२ पतरस 3

प्रभु उन मात्‍त बरोद वाचा

1हे प्रिय संगीगोळा, ईग ना नीमी ईद दुसरा चिट्ठी लिख्सतीन, अदिक येढ्ढु दा याद कोळसुस्कु नीम्द शुद्ध मन इक जागृत माळोद विचार माळतीन, 2कि नीव आ मातगोळ इक जो पवित्र भविष्यवक्ता पयले टु अंदार, अदिक प्रभु अदिक उद्धारकर्ता अन आ आग्या अक याद माळी जो नीम्द प्रेरितगोळ उन द्वारा कोटकु आगीत. 31सब से पयले ईद जान्स कोमी कि आखरी दिनगोळ दा नीम्द मज्याक हार्सावाळेर बंदार जो तान अच अभिलाषागोळ्द अनुसार नळदार 4अदिक केळ्यार, “आव बरोद प्रतिग्या माळीदुन, येन आव माळीदिल? आव येल आन? नाम पुर्वज रा पयला टु अच सोतोग्यार लेकीन यागी टु दुनिया बनस्याद सप्पा मातगोळ हांग अच नळुतेला बरेत्याव.” 5आंदुर रा जान बुझुस्कु ईद मारतोदुर कि परमेश्वर उन कोळ्द आग्या देल आकाश अदिक पृथ्वी माळकु आग्याद अदिक पृथ्वी नीर दा टु बन्सत अदिक नीर दा संची आद, 6इदुर्दा कारण आ दुनिया अन दुनिया नीर दा मुळ्ककु नाश आगेत. 7लेकीन ईद आकाश अदिक पृथ्वी ईंद अस्तित्व दा आद, आऊंदा आदेश इन द्वारा बेक्‍की देल नाश आगोर साटी सुरक्षित आद; इंदरी आ दिन इन साटी ईटकु आगेत्याद याग अन्यायी लॉकुर्द न्याय आदीन अदिक आंदुर नाश माळकु आदार.

8हे प्रिय संगीगोळा, ईद ऊंद मात इक मारूबाळी कि प्रभु उन नजर दा ऊंद दिन अदिक ऊंद हजार साल दा येनु फरक हैलेच; आऊन साटी ईव येढ्ढु बराबर आव. 9प्रभु तान प्रतिग्या अन बारा दा समय माळालुन, ह्यांग समय थ्वाळासा लॉकुर सम्सतार; लेकीन नीम्द बारा दा संयम हुडुतान, अदिक चाहासालुन कि यावारा नाश आगुल, बल्‍की ईद कि सप्पा मुंदरी मन फिराव इन मवका सिकुल. 102

लेकीन प्रभु उन दिन काळ्ल उन घाई होट बंदीत, आ दिशी आकाश हापाळ गर्जना अन सांगुळ अदृश्य आगेदीत, अदिक आकाश इन पुरा चिजगोळ होतकु नाश आगेदव अदिक पृथ्वी अदिक अदुर दाकळव सप्पा मातगोळ गायब आगेदव. 11जब कि ईव सप्पा वस्तुगोळ ई रीति देल नाश आगावाळा आव, रा नीमी याता प्रकार इन लॉकुर आग पायजे? नीम्द जीवन पवित्र अदिक परमेश्वर उन दी समर्पित आगली पायजे, 12अदिक परमेश्वर उन आ दिशी इन हादी याता रीति देल काय पायजे अदिक आऊन जल्दी बरोद साटी ह्यांग कोशिश माळ पायजे, यदुर कारण आकाश बेक्‍की देल नाश माळकु आदीत, अदिक आकाश इन पुरा वस्तुगोळ गरमी देल पिघलुसेव. 133लेकीन आऊन वादा अन अनुसार नाव ऊंद व्हाशोद आकाश अदिक व्हाशोद पृथ्वी इन आस नोळतेव यदुर दा न्याय वास माळीत.

14इदुरसाटी, हे प्रिय संगीगोळा, ह्यांग नीव आ दिन इन हादी कायेतीर, रा तान दी टु पुरा कोशिश माळी कि नीव शांती देल परमेश्वर उन नजर दा आलोचना रहित अदिक निष्कलंक ठहरूसी, 15नाम्द प्रभु उन धीरज इक जो आव नामी कोटान उद्धार इन संधी सम्सी, ह्यांग नाम प्रिय संगी पौलुस भी आ ग्यान देल जो परमेश्वर वार्ट उक कोटीदुन अदुर्द इस्तेमाल माळकु लिख्सदुन. 16हांग अच आव तान सप्पा चिट्ठी गोळ दा भी ईव मातगोळ इक लिख्सदुन, यारदा येनारा मातगोळ हिंग आव यवरी समसोद कठिन आद, अदिक अनपढ़ अदिक चंचल लॉकुर अदुर अर्थगोळी इक भी शास्त्र अन अन्य मातगोळ घाई जेडुकु तांद अच नाश इन कारण माळतार.

17इदुरसाटी हे प्रिय संगीगोळा, नीव लॉकुर पयला टु उच ईव मातगोळी जान्सकु सावधान ईरी, ताकी न्यायविरूद्ध लॉकुर्द गलतीगोळ्द द्वारा तान स्थिरता अक येल्यारा कय देल काळुकोमी. 18लेकीन नामव प्रभु अदिक उद्धारकर्ता यीशु मसीह अन अनुग्रह अदिक ग्यान दा वाळुसतेला होगी. आऊन दा प्रशंसा सही मायना दा आगुल, अदिक हमेशा आगतेला ईरूल. आमीन.