प्रेरितगोळ 7

स्तिफनुस उन भाषण

1आग महायाजक स्तिफनुस से अंदुन, “येन ई मातगोळ सही आव?”

2स्तिफनुस अंदुन, “हे वार्टुरा, अदिक आप्पगोळा केळी. नाम स्याणा अब्राहम हारान द्याश दा कुरोर से पयले मेसोपोटामिया दा ईरोन; रा तेजोमय परमेश्वर आऊक दर्शन कोट्टुन, 3अदिक आऊन से अंदुन, ‘नी तान द्याश अदिक तान कुटुम्ब टु होटकु आ द्याश दा होग, यदरी ना नीनी तोरसाईन.’ 4आग आव कसदियागोळ द्याश दा टु होटकु हारान द्याश दा होगकु कुरतुन. अब्राहम उन आप्प उन सोत्‍तुर बाद्दा परमेश्वर आऊक अल टु ई द्याश दा तनकु कुर्सदुन यदुर्दा ईग नीव कुरतीर, 5अदिक आऊक येनारा मीरास मतलब काल ईटली भी आऊक जागा कोटीदील, लेकीन वादा माळदुन कि ना ईद द्याश नींद अदिक नीन बाद्दा नीन वंश इन कय दा माळ बुळाईन; लेकीन आ समय आऊन यातोदु औलाद भी ईला ईरोद. 6अदिक परमेश्वर ईद अंदुन, ‘नीन औलाद इन लॉकुर दुसरा द्याश दा परदेशी आदार, अदिक लॉकुर आंदरी दास माळ्यार अदिक नाक सौ वर्ष ताका सतुस्कु आदार.’ 7बाक परमेश्वर अंदुन, ‘या राष्ट्र इन आंदुर दास आदार, आंदरी ना दण्ड कोळाईन, अदिक इदुर बाद्दा आंदुर होटकु ईदा जागी नान स्यावा माळ्यार.’ 8अदिक परमेश्वर आऊन से खतना अन्द वादा माळदुन; अदिक ईदा दशा दा इसहाक आऊन से पैदा आदुन अदिक आऊन जनम इन बाद्दा आठवा दिशी आऊन खतना माळकु आत; अदिक इसहाक से याकूब पैदा आदुन अदिक याकूब से हन्नेळ पारगोळ पैदा आदुर ईंदुर्द भी खतना माळकु आत आंदुर नाम कुलपती बन्सदुर.

9“कुलपतिगोळ यूसुफ से जलन माळकु आऊक मिस्त्र द्याश होगावाळेर इक मारदुर. लेकीन परमेश्वर आऊन सांगुळ ईरोन, 10अदिक आऊक आऊन सप्पा दुखगोळ देल बिळ्सकु मिस्त्र अन्द राजा फिरौन उन नजर दा अनुग्रह अदिक बुद्धी प्रदान माळदुन, अदिक आव आऊक मिस्त्र मा अदिक तान सप्पा मान्ना मा शासक नियुक्त माळदुन. 11आग मिस्त्र अदिक कनान इन सप्पा द्याश दा अकाल बित्‍त; यदुर देल भारी दुखगोळ बंदव, अदिक नाम आप्प दादागोळी तिनली ईला सिकतोगोद. 12लेकीन याकूब ईद केळकु कि मिस्त्र द्याश दा अनाज आद, नाम आप्प दादागोळी पयला घन कळुदुन. 13दुसरा घन यूसुफ खुद इक तान वार्टुर मा प्रगट माळदुन अदिक यूसुफ उन जाती फिरौन उक मालूम आगेत. 14आग यूसुफ तान आप्प याकूब अदिक तान सप्पा कुटुम्ब इक, जो पच्यात्‍तर मंळसा ईरोर, बातणी कळुदुन. 15आग याकूब मिस्त्र दा ल्यालमा होदुन; अदिक अल आव अदिक आऊन चिकोर सोतोदुर. 16आंदुर लाश शकेम नगर दा पोहचुस्कु आ कब्र दा ईटकु आदव, यारी अब्राहम चाँदी इन सिक्‍का कोटकु शकेम दा हमोर उन औलाद से कोंडीदुन.

17“लेकीन याग आ वादा अन्द पुरा आगोद घळी हात्‍ती बत्‍त जो परमेश्वर अब्राहम से माळीदुन, रा मिस्त्र द्याश दा आ लॉकुर वाळुसेदुर अदिक हापाळ आगेदुर. 18आग मिस्त्र दा दुसरा राजा आदुन जो यूसुफ उक ईला अरोन. 19आव नाम जाती से चालाकी माळकु नाम आप्प दादागोळ सांगुळ ईल ताका बुरा व्यवहार माळदुन, कि आंदरी तान चिकोरी भीट बुळोर साटी मजबुर माळदुन. 20आ समय मूसा पैदा आदुन. आव परमेश्वर उन नजर दा हापाळ अच सुंदर ईरोन. आव मुर तिंगुळ ताका तान आप्प उन मान्या पालस्कु आदुन. 21याग भिटकु आदुन रा फिरौन उन पोर आऊक नेगु कोंडुर, अदिक तान पार उन घाई पाल्सदुर. 22मूसा अक मिस्त्रीगोळ सप्पा विद्या कल्सकु आत, अदिक आव वचन अदिक कर्म येढ्ढु दा ताकतवर ईरोन.

23“याग आव चालीस वर्ष इनव आदुन, रा आऊन मन दा बत्‍त कि ना इस्त्राएली वार्टुर से मुलाकात माळाईन. 24आव ऊंद मंळसा मा अन्याय आग्त नोळकु आऊक ऊळ्सदुन, अदिक मिस्त्री इक कोंदकु अत्याचार माळ्द मंळसा अन्द बदला ताकोंडुन. 25आव विचार माळदुन कि आऊन लॉकुर समस्यार कि परमेश्वर आऊन कयगोळ देल आंदुर्द उद्धार माळ्यान, लेकीन आंदुर समसीदील. 26दुसरा दिशी याग आंदुर आपस दा झगळा माळोर, रा आव अल बंदुन; अदिक ईद अनकु आंदरी मिलुसोर साटी समजुसदुन, हे मंळसागोळा, आव अंदुन, ‘नीव रा वार्टुर-वार्टुर हुईर,’ आबुर दाबुर मा येती अन्याय माळतीर? 27लेकीन जो तान बाजुवाळा मा अन्याय माळोन, आव आऊक ईद अनकु हटुस बुटुन, ‘नीनी याव नाम मा अधिकार अदिक न्याय माळावाळा ठहरूस्यान? 28येन याता रीति देल नी नीन मिस्त्री इक कोंद बुट नानी भी कोंद बुळोद चाहासत्या?’ 29ईद मात केळकु मूसा ओळदुन अदिक मिद्यान द्याश दा परदेशी आगकु ईरली कुरतुन, अदिक अल आऊन येढ्ढ पारगोळ पैदा आदुर.

30“याग पुरा चालीस वर्ष बितसेदव, रा ऊंद स्वर्गदूत सीनै पहाळी इन आळी दा आऊक होततेला झाळी इन बेक्‍की अन लपेट दा दर्शन कोट्टुन. 31मूसा अक ईद दर्शन नोळकु आश्चर्य आत, अदिक याग नोळोर साटी आव हात्‍ती होदुन, रा प्रभु अन्द ईद आवाज बत्‍त, 32ना नीन आप्प दादागोळ, अब्राहम, इसहाक अदिक याकूब उन परमेश्वर हुईन. आग रा मूसा नळ्गली कुरतुन, ईल ताका कि आऊक नोळोद हिम्मत आगीदील. 33आग प्रभु आऊन से अंदुन, ‘तान कालगोळ दा टु केरू तेगु कोम, यतिकी याता जागा दा नी निदुरकु आय, अद पवित्र जागा हुन. 34ना सचमुच तान लॉकुर्द जो मिस्त्र द्याश दा आर, दुर्दशा अक नोळीन; अदिक आंदुर्द आह अदिक आंदुर्द वोरलोद केळीन; इदुरसाटी आंदरी बिळसोर साटी ईळदीन. ईग बा, ना नीनी मिस्त्र द्याश दा कळाईन.’

35“या मूसा अक आंदुर ईद अनकु अस्वीकार माळीदुर, ‘नीनी यार नाम मा अधिकार अदिक न्याय माळावाळा ठहरूस्यार?’ आऊक अच परमेश्वर शासक अदिक बिळसावाळा ठहरूस्कु, आ स्वर्गदूत उन द्वारा यार आऊक झाळी दा दर्शन कोटीदुन, कळुदुन. 36ईवा मंळसा मिस्त्र द्याश अदिक क्याचांद समुद्र अदिक आळी दा चालीस वर्ष ताका अदभुत क्याल्सा अदिक चमत्कार तोर्स तोर्सकु आंदरी तेगुकु तंदुन. 37ईव आवा मूसा हुन, याव इस्त्राएलगोळ से अंदुन, ‘परमेश्वर नीम वार्टुर दा टु नीम साटी नान घाई ऊंद बातणी तरावाळा नेगदान.’ 38ईव आवा हुन, याव आळी दा मंडली अन न्याड्या आ स्वर्गदूत उन सांगुळ सीनै पहाळी मा आऊन से मातगोळी हेळदुन अदिक नाम आप्प दादागोळ सांगुळ ईरोन, आऊक अच जीवित वचन सिक्याव कि नाम ताका पोहचुसुल. 39लेकीन नाम आप्प दादागोळ आऊन मानसोद चाहसीदील, बल्‍की आऊक हटुस्कु तान मन मिस्त्र दी फेर्सदुर, 40अदिक हारून से अंदुन, ‘नाम साटी हिंग देवता माळ, जो नाम मुंद-मुंद नळुल, यतिकी ईव मूसा जो नामी मिस्त्र द्याश टु तेगुकु तंदुन, नाव जानसालेव आऊक येन आग्याद?’ 41आ दिनगोळ दा आंदुर ऊंद वस्ता अन घाई कांळ्सावाळा मूर्ति माळदुर, अदिक अदुर मा बली येर्सदुर, अदिक तान कयगोळ देल पाऊनचार माळकु खुशी मान्सदुर. 42इदुरसाटी परमेश्वर अनदेखा माळकु आंदरी बिट बुटुन, कि आकाशगण इन पुजा माळुल, ह्यांग भविष्यवक्तागोळ किताब दा लिख्सकु आद, ‘हे इस्त्राएल इन घराना, येन नीव

आळी दा चालीस वर्ष ताका पशुबली अदिक अन्नबली

नान इक अच येर्सत ईत्‍तीर?

43नीव मोलेक इन तम्बू

अदिक रिफान देवता अन्द तारा अक हुडुकु टेटाळ तोगीर,

मतलब आ मूर्तिगोळी यारी नीव दण्डवत माळोर साटी माळदीर.

इदुरसाटी ना नीमी बेबीलोन इन हात्‍ती ओतकु कुरसाईन.’

44“नाम आप्प दादागोळ हात्‍ती परमेश्वर उन सानिध्य अन्द तम्बू, ह्यांग परमेश्वर मूसा अक हेळदुन हांग माळीदुन. अद आ नमुना अन घाई ईरोद जो मूसा अक तोर्सकु आगीत.” 45अदा तम्बू अक नाम आप्प दादागोळ पूर्वकाल टु हुडुकु यहोशू अन्द सांगुळ ईल तंदुर; याता समय इन आंदुर आ गैरयहूदीगोळ मा अधिकार माळदुर, यारी परमेश्वर नाम आप्प दादागोळ मुंद टु तेगु बुट्टुन, अदिक अद तम्बू दाऊद उन समय ताका ईत्‍त. 46आऊन मा परमेश्वर अनुग्रह माळदुन; इदुरसाटी आव विनती माळदुन कि आव याकूब उन परमेश्वर उन साटी निवास स्थान माळुल. 47आव ईला लेकीन सुलैमान आऊन साटी मान्ना माळदुन.

48लेकीन परमप्रधान कय इन माळ्द मान्नागोळ दा ईरालुन, ह्यांग कि भविष्यवक्ता अंदुन,

49प्रभु अनतान, स्वर्ग नांद सिंहासन

अदिक पृथ्वी नान कालगोळ तल्ला अन्द आशन हुन,

नान साटी नीव याता प्रकार इन मान्ना माळीर?

अदिक नांद आराम इन साटी यातोद जागा ईत्‍तीत?

50येन ई सप्पा वस्तुगोळ नान कय इन माळदव आल्लच?

51“नीव याट जीद्दी आईर, अदिक मन अदिक किव इन खतनारहित लॉकुरा, नीव हमेशा पवित्र आत्मा अन्द विरोध माळतीर. ह्यांग नीम आप्प दादागोळ माळतोगोर, हांगा नीव भी माळतीर. 52भविष्यवक्तागोळ दा टु यारी नीम आप्प दादागोळ सतुसीदील? आंदुर आ न्यायी अन्द आगमन इन पूर्वकाल टु बातणी कोळावाळेर इक कोंद बुटुर; अदिक ईग नीव भी आ न्यायी मंळसा अक हुळसुसावाळेर अदिक कोन्सुसावाळेर आदीर. 53नीव स्वर्गदूतगोळ द्वारा ठहरूस्द व्यवस्था रा नोळदीर, लेकीन अदुर पालन माळदीर.”

स्तिफनुस कल्लगोळ होळदुर देल सोत्‍तुन

54ई मातगोळी केळकु आंदुर होत्‍तेदुर अदिक आऊन मा हल्ल कचली कुरतुर. 55लेकीन आव पवित्र आत्मा से परिपुर्ण आगकु स्वर्ग दी नोळदुन अदिक परमेश्वर उन महिमा अक अदिक यीशु उक परमेश्वर उन ऊमा कय दी निदुर्त नोळकु अंदुन, 56“नोळी, ना स्वर्ग इक तेरूत अदिक मंळसा अन पार उक परमेश्वर उन ऊमा कय दी निदुरकु नोळतीन.”

57आग आंदुर धोळ्द आवाज देल चिळ्लासकु किव बंद माळ बुटुर, अदिक सभा अन सभासदगोळ ऊंद सांगुळ आऊन मा झपट्टा होळदुर; 58अदिक आऊक नगर इन व्हार्या तेगुकु आऊन मा कल्लगोळी होडुली कुरतुर. गवाहगोळ तान कपळा शाऊल हेसुर ईनव ऊंद हारोद मंळसा अन कालगोळ हात्‍ती तेगुकु ईट बुटुर. 59आंदुर स्तिफनुस मा कल्लगोळी होडुतेला ईत्‍तुर, अदिक आव ईद अनकु प्रार्थना माळतेला ईत्‍तुन, “हे प्रभु यीशु, नान आत्मा अक ग्रहण माळ.” 60बाक ट्वांगरा टेक्सकु धोळ्द आवाज देल कारदुन, “हे प्रभु, ईद पाप आंदुर मा हचबाळ.” अदिक ईद अनकु आव सोतोदुन.