Holiya Bible
लैव्यव्यवस्था 20
प्राणदण्ड इन योग्य अलग-अलग पापगोळ्द वर्णन
बाक यहोवा मूसा से अंदुन, “इस्राएलिगोळ से अन कि इस्राएलीगोळ दा टु, या इस्राएलीगोळ्द न्याड्या ईरावाळेर परदेशीगोळ दा टु, यावारा यती ईरबाळुल, जो तान यातोदारा औलाद इक मोलेक1 द्याव उक बलिदान माळुल आव निश्चय कोंदकु आगुल; अदिक जनता आऊन मा कल्लगोळ भिळुल. ना भी आ मंळसा अन्द विरूद्ध आगकु, आऊक आऊन लॉकुर दा टु ई कारण नाश माळाईन, कि आव तान औलाद मोलेक द्याव उक कोटकु नांद पवित्र जागा अक अशुद्ध माळदुन, अदिक नांद पवित्र हेसुर इक अपवित्र ठहरूसदुन. अदिक अगर यावारा तान औलाद मोलेक उक बलिदान माळुल, अदिक जनता आऊन बारा दा आनाकानी माळुल, अदिक आऊक कोंनबाळुल, आग रा ना खुद आ मंळसा अदिक आऊन घराना अन्द विरूद्ध आगकु आऊक अदिक यास मुंदुर आऊन हिंद आगकु मोलेक द्याव उन सांगुळ व्यभिचार माळुल आ सप्पा मुंदरी आंदुर लॉकुर्द न्याड्या दा टु नाश माळाईन.”
“बाक जो मंळसा इंद्रजालवाळा या भूत तुळकाळसावाळा अन्द दी तिर्गकु, अदिक आंदुर हिंद आगकु व्यभिचारी आगुल, आग ना आ मंळसा अन्द विरूद्ध आगकु आऊक आऊन लॉकुर्द न्याड्या दा टु नाश माळ बुळाईन.” इदुरसाटी नीव तान तान इक पवित्र माळी; अदिक पवित्र बन्सकु ईरी; यतिकी ना नीम्द परमेश्वर यहोवा हुईन. अदिक नीव नांद विधिगोळ इक मानसेतीर, अदिक अदुर पालन भी माळेतीर; यतिकी ना नीमी पवित्र माळावाळा यहोवा हुईन.
“यावारा यती न ईरबाळुल, जो तान आप्प या मोय इक सराप कोळुल आव निश्चय कोंदकु आगुल; आव तान आप्प या मोय इक सराप कोट्टुन, ई कारण आऊन रकत आऊन ताल्ला मा बिद्दीत.”
“बाक अगर यावारा मंळसा दुसरा अन आर्त इन सांगुळ व्यभिचार माळुल, रा याव यावारा दुसरा अन्द आर्त इन सांगुळ व्यभिचार माळीदान रा आव व्यभिचारी अदिक आक व्यभिचारिणी येढ्ढु मुंदुर निश्चित कोंदकु आगुल.” अगर यावारा तान मोय इन सांगुळ मिंगुल, आव तान आप्प उन ईज्जत उघळुसावाळा ठहरूस्यान; इदुरसाटी आंदुर येढ्ढु मुंदुर निश्चित कोंदकु आगुल, आंदुर खुन आंदुर्दा ताल्ला मा बिद्दीत. अगर यावारा तान सासा अन्द सांगुळ मिंगुल, रा आंदुर येढ्ढु मुंदुर निश्चित कोंदकु आगुल; यतिकी आंदुर उलटा क्याल्सा माळावाळेर ठहरूस्यार, अदिक आंदुर खुन आंदुर्दा ताल्ला मा बिद्दीत. अगर यावारा मंळसा यातारा दुसरा मंळसा अन सांगुळ बेकार क्याल्सा माळतान, जसा यातोरारा आर्त इन सांगुळ माळुल, रा आंदुर येढ्ढु घिनौना क्याल्सा माळावाळेर ठहरूस्यार; ई कारण आंदुर निश्चित कोंदकु आगुल, आंदुर खुन आंदुर्दा ताल्ला मा बिद्दीत. अगर यावारा तान हिंग्स अदिक तान आत्ता अक येढ्ढु मुंदरी ईट्टुल, रा ईद महापाप हुंद; इदुरसाटी आ गंळ्स अदिक आ आर्तेर मुरू चा मुरू मुंदुर बेक्की दा होत्ताकु आगुल, अदुर देल नीम्द न्याड्या दा महापाप आगबाळुल. बाक अगर यावारा गंळ्स पशु से संबंध माळतीदान, रा गंळ्स अदिक पशु येढ्ढु निश्चित कोंदकु आगुल. अगर याकारा आर्त पशु उन हात्ती होगकु अदुर सांगुळ कुकर्म माळुल, रा नी आ आर्त अदिक पशु येढ्ढु उक घात माळेत; आंदुर निश्चित कोंदकु आगुल, आंदुर खुन आंदुर्दा ताल्ला मा बिद्दीत.
“अगर यावारा तान आकतींग इक, चाहे आऊन सगा आकतींग ईरूल चाहे सौतेला आकतींग, आकीन ऊगळा मय नोळुल, अदिक आऊन आकतींग भी आऊन ऊगळा मय नोळुल रा ईद नाच्कवाळा मात हुंद, आंदुर येढ्ढु तान जातीनोर वार्टुर्द कण्णगोळ मुंद नाश माळकु आगुल; यतिकी जो तान आकतींग इन मय ऊगुळसावाळा ठहरूस्यान आऊक तान दुष्कर्म अन्द भार खुद नेग्गोद बिद्दीत.” बाक अगर यावारा गंळ्स याकारा ऋतुमती आर्त इन सांगुळ मिंगकु आकीन मय ऊगुळस्यान, रा आ गंळ्स आकीन रूधिर इन सोता अक ऊगळुसावाळा ठहरूस्यान, अदिक आ आर्त तान रूधिर इन सोता अक ऊगुळ्सावळ्त ठहरूस्यार; ई कारण आंदुर येढ्ढु मुंदुर तान लॉकुर्द न्याड्या दा टु नाश माळकु आगुल.
तान मावसी या फुफी इन मय ऊगळुस बाळेतीर, यतिकी जो अदरी ऊगुळस्यान तान हात्तीगोळोर रिश्तेदारगोळ इक नंगा माळतान; इदुरसाटी इंदरी येढ्ढु मुंदरी तान दुष्कर्म अन्द भार नेग्गोद बिद्दीत. अगर यावारा तान काकी इन सांगुळ मिंगुल, रा आव तान काका अन्द ईज्जत ऊगुळसावाळा ठहरूस्यान; इदुरसाटी आंदुर येढ्ढु मुंदुर तान पाप इन भार इक नेगुतेला निर्वंश सोतोदार. अगर यावारा तान भाभी इक तान हिंग्स माळुल, रा इदरी घिनौना क्याल्सा जान्सेतीर; अदिक आव तान वार्ट उन ईज्जत ऊगुळसावाळा ठहरूस्यान, ई कारण आंदुर येढ्ढु मुंदुर बिना औलाद देल ईत्तार.
“नीव नांद सप्पा विधिगोळ अदिक नांद सप्पा नियमगोळ इक समझ इन सांगुळ मानसेतीर; इदुर देल ईद आगबाळुल कि या द्याश दा ना नीमी ओयेतीन अद नीमी भिट्ट बुळुल. अदिक या राज्य अन लॉकुर इक ना नीम्द मुंद टु तेगुतीन आंदुर्द रीती-रस्म मा नळुबाळेतीर; यतिकी आ लॉकुर जो ईव सप्पा कुकर्म माळदुर, ईदा कारण नानी आंदुर से घृणा आगेग्याद. पर ना नीव लॉकुर से अनतीन कि नीव रा आंदुर्द भूमि इन अधिकारी आदीर, अदिक ना ई द्याश इक यदुर्दा हाल अदिक शयद इन धारागोळ वाहुसताव नीम्द अधिकार दा माळ बुळाईन; ना नीम्द परमेश्वर यहोवा हुईन याव नीमी अन्य द्याशगोळ्द लॉकुर से अलग माळदुन. ई कारण नीव शुद्ध अदिक अशुद्ध पशुगोळ दा, अदिक शुद्ध अदिक अशुद्ध पक्षिगोळ दा भेद माळोद; अदिक यातोदारा पशु या पक्षी या यातोदारा प्रकार इन भूमी मा रेंगसावाळा जीवजन्तु यती आगबाळुल, यारी ना नीम्द साटी अशुद्ध ठहरूसकु वर्जित माळदीन, अदुर देल खुद इक अशुद्ध माळबाळेतीर. नीव नान साटी पवित्र बन्सकु ईरेतीर; यतिकी ना यहोवा खुद पवित्र आईन, अदिक ना नीम इक अदिक द्याशगोळ्द लॉकुर से इदुरसाटी अलग माळदीन कि नीव हमेशा नांद अच बन्सकु ईरी.
“अगर यावारा गंळ्स या आर्त इंद्रजालवाळा या भूत इन साधना माळुल, रा आव निश्चित कोंदकु आगुल; हिंग मंळसागोळ मा कल्लगोळ भिटकु आगुल, आंदुर खुन आंदुर्दा ताल्ला मा बिद्दीत.”
Source notes (1)
- Footnote कनानीगोळ्द द्वारा पुजनीय द्याव
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.