर्द मतलब नान इक हेळ सक्या?

27दानिएल राजा अक उत्तर कोट्टुन, महाराज, जो रहस्‍य इन मात नी केळ्द, अदरी न पंडित, न तांत्रिक, न ज्‍योतिषी अदिक न जादू-टोना माळावाळा हेळ सकतान, ईद यातोदु मंळसा से ईद संभव हैलेच. 28लेकीन स्‍वर्ग दा विराजमान परमेश्‍वर सप्पा रहस्‍यगोळ मा टु परदा हटुस्तान. आवा राजा अक भविष्‍य दा घटुसोद घटनागोळ्द दर्शन कांसा दा माळसुसदुन. नीम कांसा अदिक नीम मन दा अंकित नजारा जो नीव पलंग मा मींगा समय नोळदीर, अव ईव हु: 29महाराज, याग नीव पलंग मा मिंगकु ईरीर आग नीम्द मन दा ईद विचार बत कि भविष्‍य दा येन आदीत. आग सप्पा रहस्‍यगोळ मा परदा हटुसावाळा परमेश्‍वर भविष्‍य दा घटुसावाळा मातगोळ्द नजारा नीम इक तोर्सदुन. 30नान मा ईद रहस्‍य इदुरसाटी प्रकट माळकु आगीदील कि ना अन्य सप्पा जीत्ता मंळसागोळ से यक्कुल बुद्धिमान आईन. ईला, बल्‍कि परमेश्‍वर ईद रहस्‍य नान मा इदुरसाटी प्रकट माळदुन कि ना महाराज उक इदुर्द मतलब हेळ सकाईन अदिक नीव तान मन इन विचारगोळ इक सम्स सकी.

31महाराज, नीव नजर म्याकुच माळदीर रा नीव तान मुंद ऊंद धोळ्द मूर्ति नोळदीर. ईद मूर्ति हापाळ ऊंचा ईरोद अदिक हापाळ चमकुसतेला ईरोद. अदुर्द रूप भयानक ईरोद. 32ई मूर्ति इन ताल्ला शुद्ध व्हान्ना अन्द ईरोद. अदुर्द याद्दा अदिक भुजागोळ चांदी इन ईरव. अदुर्द व्हाट्टा अदिक जांघगोळ पीतल इन ईरव. 33अदुर्द टांगगोळ लोहा अन्द, अदिक काल इन येनारा भाग लोहा अन्द अदिक येनारा भाग मुण्ण इन ईरोद.

34महाराज, याग नीव मूर्ति इक नोळ्या आग अचानक कल्ल इन ऊंद तुकळा तान-ताना कित्तेत, अदिक मूर्ति इन लोहा अदिक मुण्ण इन माळ्द कालगोळ मा बित्त, अदिक अदरी चकनाचुर माळ बुळ्त. 35अदुर बाद्दा लोहा, मुण्ण, पीतल, बेळ्ली अदिक व्हान्ना भी ऊंद सांगुळ चूर-चूर आगेत, अदिक अव ब्यासक्या अन दिन दा खर्यान इन भूसा अन्द घाई कण-कण आगेत. हवा अदरी हार्सबुळ्त, अदिक अव गायब आगेदव, अऊर चिन्ह भी मिक्कु ईतीदील.

लेकीन जो कल्ल मूर्ति इन कालगोळ मा प्रहार माळीत, अद ऊंद धोळ्द पर्वत इन रूप बदलुसेत, अदिक पुरा पृथ्‍वी मा फैलुसेत.

36राजा अन कांसा ईदा हुन. ईग नाव महाराज उक इदुर्द मतलब हेळेव.

37राजा, राजागोळोव महाराजा, नीमी स्‍वर्ग दा विराजमान परमेश्‍वर ईद राज्‍य, पराक्रम, सामर्थ्य अदिक महिमा प्रदान माळदुन. 38परमेश्‍वर नीम कयगोळ दा पृथ्‍वी इन पुरा मंळसागोळ, आळी दाकळव पशु अदिक आकाश इन पक्षी सौपस्यान. परमेश्‍वर अच नीमी अऊर मा शासन माळोद सामर्थ्य कोटान. नीव अच मूर्ति इन व्हान्ना अन्द ताल्ला हुन. 39नीम बाद्दा ऊंद दूसरा राज्‍य इन उदय आदीत. अद नीम से कम वैभवशाली राज्‍य ईत्तीत. अदुर बाद्दा तिसरा पीतल इन राज्‍य उदय आदीत जो पुरा पृथ्‍वी मा शासन माळीत. 40आग चौथा राज्‍य अन्द उदय आदीत जो लोहा अन्द घाई मजबूत ईत्तीत. जसा लोहा सप्पा वस्‍तुगोळ इक तुकळा-तुकळा माळ बुळतद, अवरी चूर-चूर माळ बुळतद, हांग अच ईद राज्‍य ई सप्पा अक चूर-चूर अदिक तुकळा-तुकळा माळ बुट्टीत.

41जसा कि नीव मूर्ति इन कालगोळ इक अदिक बेळ्लगोळ इक नोळदुन कि अव येनारा कुम्हार उन मुण्ण इन अदिक येनारा लोहा अन्द माळकु ईरोद, अदा प्रकार ईद चौथा राज्‍य अलग-अलग वाटस्कु ईत्तीत. जसा नीव नोळदीर कि लोहा दा लसदार मुण्ण मिलुस्कु ईरोद, हांग अच अदुर्दा भी लोहा अन्द घाई मजबूती ईत्तीत. 42या तरीका देल कालगोळ बेळ्लगोळ येनारा लोहा अन्द अदिक येनारा मुण्ण इन ईरव, हांग अच अद राज्य येनारा मजबूत अदिक येनारा कमजोर ईत्तीत. 43जसा कि नीव नोळदीर कि लोहा लसदार मुण्ण इन सांगुळ मिलुस्कु ईरोद, हांग अच ई राज्‍य इन लॉकुर आपस दा वैवाहिक सम्‍बन्‍धगोळ द्वारा आपस दा मिलुस-जुलुस्कु रा ईत्तार; लेकीन या तरिका देल लोहा अदिक मुण्ण दा ऊंद मेल आगाल्द, हांग अच ई राज्‍य इन लॉकुर आपस दा मिलुस-घुलुस्कु ईरतीदील. 44आ राजागोळ्द राज्‍य-काल दा स्‍वर्ग दा विराजमान परमेश्‍वर ऊंद हिंग राज्‍य उदय माळ्यान जो अनंत काल ताका नष्‍ट आगाल्द अदिक न आऊन राज्‍य-सत्ता यातोवारा दूसरा कौम इन कय दा सौप्सकु आदीत. ईद राज्‍य सप्पा राज्‍यगोळ्द अंत माळ बुट्टीत, अवरी मिटुस बुट्टीत; पर अद खुद सदा-सर्वदा सुदृढ़ बनस्कु ईत्तीत. 45जसा नीव नोळदीर कि ऊंद कल्ल यावारा अन्द कय इन बिना अगुळ्द पहाड दा टु कित्तेत, अदिक अद कल्ल लोहा, पीतल, मुण्ण, बेळ्ली अदिक व्हान्ना अक चूर-चूर माळ बुळ्त. ईदा रीती देल महान परमेश्‍वर राजा अक हेळदुन कि इदुर बाद्दा भविष्‍य दा येन येन आगावाळा आद. नीम्द कांसा खरा अदिक अदुर्द मतलब भी निश्‍चित आद.

राजा द्वारा दानिएल उन सम्मान

46ईद केळकु राजा नबूकदनेस्सर बांगकु प्रणाम माळदुन दानिएल उन प्रति सम्‍मान प्रकट माळदुन अदिक आव आदेश कोट्टुन कि दानिएल उक भेंट येर्सी अदिक आऊन मुंद सुगंधित धूप येर्सकु आगुल. 47राजा दानिएल से अंदुन, “बिना संकोच नीम्द परमेश्‍वर अच सप्पा द्यावगोळ ईश्‍वर अदिक राजागोळ स्‍वामी आन, आवा सप्पा रहस्‍यगोळ्द भेद खोलसावाळा आन. केवल नी इच नान रहस्‍य मा टु परदा नेग्द.”

48राजा दानिएल उक तान दरबार दा ऊंचा पद मा नियुक्‍त माळदुन अदिक आऊक हापाळ किमती उपहार कोट्टुन. आव दानिएल उक बेबीलोन द्याश इन पुरा क्षेत्र मा शासक नियुक्‍त माळ बुट्टुन अदिक आऊक बेबीलोन इन दरबारी विद्वान-मंडली इन अध्‍यक्ष माळ बुट्टुन. 49दानिएल उन निवेदन मा राजा शद्रक, मेशक अदिक अबेदनगो उक बेबीलोन द्याश इन शासन-कार्यगोळ्द व्यवस्था माळोर साटी नियुक्‍त माळदुन. लेकीन खुद दानिएल राजा अन दरबार दा अच ईरतोगोन.