१ कुरिन्थि 11

11

ह्यांग ना मसीह अन्द अनुकरण माळतीन, हांग अच नीव भी नांद अनुकरण माळी.

आराधना दा ताल्ला होच्चोद

2हे वार्टुरा अदिक आकतींगेरा, ना नीम्द बळाई माळतीन कि सप्पा मातगोळ दा नीव नानी याद माळतीर; अदिक जो शिक्षागोळ इक ना नीमी सौप्सदीन, अदुर्द पालन माळतीर. 3लेकीन ना चाहासतीन कि नीव ईद जान्स कोमी कि हर ऊंद गंळ्स उन ताल्ला मसीह हुन, अदिक आर्त इन ताल्ला गंळ्स हुन, अदिक मसीह अन्द ताल्ला परमेश्वर हुन. 4जो गंळ्स ताल्ला होचकु प्रार्थना या परमेश्वर उन दी टु बातणी कोळतान, आव तान ताल्ला अन्द अपमान माळतान. 5लेकीन जो आर्त ताल्ला तेरूकु प्रार्थना या परमेश्वर उन दी टु बातणी कोळतार, आक तान ताल्ला अन्द अपमान माळतार, यतिकी आक हिंग आर्त इन घाई आर आकिन ताल्ला मुंडन माळकु आग्याद. 6अगर आर्त ओढ़नी देल शेरग्या हाकालुर रा चुट्टी भी कळ्द बुळुल; अगर आर्त इन साटी चुट्टी कळसुसोद या मुंडन माळसुसोद शरम इन मात आद, रा ओढ़नी देल शेरग्या हाकुल. 7हा, गंळ्स उक तान ताल्ला होच्चोद बराबर ईलच, यतिकी आव परमेश्वर उन स्वरूप अदिक महिमा हुन; लेकीन आर्त रा गंळ्स उन महिमा हुळ. 8यतिकी गंळ्स आर्तेर देल आगीदील, लेकीन आर्त गंळ्स देल आग्यार; 9अदिक गंळ्स आर्त इन साटी माळकु आगीदील, लेकीन आर्त गंळ्स उन साटी माळकु आग्यार. 10ई कारण अदिक स्वर्गदूतगोळ्द कारण आर्त इक जरूरी आद कि अधिकार इन चिन्ह सम्सकु तान ताल्ला मा ईटुल. 11तरी भी, प्रभु दा एकता अन्द कारण, आर्त बिना गंळ्स उन अलग ईलच अदिक गंळ्स उन बिना आर्त अलग ईलच. 12यतिकी ह्यांग आर्त गंळ्स देल आर, हांग अच गंळ्स आर्त इन द्वारा जनम ताकोमतान; लेकीन सप्पा वस्तुगोळ परमेश्वर उन द्वारा बंदाद.

13नीव खुद अच बिचार माळी, येन आर्त इक बिना शेरग्या देल परमेश्वर से प्रार्थना माळोद शोभा कोळतद? 14येन स्वाभाविक रीति देल भी नीव जान्सालीर कि अगर गंळ्स ऊद्द चुट्टी ईटुल, रा आऊन साटी अपमान आद. 15लेकीन अगर आर्त ऊद्द चुट्टी ईरूल रा आक इक शोभा कोळतद यतिकी चुट्टी आक इक शेरग्या हाक्‍कोर साटी कोटकु आग्याव. 16लेकीन अगर यावारा झगळा माळोद चाहस्यान, रा ईद जान्स कोमुल कि ना नाम्द अदिक ना परमेश्वर उन मंडलीगोळ्द हिंग रीति आद.

प्रभु भोज इन बारा दा

(मत्ती २६:२६-२९; मरकुस १४:२२-२५; लूका २२:१४-२०)

17याग नीव परमेश्वर उन आराधना माळोर साटी जमा आगतीर. रा ईद आग्या कोळतेला ना नीम्द ईज्जत माळालीन, इदुरसाटी कि नीम जमा आगदुर देल भलाई आगाल्द, लेकीन नुसक्यान आगतद. 18यतिकी पयला रा ना ईद केळतीन, कि याग नीव मंडली दा जमा आगतीर रा नीम दा फूट बिळतद, अदिक ना ईदुर मा थ्वाळा-थ्वाळा विश्वास भी माळतीन. 19यतिकी गुटबन्दी भी नीम दा जरूरी ईतीदाद, इदुरसाटी कि जो लॉकुर नीम दा सही आर आंदुर प्रगट आगेगुल. 20इदुरसाटी नीव जो ऊंद जागा दा जमा आगतीर रा ईदुर मतलब प्रभु-भोज तिनोर साटी आल्लच, 21यतिकी तिनोद समय ऊंद मंळसा दुसरा मंळसा से पयला तान भोज तिन कोमतान, ई प्रकार यावारा रा हस्तकु ईरतान अदिक यावारा मस्त आगेगतान. 22येन तिनोद-कुडोद साटी नीम्द मान्ना हैलेच? या परमेश्वर उन मंडली अक तुच्छ जान्सतीर, अदिक यार्द हात्‍ती हैलेच आंदरी शर्मिंदा माळतीर? ना नीम से येन अनाईन? येन ई मात दा नीम्द प्रशंसा माळाईन? ईला, ना प्रशंसा माळालीन.

23यतिकी ईद शिक्षा नानी जो प्रभु दी टु सिक्त, अदिक ना नीम दी भी पहुचुस बुटीन कि प्रभु यीशु या ईळ्लक आव हुळसुस्कु आगीदुन, रोट्टी ताकोंडुन, 24अदिक परमेश्वर उन धन्यवाद माळकु अदरी मुरदुन अदिक अंदुन, “ईद नान शरीर हुन, जो नीम साटी कोटकु आग्याद: नांद याद साटी ईदा माळतेला ईरी.” 25ईदा रीति देल आव कटोरा भी हुळदुन अदिक अंदुन, “ईद कटोरा नांद खुन दा व्हाशोद वादा हुन: जब यागल्यारा कुडी, रा नांद याद साटी ईदा माळतेला ईरी.”

26यतिकी जब यागलु नीव ईद रोट्टी तीनतीर अदिक ई कटोरा दा टु कुडुतीर, रा प्रभु उन मृत्यु इक यागासताका आव बरालुन, प्रचार माळतेला ईरी. 27इदुरसाटी जो यावारा अनुचित रीति देल प्रभु उन रोट्टी तिनुल या आऊन कटोरा दा टु कुडुल, आव प्रभु उन मय अदिक खुन उन पापी ठहरूस्यान. 28इदुरसाटी मंळसा तान तान इक जाँच कोमुल अदिक ईदा रीति देल ई रोट्टी दा टु तिनुल, अदिक ई कटोरा दा टु कुडुल. 29यतिकी जो तिनोद-कुडोद समय प्रभु उन मय इक अरालुन, आव ई तिनोद अदिक कुडोर देल तान म्याकुच दण्ड तरतान. 30ईदा कारण नीम दा हापाळ सा निर्बल अदिक रोगी आर, अदिक हापाळ सा सोतोग्यार. 31अगर नाव तान तान इक जाँचायदेव रा दण्ड ईला सिकाईत. 32लेकीन प्रभु नामी दण्ड कोटकु नाम्द न्याय माळतान, इदुरसाटी कि नाव दुनिया अन सांगुळ दोषी ईला ठहरूसुल.

33इदुरसाटी, हे नांद वार्टुरा अदिक आकतींगेरा, याग नीव प्रभु भोज तिनोर साटी जमा आगतीर रा आबुर दाबुर साटी थाम्सी. 34अगर यावारा हस्तकु ईरूल रा तान मान्या तिनुल, यदुर देल नीम्द जमा आगोद दण्ड इन कारण आगबाळुल. मिकदव मातगोळी ना बंदकु वळ्लीद माळाईन.