परमेश्वर उन वचन
दानिय्येल 10
दानिएल उक गांगा अन किनारा मा सिक्त दर्शन
फारस द्याश इन सम्राट कुस्रू उन राज्य-काल इन तिसरा वर्ष दा दानिएल उक जो बेलतशस्सर भी अनतार, परमेश्वर उन दी टु ऊंद वाक्य केळ्सकु आत, अदिक ईद वाक्य खरा ईरोद, अदिक वाक्य अन्द संबंध ऊंद धोळ युद्ध से ईरोद. दानिएल वाक्य इन मतलब सम्स कोंडुन. आऊन दा दर्शन इक सम्सोद सामर्थ्य ईरोद.
आ दिनगोळ दा, ना-दानिएल मुर हप्ता ताका आत्म-शुद्धि इन साटी शोक माळतेला ईत्तीन. पुरा मुर हप्ता ताका ना राजसी भोजन माळीदिल. अदिक ना रा मॉदरा भी तिंदीदील अदिक दाखमधु भी बाय दा हाक्कीदील. ना मुर हप्ता ताका मय मा याण्णा अन्द मालिश भी माळीदील.
पयला तिंगुळ इन चौबीसवा दिन ना हिद्देकेल हेसुर इन किनारा मा नीदुरकु ईरीन. अचानक ना तान कण्ण म्याकुच नेगदीन रा ना नोळदीन कि ऊंद गंळ्स नीदुरकु आन. आव सन इन कपळा हाक्कु आन. आऊन नेळु दा ऊफाज द्याश इन व्हान्ना अन्द पट्टा कटकु आद.1 आऊन मय फिरोजा कल्ल इन घाई चमकुसोद. आऊन रूप विद्युत उन चमक इन घाई आद. आऊन कण्णगोळ ज्वाला होततद आ मशालगोळ घाई आद. आऊन भुजागोळ अदिक काल चमकुस्तेला पीतल इन घाई आव. आऊन शब्दगोळ्द आवाज भीड़ इन आवाज इन घाई भारी आद.
नान सांगुळ थ्वाळासा मंळसा ईरोर. आंदरी ईद दर्शन कांळ्सकु बिदिदील. ईद दर्शन केवल ना-दानिएल नोळदीन. लेकीन आंदुर नळ्गली कुरतुर, अदिक होचकोमोर साटी ओळदुर. ना आबना ईतोदुन, अदिक ना ईद महादर्शन नोळदीन. लेकीन दर्शन नोळदुर बाद्दा नान दा शक्ति ऊळदीदील. नान दनकुस्तेला मार्र अंज्क देल वंळ्गेत, अदिक ना निर्बल आगेदीन.
आग ना आऊन शब्दगोळ्द आवाज केळदीन. ना आवाज केळतेला अच अचेतन आगेदीन, अदिक भूमी मा बाय इन भार देल बिदोदिन. लेकीन यावारा कय नान मा स्पर्श माळदुन, अदिक नान इक कयगोळ अदिक ट्वांगरा अन्द बल मा कुर्सदुन. नान कय अदिक ट्वांगरा नळगव.
आव नान से अंदुन, “हे दानिएल, परमेश्वर उन परमप्रिय गंळ्स! जो शब्द ना नीन से अनली होगेतीन, अवरी ध्यान देल केळ, अदिक सीधा नीदुर; यतिकी ना नीन इक सन्देश केळसोर साटी नीन हात्ती कळुकु आगीन.” आव नान से ईद शब्द अनतेला अच ईरोन कि ना नळ्गतेला निदुरदीन.
आव नान से अंदुन, “दानिएल, अंजबाळ, यतिकी नी दर्शन इन मतलब सम्सोद मजबूत निश्चय माळ्द, अदिक खुद इक परमेश्वर उन मुंद विनम्र माळ्द. आ दिन अच नीन प्रार्थना अन्द शब्द परमेश्वर केळदुन. ना नीन प्रार्थना अन्द कारण अच ईल बंदीन.
“फारस द्याश उन स्वर्गदूत नान इक इक्कीस दिन ताका संघर्ष दा उलझुस्कु ईत्तीन, अदिक ना बर सकीदील. आग मीखाएल, जो ऊंद मुख्य स्वर्गदूत आन, नान मदत इन साटी बंदुन. इदुरसाटी ना फारस इन राजागोळ हात्ती ईत्तीन,2 ताकी नीन इक अव मातगोळ समझुसाईन जो आखरी इन दिनगोळ दा नीन लॉकुर सांगुळ येन दशा घटुसीत. जो दर्शन नी नोळ्द अद आगामी येनारा दिनगोळ बाद्दा पुरा आदव.”
याग आव नान से ईव मातगोळ अंद बुटीदुन, आग ना भूमी इन दी ताल्ला बांग्स कोंडीदीन अदिक सुंगा ईतोदीन. आग आव, जो मंळसा अन्द पार उन घाई कांळसोन, नान टुट्टीगोळ इक मुटदुन. आग ना तान बाय खोल्सदीन अदिक ईद अंदीन, “हे नान स्वामी, ई दर्शन इन कारण ना दुख नेगदीन. नान दा ताकत मिक्कु ईतीदील. नान स्वामी इन ईव सेवक तान स्वामी से मातगोळ माळोद साहस ह्यांग जुटुस सकतान? स्वामी, नान मय दा ताकत अदिक जीव हैलेच.”
आग आव, जो मंळसा अन्द पार उन घाई कांळ्सतोगोन, मात नान इक मुटदुन, अदिक नान इक ताकत कोट्टुन. आव नान से अंदुन, “हे परमेश्वर उन परमप्रिय गंळ्स! अंजबाळ, नीन इक ताकत सिकुल, नी शक्तिशाली अदिक साहसी बन्स.” याग आव नान से ईव मातगोळ अंदुन आग नान इक ताकत प्राप्त आत. ना अंदीन, “स्वामी, ईग नी माताळ, यतिकी नी नान इक ताकत कोट्ट.” आव अंदुन, “नी रा जान्सत्या कि ना नीन हात्ती येती बंदीन. लेकीन ईग नान इक फारस उन प्रधान से लळुसोर साटी वापस होगोद बिद्दीत. अदिक याग ना होळाईन, आग यूनान इन प्रधान बंदान. फिर भी जो मातगोळ सत्य ग्रंथ दा लिख्सकु आद अव ना नीन इक हेळतीन. नीन कौम इन स्वर्गदूत मीखाएल उन अलावा अदिक यातोदु स्वर्गदूत हैलेच, जो आंदुर विरूद्ध नान सहायता माळुल.”3
Source notes (3)
- Footnote प्रकाशितवाक्य 1:13-15; 2:18; 19:12
- Footnote प्रकाशितवाक्य 12:7
- Footnote प्रकाशितवाक्य 12:7
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.