प्रेरितगोळ 25

पौलुस उन रोमी साम्राज्य अक अपिल

1फेस्तुस आ द्याश दा पोहचुसोद मुर दिन बाद्दा कैसरिया टु यरूशलेम इक होदुन. 2आग प्रधान याजकगोळ अदिक यहूदीगोळ्द प्रमुख लॉकुर आऊन मुंद पौलुस उन मा आरोप हचदुर; अदिक आऊन से विनती माळदुर. 3कि आव पौलुस उक यरूशलेम दा कारसुल कि आंदुर आऊक हादी मा अच कोंदबुळुल. 4फेस्तुस उत्‍तर कोट्टुन, “पौलुस कैसरिया अन्द कैद दा आन, अदिक ना खुद राटनेरी अल होगाईन.” 5बाक अंदुन, “नीम दा जो अधिकार ईटतार आंदुर नान सांगुळ कैसरिया नळुल, अदिक अगर ई मंळसा येनारा अनुचित क्याल्सा माळ्यान रा आऊन मा दोष हचुल.”

6आंदुर न्याड्या येनारा येठ्ठ हत्‍त दिन ईतकु फेस्तुस कैसरिया होटोदुन; अदिक दुसरा दिशी न्याय आसन मा कुर्तकु पौलुस उक तरोद आग्या कोट्टुन. 7याग पौलुस बंदुन रा जो यहूदी यरूशलेम टु बंदीदुर, आंदुर आसपास निदुरकु आऊन मा हापाळ सा गंभीर आरोप हचदुर, यदरी आंदुर साबित ईला माळसकोर. 8लेकीन पौलुस खुद इन बचाव दा उत्‍तर कोट्टुन, “ना रा ना यहूदीगोळ्द व्यवस्था अन अदिक ना मंदिर इन, अदिक ना रोमन शासक कैसर उन विरूद्ध येनारा पाप माळीन.”

9आग फेस्तुस यहूदीगोळी खुश माळोद इच्छा देल पौलुस से अंदुन, “येन नी चाहासत्या कि यरूशलेम इक होद्या; अदिक अल नान मुंद नीन ईद मुकदमा तय माळकु आगुल?”

10पौलुस अंदुन, “ना कैसर इन न्याय आसन इन मुंद निदुरकु आईन; नान मुकदमा अन्द ईल्या फैसला आग पायजे. ह्यांग नी वळ्लीद तरीका देल जान्सत्या, यहूदीगोळ्द ना येनु अपराध माळीदील. 11अगर ना अपराधी आईन अदिक कोंद बुळोद लायक येनारा क्याल्सा माळीन, रा सायोर से मार्रा तिर्गुसालीन लेकीन याता मातगोळ्द ईंदुर नान मा दोष हचतार, अगर अऊर दा टु यातोदारा भी मात सही आगीदील, रा नानी याऊ आंदुर कय दा कोळ सकालुन. हिंग ना कैसर उन से विनती माळतीन.”

12आग फेस्तुस सलाहकारगोळ से सलाह मसवरा माळकु उत्‍तर कोट्टुन, “नी कैसर उन से विनती माळ्या, इदुरसाटी नीनी कैसर उन हात्‍ती इच ओतकु आदीत.”

राजा अग्रिप्पा अदिक बरनिके अन मुंद पौलुस

13येनारा दिन बित्सदुर बाद्दा अग्रिप्पा राजा अदिक बिरनीके कैसरिया दा बंदकु फेस्तुस से भेंट माळदुर. 14आंदुर हापाळ दिन अल ईत्‍तुर बाद्दा फेस्तुस पौलुस उन बारा दा राजा अक हेळदुन: “ऊंद मंळसा आन, यारी फेलिक्स बंदीगृह दा बिटकु होटोग्यान. 15याग ना यरूशलेम होगीदीन, रा प्रधान याजक अदिक यहूदीगोळ्द स्याणागोळ आऊन मा आरोप हचदुर अदिक चाहासदुर कि ना आऊक दोषी साबित माळाईन. 16लेकीन ना आंदरी उत्‍तर कोटीन कि रोमीगोळ्द ईद रीति हैलेच कि यावारा मंळसा अक दण्ड इन साटी यारदारा कय दा कोट्ट बुळुल, यागासताका आरोपी इक तान दोष हचावाळेर मुंद निदुरकु दोष इन उत्‍तर कोळोद मवका सिकाल. 17इदुरसाटी याग आंदुर नान सांगुळ ईल बंदुर, रा ना येनु देर माळीदील, लेकीन दुसरा अच दिशी न्याय आसन मा कुर्तकु पौलुस उक तरोद आग्या कोटीन. 18याग आऊन दोष हचावाळेर निदुरदुर, रा आंदुर हिंग अनुचित मातगोळ्द दोष हचीदिल, ह्यांग ना समसीन. 19लेकीन यहूदी रीति इन अनुसार अदिक यीशु हेसुर इनव यावारा मंळसा अन बारा दा, जो सोतोगिदुन अदिक पौलुस आऊक जीवित हेळतोगोन, विवाद माळतोगोर. 20ना उलझन दा ईरीन कि ई मातगोळ्द पता ह्यांग हचाईन? इदुरसाटी ना आऊन से केळदीन, ‘येन नी यरूशलेम होद्या कि अल ई मातगोळ्द फैसला आगुल?’ 21लेकीन याग पौलुस विनती माळदुन कि आऊंद मुकदमा अन फैसला कैसर उन अल आगुल, रा ना आग्या कोटीन कि यागासताका आऊक कैसर उन हात्‍ती कळालीन, आऊक कैद दा ईटकु आगुल.”

22आग अग्रिप्पा फेस्तुस से अंदुन, “ना भी आ मंळसा अन केळोद चाहासतीन.” आव अंदुन, “नी नाळ केळ कोंड्या.”

23इदुरसाटी दुसरा दिशी याग अग्रिप्पा अदिक बिरनीके बळा धूमधाम देल बंदुर अदिक पलटन इन सरदारगोळ अदिक नगर इन प्रमुख लॉकुर्द सांगुळ दरबार दा पोहचुसदुर. आग फेस्तुस आग्या कोट्टुन कि आंदुर पौलुस उक तरूल. 24फेस्तुस अंदुन, “हे राजा अग्रिप्पा, अदिक हे सप्पा मंळसागोळा जो ईल नाम सांगुळ आईर, नीव ई मंळसा अक नोळतीर, यार्द बारा दा सप्पा यहूदीगोळ यरूशलेम दा अदिक ईल भी चिल्ळास चिळ्लासकु नान से विनती माळदुर कि ईऊंद जित्‍ता ईरोद उचित हैलेच. 25लेकीन ना जान्स कोंडीन कि आव हिंग येनु माळीदील कि कोंदकु आगुल; अदिक जब कि आव खुद अच कैसर उन से नान न्याय आगुल हिंग विनती माळदुन, रा ना आऊक रोम दाकळोद निर्णय माळदीन. 26लेकीन ना आऊन बचाव इन बारा दा यातोदु निश्चित मात नोळीदील कि कैसर उन हात्‍ती लिख्सकु कळाईन. इदुरसाटी ना आऊक नीम मुंद अदिक खास माळकु हे राजा अग्रिप्पा, नीन मुंद तंदीन कि जाँच्सदुर बाद्दा नानी येनारा रा आऊन बारा दा लिख्सली सिकुल. 27यतिकी बंदी इक कळोद अदिक जो दोष आऊन मा हचकु आग्याव, अवरी स्पष्ट रीति देल ईला हेळोद, नानी बेकार जान्सकु बिळतद.”