दानिय्येल 12

आखरी इन समय

1“आ समय महा स्‍वर्गदूत मीखाएल, जो नीन लॉकुर्द रक्षक-दूत आन, रक्षा अन्द साटी बंदान. अद संकट इन समय ईत्तीत. राष्ट्र इन उत्‍पत्ति टु हुळकु ईग ताका हिंग संकट यागलु आगीदील. लेकीन ईदा संकट-काल दा नीन लॉकुर्द उद्धार भी माळकु आदीत. या लॉकुर्द हेसुर परमेश्वर उन किताब दा लिख्‍सकु आव, आंदुर मुक्‍त माळकु आदार.1 2भूमी इन ल्‍यालमा कबर दा मिंगकु आर, आंदुर दा टु हापाळ येद्दार: थ्वाळासा मुंदुर इक शाश्‍वत जीवन प्राप्‍त आदीत, थ्वाळासा अक अपमान अदिक स्‍थायी घृणा अन्द पात्र बनसोद बिद्दीत.2 3जो ग्यानी लॉकुर आर, आंदुर आकाश इन ज्योति इन घाई चमकुस्यार, अदिक जो हापाळ मुंदरी धर्म इन हादी दी ओयतार आंदुर तारा अन घाई हमेशा चमकुस्तेला ईत्तार. 4दानिएल, नी ई ग्रंथ मा मुहर हच, अदिक युगांत ताका अन्द साटी ई मातगोळ इक सुरक्षित ईट. हापाळ लॉकुर केळोर साटी ईल-अल भाग-दौड़ माळ्यार, अदिक तान ग्यान इन वृद्धि माळ्यार.”3

5याग ना दानिएल म्याकुच नोळदीन, रा नान इक येढ्ढ मंळसा कांळ्सदुर. ऊंद मंळसा गांगा अन ईप्पाटी नीदुरकु ईरोन अदिक दूसरा मंळसा गांगा अन आप्पाटी. 6ना गांगा अन नीर इन म्याकुच नीदुरकु अदिक सन इन कपळा हाक्कु मंळसा से केळदीन, “ई आश्चर्यपुर्ण क्याल्सागोळ्द घटित आगदुर दा याट समय मिक्कु आद?” 7आव तान ऊम्मा अदिक डाक्या कय स्वर्ग दी नेगदुन, अदिक ना आऊक शाश्‍वत अदिक जीत्ता परमेश्‍वर उन किर्‍या ताकोमतेला केळदीन: “साढ़े मुर वर्ष ताका ईद दशा ईत्तीत. याग पवित्र लॉकुर्द ताकत मुरूत-मूरूत खतम आगेदीत, आग ईव मातगोळ पुरा आदव.” 8ना आऊन ई मात केळदीन लेकीन ना सम्स सकीदील. अत: ना आऊन से मात केळदीन, “नान स्वामी, ई मातगोळ्द आखरी परिणाम येन आदीत?” 9लेकीन आव उत्तर कोट्टुन, “दानिएल, ईग होग! ई मातगोळ आखरी समय इन साटी मुहर-हचकु आगेत. 10ई अवधि दा हापाळ विश्‍वासी जन खुद इक निर्मल अदिक शुद्ध माळ कोंडेव, लेकीन दुर्जन दुष्‍कर्म अच माळतेला ईत्तार, अदिक याऊ भी दुष्‍कर्मी ई मातगोळ इक सम्स सकालुन. पर जो समझदार आन, आंदुर अच इदरी समस्यार.4 11या दिशी पवित्र मंदिर दा रोज इन अग्‍नि-बलि येरसोद बंद माळकु आदीत अदिक घृणित वस्‍तु आ जागा मा स्थापित माळकु आदीत, जो विनाश इन कारण ईत्तीत, आ दिन टु हन्नेळ सौ नब्‍बे दिन बितुस्याव.5 12धन्‍य आन आव मंळसा जो धीरज इन सांगुळ ऊंद हजार मुर सौ पैतीस दिन पुरा माळ्यान. 13दानिएल ईग नी होगकु तान जीवन इन आखरी-समय ताका तान हादी मा नळुतेला ईत्तान अदिक नीन इक आराम प्राप्‍त आदीत. आखरी दा नीन इक नीन ठहरूस्कु हिस्सा सिक्कीत.”