परमेश्वर उन वचन
१ कुरिन्थि 2
क्रूस मा येर्सकु आग्यान मसीह अन्द बारा दा बातणी
हे वार्टुरा अदिक आकतींगेरा, याग ना परमेश्वर उन रहस्यमय सच्चाई अदिक भेद केळ्सतेला नीम्द हात्ती बंदीन, रा आवाजगोळ या ग्यान इन उत्तमता अन्द सांगुळ बंदिदील. यतिकी ना ईद ठान्स कोंडीदिन कि नीम्द न्याड्या यीशु मसीह बल्की क्रूस मा येर्सकु आदुन मसीह अदिक आऊन मृत्यु इक बिटकु यातोदु अदिक मात इक जान्सतीदील. 1ना कमजोरी अदिक अंज्क इन सांगुळ, अदिक हापाळ नळ्गत-नळ्गत नीम हात्ती बंदीन; अदिक नान वचन, अदिक नान प्रचार दा ग्यान इक लूभावना मातगोळ ईला, बल्की आत्मा अदिक सामर्थ्य इन प्रमाण ईरोद, इदुरसाटी कि नीम्द विश्वास मंळसागोळ्द ग्यान मा ईला, लेकीन परमेश्वर उन सामर्थ्य मा निर्भर ईरूल.
परमेश्वर उन ग्यान
तरी भी जानकार लॉकुर दा नाव ग्यान केळ्सतेव; लेकीन ई दुनिया अन अदिक ई दुनिया अन नाश आगावाळेर शासकगोळ्द ग्यान ईला; लेकीन नाव परमेश्वर उन अद होचकु ग्यान, भेद इन रहस्य अन्द वर्णन माळतेव मतलब आ होचकु ग्यान इक यारी परमेश्वर दुनिया माळोद पयले टु ना नाम्द महिमा अन्द साटी ठहरूस्यान, यारी ई दुनिया अन शासकगोळ दा टु यारू जान्सीदिल, यतिकी अगर आंदुर जान्सायदुर रा महिमा माळावाळा प्रभु उक क्रूस मा ईला येर्सायदुर. लेकीन ह्यांग लिख्सकु आद,
“जो मात कण्णगोळ नोळीदील अदिक किवगोळ केळीदील,
अदिक जो मातगोळ मंळसा अन्द मगज दा तुमीदिल,
आंदुर अच उर जो परमेश्वर तान प्यार ईटावाळेर साटी तयार माळ्यान.”
लेकीन परमेश्वर आंदरी तान आत्मा अन्द द्वारा नाम मा प्रगट माळदुन, यतिकी आत्मा सप्पा मातगोळ, उलटा परमेश्वर उन रहस्यमय मातगोळ भी जाँच तान. मंळसागोळ दा टु याव यावारा मंळसा अन्द मातगोळी जान्सतान, सिर्फ मंळसा अन आत्मा जो आऊंदा आद? हांग अच परमेश्वर उन मातगोळ भी याऊ जान सकालुन, सिर्फ परमेश्वर उन आत्मा अच जान सकतद. लेकीन नामी दुनिया अन आत्मा ईला, लेकीन अद आत्मा सिक्याद जो परमेश्वर उन दी टु आद कि नाव आ मातगोळी जान्सेव जो परमेश्वर नामी कोटान.
यारी नाव मंळसागोळ्द ग्यान इन कल्सद मातगोळ दा ईला, लेकीन परमेश्वर उन आत्मा अन्द कल्सद मातगोळ मा, यारी परमेश्वर उन आत्मा आद आंदरी आत्मिक मातगोळ केळ्सतेव. जो मंळसा परमेश्वर उन आत्मा अन्द मातगोळी ग्रहण माळालुन, यतिकी अव आऊन नजर दा मूर्खता नव मातगोळ आव, अदिक ना आव आंदरी जान्स सकतान यतिकी आंदुर जाँच आत्मा अन्द रीति देल आगतद. यारी परमेश्वर उन आत्मा आद आव मंळसा सप्पा येनारा जाँच तान, लेकीन आव खुद यारदु से जाँच कु आगालुन. ह्यांग पवित्रशास्त्र दा लिख्सकु आद,
“याव जान्स सकतान प्रभु उन मन इक?
याव आऊक सलाह कोळ सकतान?”
लेकीन नाम दा मसीह अन्द मन आद.
Source notes (1)
- Cross-reference प्रेरितगोळ १८:९
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.