परमेश्वर उन वचन
१ कुरिन्थि 13
प्यार-सब से वळ्लीद हादी
अगर ना मंळसागोळ अदिक स्वर्गदूतगोळ्द भाषागोळ माताळाईन अदिक प्यार ईटालीन, रा ना ठनठनासकु पीतल इन धोळ घंटी अदिक झनझनासकु झाँझ हुईन. 1अदिक अगर ना परमेश्वर उन दी टु बरावाळा बातणी इन प्रचार माळ सकाईन, अदिक सब भेदगोळ अदिक सब प्रकार इन ग्यान इक समसाईन, अदिक नानी ईल ताका पुरा विश्वास आगेदीत कि ना पहाळगोळी सरकुस बुळाईन, लेकीन प्यार ईटालीन, रा ना येनु अच हैलेच. अगर ना तान पुरा धन संपत्ती कंगालगोळी तिन्स बुळाईन, या तान मय होताकोर साटी कोट बुळाईन, अदिक प्यार ईटालीन, रा नानी येनु अच लाभ हैलेच.
प्यार धीरजवन्त आद, अदिक कृपालु आद; प्यार जलन माळाल्द; प्यार तान बळाई माळाल्द, अदिक बायाल्द, अद अनरीति नळाल्द, अद तान भलाई चाहसाल्द, चिळुसाल्द, प्यार दुसरा अन्द बुरा मातगोळ लेखा ईटाल्द. अन्याय देल खुश आगाल्द, लेकीन सच्चाई देल खुश आगतद. आव सप्पा मातगोळ सहन माळतान, सप्पा मातगोळ मा विश्वास माळतान, सप्पा मातगोळ्द आशा ईटतान, सप्पा मातगोळ दा धीरज ईटतान.
प्यार यागलु खतम आगाल्द; परमेश्वर उन दी टु बरावाळा बातणी खतम आगेदव; अग्यात भाषागोळ दा सिक्कावाळा दान आगुल रा होगतेला ईत्तव; ग्यान आगुल, रा मिटसेदाव. यतिकी नाम्द ग्यान अधूरा आद, अदिक परमेश्वर उन दी टु बरावाळा बातणी अधूरा आद; लेकीन याग परमेश्वर सप्पा पुरा माळ्यान, रा अधूरा पन मिटसेदित.
याग ना चिग्द ईरीन, रा ना चिगदुरगोळ घाई माताळीन, चिगदुरगोळ घाई मन ईरोद, चिगदुर घाई समझ ईरोद; लेकीन याग समझदार आगेदीन रा स्यानपनी नव मातगोळ बिट बुटीन. ईग नामी आरसा दा धुँधला सा कांळ्सतद, लेकीन आ समय आमने सामने नोळेव; ई समय नांद ग्यान अधूरा आद, लेकीन आ समय हिंग पुरा रीति देल अराईन, ह्यांग नानी परमेश्वर अरतुन.
पर ईग विश्वास, आशा, प्यार ईव मुरू नाम सांगुळ आव, पर इऊर दा सब से धोळ्द प्यार आद.
Source notes (1)
- Cross-reference मत्ती १७:२०; २१:२१; मरकुस ११:२३
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.