२ कुरिन्थि 7

1इदुरसाटी हे प्रियगोळा, याग कि ई वादागोळ नामी सिक्याव, रा बरी, नाव तान तान इक मय अदिक आत्मा अन्द सप्पा मलिनता देल शुद्ध माळेव, अदिक परमेश्वर उन अंज्क ईटतेला पवित्रता अक सिद्ध माळेव.

पौलुस उन खुशी

2नामी तान दिल दा जागा कोळी. नाव ना रा यारदु सांगुळ अन्याय माळेव, ना यारीकारा बिगळुसेव अदिक ना यारीकारा ठगुसेव. 3ना नीनी दोषी ठहरूसोर साटी ईद अनालीन. यतिकी ना पयले अच अन बुटीन कि नी नाम दिल दा हिंग कुर्तोग्या कि नाव नीन सांगुळ सायोर अदिक ऊळोर साटी तयार आयेव. 4ना नीम से हापाळ हिम्मत इन सांगुळ माताळेतिन, नानी नीम मा बळा घमण्ड आद; ना शांती देल तुम्मेगीन. तान सप्पा क्लेश दा ना खुशी देल हापाळ तुमकु ईरतीन. 51

यतिकी याग नाव मकिदुनिया नगर दा बंदेव, आग भी नाम मय इक चैन सिकीदील, लेकीन नामी नाकु दी टु क्लेश सिकतोगोद; व्हार्या लळाईगोळ ईरव, बुळ्क भयंकर मातगोळ ईरव. 6फिर भी दिन गरीब मंळसागोळी शांती कोळावाळा परमेश्वर तीतुस उन बंदुर देल नामी शांती कोट्टुन; 7अदिक ना सिर्फ आऊन बंदुर देल लेकीन आऊन आ शांती देल भी, जो आऊक नीम दी टु सिकीत. आव नीम लालसा, नीम दुख अदिक नान साटी नीम धुन इन बातणी नामी केळ्सदुन, यदुर देल नानी मात्‍त खुशी आत.

8यतिकी कदाचित ना तान चिट्ठी देल नीनी दुखी माळदीन, लेकीन अदुर देल पछतासालिन ह्यांग कि पयले पछतासिन, यतिकी ना नोळतीन कि आ चिट्ठी देल नीनी दुख रा आत लेकीन अद घळी तिमुर्द साटी ईरोद. 9ईग ना खुश आईन पर इदुरसाटी ईला कि नीनी दुख पोहचुस्त, उलटा इदुरसाटी कि नी आ दुख इन कारण मन तिर्गुस्द, यतिकी नीन दुख परमेश्वर उन इच्छा अन्द अनुसार ईरोद कि नाम दी टु नीनी यातोदु मात दा हानि पोहचुस बाळुल. 10यतिकी परमेश्वर-भक्ति इन दुख हिंग पश्चाताप पैदा माळतान यदुर्द परिणाम उद्धार आद अदिक बाक अदुर देल पछतासोद बिळाल. लेकीन दुनिया अक दुख मृत्यु पैदा माळतद. 11इदुरसाटी नोळी ईदा मात देल कि नीमी परमेश्वर उन दी टु बरोद दुख आत नीम दा याट उत्साह अदिक खुद इक उळसोद इच्छा अदिक हतास, अदिक अंज्क, अदिक लालसा, अदिक आस्था अदिक न्याय कोळोद विचार पैदा आत? नीव हर प्रकार देल ईद सिद्ध माळकु तोर्सदीर कि नीव ई मात दा निर्दोष आईर.

12बाक ना जो नीम हात्‍ती लिखसीदिन, अद ना रा आऊन कारण लिख्सदीन याव अन्याय माळदुन अदिक ना आऊन कारण यार मा अन्याय माळकु आत, लेकीन इदुरसाटी कि नीम उत्साह जो नाम साटी आद, अद परमेश्वर उन मुंद नीम मा प्रगट आगेगुल. 13इदुरसाटी नामी दिलासा सिक्त. नाम ई दिलासा अन्द सांगुळ तीतुस उन खुशी इन कारण मात्‍त यक्कुल खुशी आत यतिकी आऊन जीव नीम सप्पा मुंदुर कारण खुश आगेत. 14यतिकी अगर ना आऊन मुंद नीम बारा दा येनारा घमण्ड तोर्सदीन, रा लज्जित आगीदील, लेकीन ह्यांग नाव नीम से सप्पा मातगोळ सही-सही अन बुटिदेव, हांग अच नाम घमण्ड तोरसोद तीतुस उन मुंद भी सही होळ्त. 15याग आऊक नीम सप्पा मुंदुर्द आग्याकारी आगोद याद आगतद कि ह्यांग नीव अंज्क अदिक नळ्गतेला आऊन से मुलाकात माळदीर; रा आऊन प्यार नीम दी मात्‍त यक्कुल वाळुसेगतद. 16ना खुश आईन यतिकी ना हर मात दा नीम मा पुरा भरोसा माळ सकतीन.