परमेश्वर उन वचन
आमोस 4
“हे सामरिया राज्य अन धनवान आर्तेरा, हे सामरी पहाळी इन आर्तेरा, ईद वचन केळी, नीव जो कंगालगोळ मा अत्याचार माळतीर, अदिक दरिद्रगोळी मेट्ट बुळतीर, अदिक तान तान गंळ्स उक आदेश कोळतीर: ‘सारा तरी, कि नाव कुळदेव.’” परमेश्वर यहोवा तान पवित्रता अन किर्या तिनकु अनतान, नोळी, नीम मा ईत्ता दिन बरव आव, कि नीव मुळ्लगोळ से, अदिक नीम औलाद मेन इन गरीगोळ देल जेडुकु आदार. नीम दा टु हर ऊंद दिवार इन दरारगोळ दा टु आगतेला सरका होट बुट्टीर अदिक हर्म्मोन पहाळी दा हाक्कु आदीर, यहोवा अन ईदा वाणी आद.
इस्त्राएल सुधरूसदुर दा असफल
“बेतेल दा बंदकु अपराध माळी, अदिक गिलगाल नगर दा बंदकु हापाळ सा अपराध माळी; तान चळावा व्हातर्या का, अदिक तान दशमांश हर तीसरा दिशी तरतोगी; धन्यवाद बली खमीर मिलुस्कु येर्सी, अदिक तान इच्छा बलीगोळ्द चर्चा नळ्सकु अऊर्द प्रचार माळी; यतिकी हे इस्त्राएलीगोळा, हिंग माळोद नीमी वळ्लीद हततद,” परमेश्वर यहोवा अन ईदा वाणी आद.
“ना नीम नगरगोळ दा अकाल कळुदीन, अदिक नीम सप्पा जागागोळ दा रोट्टी इन कमी माळीन, तरी भी नीव नान दी तिर्गकु बंदीदील,” यहोवा अन ईदा वाणी आद.
“याग कटनी इन मुर तींगुळ ईतोदव, आग ना नीम साटी माळ बरसुसीदील; ना ऊंद नगर दा नीर बरसुसकु दुसरा नगर दा बरसुसीदील; ऊंद केई दा माळ बत्त, अदिक दुसरा केई दा यदुर दा बरसुसीदील, अद वंळ्गेत. इदुरसाटी लॉकुर नीर कुडोर साटी लंग लंग ओयाळतेला ऊंदा नगर दा बंदुर, लेकीन तृप्त आगीदील; तरी भी नीव नान दी तिर्गीदील,” यहोवा अन ईदा वाणी आद.
“ना नीमी गरमी इन झकार अदिक गेरूई किळा देल बळदीन; अदिक याग नीमव बगीचागोळ अदिक अंगुर इन बेलीगोळ, अदिक अंजीर अदिक जैतून इन मार्र हापाळ आगेदव, आग फाफागोळ अवरी तीन कोंडव; तरी भी नीव नान दी तिर्गकु बंदीदील,” यहोवा अन ईदा वाणी आद.
“ना नीम न्याड्या दा मिस्त्र द्याश इन घाई मरी फैलुसदीन; ना नीम घ्वाळागोळी कस्तकु नीम हारोदोर मंळसागोळी तलवार देल कोन्सुस बुट्टीन; अदिक नीम छावनी इन दुर्गन्ध नीम हात्ती पोहचुसदीन; तरी भी नीव नान दी तिर्गकु बंदीदील,” यहोवा अन ईदा वाणी आद.
“ना नीम दा टु हापाळ ईत्ता मंळसागोळी नाश माळदीन ह्यांग परमेश्वर सदोम अदिक गमोरा अक नाश माळीदीन,1 अदिक नीव बेक्की दा टु तेग्द कोर्री घाई ठहरूसदीर; तरी भी नीव नान दी तिर्गकु बंदिदील,” यहोवा अन ईदा वाणी आद.
“ई कारण, हे इस्राएल, ना नीन से हींगा माळाईन, अदिक इदुरसाटी कि ना नीन दा ईद क्याल्सा माळदुर मा आईन, हे इस्राएल, तान परमेश्वर उन मुंद बरोर साटी तयार आगेग!”
नोळ, पहाळीगोळ्द माळावाळा अदिक हवा अक निर्माण माळावाळा,
अदिक मंळसा अक आऊन मन इन विचार हेळावाळा
अदिक हुंजकुका अंधार माळावाळा,
अदिक जो धरती इन ऊचा जागागोळ मा नळावाळा हुन,
आऊंदा हेसुर सेनागोळव परमेश्वर यहोवा आद!
Source notes (1)
- Cross-reference उत्पत्ति 19:24
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.