आमोस 6

इस्राएल इन विनाश

1“हाय आंदुर मा जो सिय्योन दा निश्चिंताई देल ईरतार, अदिक आंदुर मा जो सामरिया अन पहाळी मा सुरक्षित महसुस माळतार, आंदुर जो श्रेष्ट राज्य दा प्रसिद्ध आर, यार हात्ती इस्राएल इन घराना बरतद!” 2कलने नगर इक होगकु नोळी, अदिक अल टु हमात हेसुर इन धोळ नगर इक होगी; बाक पलिश्तीगोळ्द गत नगर इक होगी. येन अव ई राज्यगोळ से उत्तम आव? येन आंदुर सीमा नीम सीमा से थ्वाळासा धोळ्द आद? 3नीव बेकार दिन इक दुर माळ बुळतीर, अदिक उपद्रव इन गद्दी इक हात्ती तंद कोमतीर.

4“नीव हत्ती हल्ल इन पलंगगोळ मा लेट्सतीर, अदिक तान तान हासक्यागोळ मा काल किसुकु मिंगतीर, अदिक म्यांडा-मर्रीगोळ दा टु मेम्नागोळ अदिक गौशालागोळ दा टु पाड्डागोळ तिनतीर. 5नीव सारंगी इन सांगुळ हाळ हाळतीर अदिक दाऊद उन घाई अलग अलग प्रकार इन वाजा अन आवाज तेगुतीर; 6अदिक कटोरागोळ दा टु सार्रा कुडुतीर, अदिक उत्तम उत्तम याण्णा हचतीर, लेकीन यूसुफ मा बरावाळा विपत्ति इन हाल केळकु शोकित आगालीर! 7ई कारण आंदुर ईग द्याश दा टु तेगुकु आदार, अदिक जो काल किसुकु मिंगतार, आंदुर मौजमस्ती खतम आगेदीत.”

8परमेश्वर यहोवा तांदा किर्या तिनकु अंदान: “यार मा याकूब घमण्ड माळतान, आऊन से ना नफरत, अदिक आऊन गढ़गोळ देल दुश्मनी ईटतीन; अदिक ना ई नगर इक आ सप्पा समेत जो अदुर दा आद, दुश्मन उन वश दा माळ बुळाईन.”

9अगर यातारा मान्या हत्त आरीगोळ ऊळुकु ईत्तार, तरी भी आंदुर सोतोदार. 10याग यारदारा काक्क, जो आऊन होताकावाळा आगुल, आऊन येलुगोळी मान्या टु तेगोर साटी नेगदान, अदिक जो मान्या अन क्वाना दा ईत्तान आऊन से अंदान, “येन नीन हात्ती मात्त यावारा आन?”

आग आव अंदान, “याऊ हैलेच;” आग आव अंदान,

“सुंगा ईर! नामी यहोवा अन हेसुर ईला ताकोम पायजे.”

11“यतिकी यहोवा अन आग्या देल धोळ धोळ तुकळा, अदिक श्यांण्द मान्या दरार आदीत. 12येन घ्वाळागोळ चट्टान मा हरदाव? येन यावारा ईत्ता जागा दा वस्तागोळ देल जोतसुल यल नीव लॉकुर न्याय इक जयर दा, अदिक न्यायीपन इन काय इक केय काय दा बदलुस बुटीर?”

13नीव ईत्ता वस्तु उन कारण खुशी माळतीर जो बेकार आद; अदिक अनतीर, “येन नाव तान अच यत्न देल सामर्थी आगीदील?”

14ई कारण सेनागोळव परमेश्वर यहोवा अन ईद वाणी आद, “हे इस्राएल इन घराना, नोळ, ना नीम खिलाप ऊंद ईत्ता राज्य निद्रुसाईन, जो हमात इन घाटी टु हुडुकु अराबा इन गांगा ताका नीमी संकट दा हाक्कीत.”