१ थिस्सलुनीकि 4

जीवन जो परमेश्वर उक खुश माळुल

1इदुरसाटी हे वार्टुरा अदिक आकतींगेरा, नाव नीम से विनती माळतेव अदिक नीमी प्रभु यीशु मसीह दा समझुसतेव कि ह्यांग नीव नाम से योग्य चाल नळोद अदिक परमेश्वर उक खुश माळोद कलतीर, अदिक ह्यांग नीव नळुतीर भी, हांग अच अदिक भी वाळुस्तेला होगी. 2यतिकी नीव जान्सतीर कि नाव प्रभु यीशु उन अधिकार देल नीमी याता-याता शिक्षागोळ कोटेव. 3परमेश्वर उन इच्छा ईद आद कि नीव पवित्र बन्सी: अर्थात व्यभिचार देल उळ्दकु ईरी, 4अदिक नीम दा टु हर ऊंद मंळसा अक ईद जान्स पायजे कि तान-तान हिंग्स उन सांगुळ पवित्रता अदिक आदर इन सांगुळ व्यवहार माळोद आद ईद नीमी कलु पायजे, 5अदिक ईद क्याल्सा अभिलाषा देल ईला, अदिक ना आ गैरयहूदीगोळ घाई जो परमेश्वर उक जान्सालुर, 6कि ईद मात दा याऊ तान सहकर्मी वार्ट उक ठगुसबाळुल, अदिक आऊन फायदा नेगुबाळी, यतिकी प्रभु ईव सप्पा मातगोळ बदला ताकोमावाळा आन; ह्यांग कि नाव पयले अच नीम से अंदेव अदिक चितुस देव भी. 7यतिकी परमेश्वर नामी अशुध्द दा ईरोरसाटी ईला, लेकीन पवित्र आगोर साटी कारदान. 8ईद कारण जो ईद शिक्षा अक नकार्सतान, आव मंळसा अक ईला लेकीन परमेश्वर उक नकार्सतान, जो तान पवित्र आत्मा नीमी कोळतान.

9लेकीन भाईचारा अन प्यार इन बारा दा ईद जरूरी हैलेच कि ना नीम हात्‍ती येनारा लिख्साईन, यतिकी आपस दा प्यार ईटोद नीव खुद अच परमेश्वर देल कलतीर; 10अदिक पुरा मकिदुनिया नोर सप्पा वार्टुर आकतींगेर सांगुळ हिंग प्यार माळतीर. लेकीन हे वार्टुरा अदिक आकतींगेरा, नाव नीमी समझुसतेव कि यक्कुल अच वाळुस्तेला होगी, 11अदिक ह्यांग नाव नीमी आग्या कोटेव, हांग अच शांती देल जीवन जीऊसोद अदिक तान-तान क्याल्सा माळली अदिक तान-तान कय देल कमुसोद कोशिश माळी; 12ताकी व्हार्यावाळेर से आदर प्राप्त माळी, अदिक नीमी यातोदु वस्तु उन कमी आगबाळुल.

प्रभु उन दुबारा बरोद

13हे वार्टुरा अदिक आकतींगेरा, नाव चाहसालेव कि नीव आंदुर बारा दा जो सोतकु आर, अग्यानी ईरी; हिंग आगबाळुल कि नीव दुसरा अन घाई शोक माळी यारी आशा हैलेच. 14यतिकी अगर नाव विश्वास माळतेव कि यीशु सोत्‍तुन अदिक जित्‍ता भी आदुन, रा हांग अच परमेश्वर आंदरी भी जो यीशु मा विश्वास माळतेला सोत्‍तुर, यीशु उन सांगुळ जित्‍ता माळ्यान. 151यतिकी जो प्रभु नामी कलस्यान नाव प्रभु उन वचन इन अनुसार नीम से ईद अनतेव कि नाव जो जित्‍ता आयेव अदिक प्रभु उन बरासताका ताका उळ्दकु ईत्‍तेव, सोत्तुर देल मुंद वाळुसतीदिल. 16यतिकी प्रभु खुद अच स्वर्ग टु ईळदान; आ समय ललकार, अदिक प्रधान स्वर्गदूत उन शब्द केळ बंदीत, अदिक परमेश्वर उन तुरही उदकु आदीत; अदिक जो मसीह दा विश्वास माळतेला सोतार, आंदुर पयले जित्‍ता माळकु आदार. 17आग नाव जो जित्‍ता अदिक उळ्दकु ईत्‍तेव आंदुर सांगुळ बादलगोळ मा नेगुकु आदेव कि हवा दा प्रभु उन सांगुळ सिकुल; अदिक ईद रीति देल नाव हमेशा प्रभु उन सांगुळ ईत्‍तेव. 18ईद प्रकार इव मातगोळ देल आबुर दाबुरी प्रोत्साहित माळतोगी.