परमेश्वर उन वचन
२ थिस्सलुनीकि 3
नाम साटी प्रार्थना
अन्त दा, हे वार्टुरा अदिक आकतींगेरा, नाम साटी प्रार्थना माळतोगी कि प्रभु उन वचन हिंग राटनेरी फैलुसुल अदिक महिमा आगुल, ह्यांग नीम दा आत, अदिक नाव तेळा अदिक दुष्ट मंळसागोळ देल उळ्दकु ईरूल यतिकी हर मंळसा वचन मा विश्वास माळालुन.
प्रभु विश्वासयोग्य आन; आव नीमी मजबूती देल संची माळ्यान अदिक आ शैतान उन से सुरक्षित ईट्यान. नामी प्रभु नीम बारा दा भरोसा कोळतान कि जो-जो आग्या नाव नीमी कोळतेव, अवरी नीव मान्सतिर, अदिक मान्सतेला भी ईत्तीर. परमेश्वर उन प्यार अदिक मसीह दा हिम्मत ईला बिळोद अदिक प्रभु नीम मन इन अगुवाई माळुल.
कार्य माळोद उत्तरदायित्व
हे वार्टुरा अदिक आकतींगेरा, नाव नीमी तान प्रभु यीशु मसीह अन हेसुर देल आग्या कोळतेव कि नीव हर ऊंद ईत्ता विश्वासी से ब्यार्र ईरी जो अनुचित चाल नळुतान अदिक जो शिक्षा आव नाम से ताकोंडान अदुर अनुसार माळालुन. यतिकी नीव खुद अच जान्सतीर कि याता रीति देल नाम घाई चाल नळु पायजे, यतिकी नाव नीम न्याड्या दा ईरेव आग आलसी ईला ईरेव, अदिक यारदु रोट्टी फुकट दा तंदिदील; लेकीन मयनत अदिक कष्ट देल ईळ्लक हागुल क्याल्सा धंदा माळतोगेव कि नीम दा टु यारदु मा भार बरबाळुल. हिंग ईला कि नामी नीम से मदत बेळोद अधिकार हैलेच, लेकीन इदुरसाटी कि तान तान इक नीम साटी आदर्श ठहरूसदेव कि नीव नाम घाई चाल नळी. यतिकी याग नाव नीम मान्या ईरेव, आग भी ईद आग्या नीमी कोळ तोगेव कि “अगर यावारा क्याल्सा ईला माळोद चाहसतिदान रा ऊम भी बाळुल. नाव केळतेव कि थ्वाळासा लॉकुर नीम न्याड्या दा आलसी आर अदिक येनु क्याल्सा धंदा माळालुर, लेकीन दुसरा अन क्याल्सा दा कय हाकतोगतार. ईत्ता मंळसागोळी नाव प्रभु यीशु मसीह दा आग्या कोळतेव अदिक समझुसतेव कि वळ्लीद रीति देल क्याल्सा माळकु तांद अच रोट्टी तिनुल.
“नीव, हे वार्टुरा अदिक आकतींगेरा, भलाई माळदुर दा हिम्मत बिळबाळी. अगर यावारा नाम ई चिट्ठी इन मात इक मान्सालुन रा आऊन मा नजर ईटी, अदिक आऊन संगत माळबाळी, यदुर देल आव लज्जित आगुल. तरी भी आऊक दुश्मन सम्सबाळी, लेकीन सप्पा मुंदुरी विश्वासी जान्सकु समझुसी.”
आखरी शब्द
ईग प्रभु जो शांती नव सोता हुन खुद अच नीमी हमेशा अदिक हर प्रकार देल शांती कोळुल. प्रभु नीम सप्पा मुंदुर सांगुळ हमेशा ईरूल.
ना, पौलुस, तान कय देल नमस्कार लिख्सतीन. हर चिट्ठी इक ना हिंग खतम माळतीन; ना ईदा प्रकार देल लिख्सतीन अदिक हर ऊंद चिट्ठी दा ना हिंगा हस्ताक्षर माळतीन. नाम प्रभु यीशु मसीह अन्द अनुग्रह नीम सब मा आगतेला ईरूल.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.