कुलुस्सिगोळ 2

1ना चाहासतीन नीमी ई मात इन पता नळ्दोगुल कि ना नीम साटी, लौदीकिया दा ईरावाळेर लॉकुर साटी अदिक आ सप्पा मुंदुर साटी जो व्यक्तिगत रूप देल नानी यागलु सिकिदील, ना याट कठिन मयनत माळेतीन. 2ताकी आंदुर मनगोळी प्रोत्साहित सिकुल अदिक परस्पर प्यार दा एकजुट आगेगुल, अदिक अद पुरा विश्वास इन धन जो खरा समझ देल प्राप्त आगतद आंदरी सिक्केगुल. ई प्रकार देल आंदरी परमेश्वर उन भेद पता नळदोदित, जो मसीह खुश आन. 3याऊन दा परमेश्वर उन बुद्धी इन भंडार अदिक ग्यान होचकु आद.

4ईद ना इदुरसाटी अनतीन कि यावारा मंळसा नीमी ख्वाटा वाद विवाद देल ध्वाका कोळबाळुल. बाक चाहे आंदुर याटारा भी वळ्लेर येती हतबाळुल. 5ना मय इन भाव देल नीम से दुर आईन, तरी भी आत्मिक भाव देल नीम्द हात्‍ती आईन, अदिक नीम्द व्यवस्थित जीवन इक अदिक नीम्द विश्वास इन, जो मसीह दा आर, मजबूती नोळकु प्रसन्न आगतीन.

मसीह दा जीवन इन परिपुर्णता

6इदुरसाटी ह्यांग नीव मसीह यीशु उक प्रभु मान्सकु ग्रहण माळ कोंडीर, हांगा आऊन दा बन्सकु ईरी. 7अदिक अदुर्दा जळ हुळकु अदिक वाळुसतेला ईरी; अदिक ह्यांग नीव कल्सकु आगीर हांग अच विश्वास दा मजबूत आगतेला होगी, अदिक यक्कुल से यक्कुल धन्यवाद माळतेला ईरी.

8सावधान ईरी कि यावारा नीमी आ मंळसा अन्द बुद्धी इन व्यर्थ ध्वाका देल गुलाम माळसुस बुळुल, जो मंळसागोळ्द परंपरागोळ देल प्राप्त आगतेला बंदाद अदिक ब्रम्हाण्ड इक शासन माळावाळा आत्मागोळ्द देन हुन, ना कि मसीह अन्द. 9यतिकी आऊन दा ईश्वरत्व स्वभाव हमेशा मसीह अन्द मय दा वास माळतद. 10अदिक नीमी आऊन एकता दा पुरा जीवन कोटकु आग्याद. आव सुरूवात टु सप्पा आध्यात्मिक शासकगोळ अदिक अधिकार इन स्याणा हुन.

11मसीह अन्द सांगुळ दा नीम्द खतना माळकु आग्याद, ना कि आ खतना अन्द सांगुळ जो मंळसागोळ कय देल माळकु आग्याद, लेकीन मसीह अन्द द्वारा माळ्द खतना अन्द सांगुळ, नीम पापगोळ्द सामर्थ्य देल मुक्त माळकु आगताव. 121याग नीव बपतिस्मा ताकोंडीदिर रा नीमी मसीह अन्द सांगुळ दफनुसकु आगीत अदिक बपतिस्मा दा नीम परमेश्वर उन सक्रिय शक्ति दा विश्वास इन माध्यम देल मसीह अन्द सांगुळ भी नेगुकु आगीत, आऊन सांगुळ जित्‍ता भी आदुर. 132ऊंद समय नीव भी आत्मिकता दा सोतकु ईरीर यतिकी नीव पापी, अदिक गैरयहूदी बिना व्यवस्था नोर ईरोर. लेकीन ईग परमेश्वर नीमी मसीह अन्द सांगुळ जीवन दा तंदान. परमेश्वर नाम सप्पा अपराधगोळ इक माफ माळ्यान. 143परमेश्वर नाम बेकार क्याल्सागोळ्द लेखा जोखा अक नाम न्याड्या दा टु हटुस बुट्टुन यदुर दा आ विधीगोळ्द उल्लेख माळकु आगीत जो नाम प्रतिकुल अदिक नाम विरूद्ध ईरोद आव अदरी क्रूस मा खिल्लागोळ देल ठोक्सकु मिटुस बुटान. 15अदिक मसीह क्रूस इन द्वारा आध्यात्मिक शासकगोळ्द सुरूवात टु सामर्थ्य अक अदिक अधिकारीगोळी शासन हीन माळ बुट्टुन अदिक तान विजय अभियान दा बंदी माळकु लॉकुर मुंद आंदुर तमाशा माळदुन. 164

इदुरसाटी यावारा भी मंळसा नीम तिनोद-कुडोद या हाब्ब या व्हाशोद चांद इन हाब्ब, या विश्राम इन दिन इन बारा दा नीम्द याऊ न्याय माळबाळुल. 17यतिकी ईव सब बरावाळा मातगोळ्द छाया हुव, लेकीन वास्तविकता अच मसीह हुन. 18यातोवारा भी मंळसा अन्द द्वारा तान अपमान माळसुसोद इजाजत कोळबाळी जो विशेष दर्शन इन कारण श्रेष्ट आगोद दावा माळतद अदिक जो ख्वाटा विनम्रता अदिक स्वर्गदूतगोळ्द पुजा मा जोर कोळतद. बिना यातोदारा कारण इन ईत्‍ता मंळसा तान मानवीय सोच देल व्यर्थ बायतान. 195अदिक मसीह अक हुळकु ईटोद बंद माळ बुटार, आव मसीह जो मय इन ताल्ला हुन. मसीह अन्द हात्‍ती ता दा सप्पा मय आद जो जोळगोळ अदिक नशगोळ से ऊंदा सांगुळ जोळ्सकु आव, अदिक परमेश्वर जसा वाळुसोद चाहासतान हांग वाळुस्त होगतद.

मसीह अन्द सांगुळ सायोद अदिक ऊळोद

20यतिकी नीव मसीह अन्द सांगुळ सोतोगीर अदिक ब्रम्हाण्ड इन शासन माळावाळा आत्मागोळ से मुक्त माळकु आगीर. रा बाक येती आंदुर घाई जो दुनिया नोर आर जीवन जीऊसतीर? नीव ईत्‍ता विधीगोळ वश दा येती ईरतीर. 21कि “इदरी मुठबाळेतीर, अदरी नेकबाळेतीर, अदिक अदरी कय हचबाळेतीर?” 22ईव सप्पा वस्तुगोळ क्याल्सा दा तरास ताका नष्ट आगेदव यतिकी ईव मंळसागोळ नियम अदिक आग्यागोळ अदिक शिक्षागोळ्द अनुसार आव. 23निश्चित अच ईत्‍ता प्रकार इन सप्पा नियम स्वर्गदूतगोळ्द जबरदस्ती देल पुजा अदिक ख्वाटा विनम्रता, अदिक मय इन गंभीर उपचारगोळ ग्यान मा आधारित आद लेकीन शारीरिक लालसागोळी रोक्सदुर दा ईऊर देल येनु उच फायदा आगाल्द.