Holiya Bible
यहोशू 12
मूसा अन द्वारा राजागोळ मा विजय
यरदन गांगा अन आप्पाटी सुर्योदय दी, मतलब अर्नोन घाटी टु हुडुकु हेर्मोन पर्वत ताका द्याश, अदिक सप्पा पुर्वी अराबा अन या राजागोळी इस्राएलगोळ कोंदकु आदुर आ द्याश इक आंदुर तान अधिकार दा माळ कोंडीदुर अव ईव हुव; एमोरियो नव हेशबोनवासी राजा सीहोन, जो अर्नोन घाटी इन बीच इन नगर इक बिटकु यब्बोक गांगा ताका, जो अम्मोनीगोळ्द सीमा आद, आरधा गिलाद मा, अदिक किन्नेरेत हेसुर इन क्यार्रा टु हुडुकु बेत्यशीमोत टु आगकु अराबा अन क्यार्रा ताका, जो खारा समुद्र भी कहलुसतद, पूर्व अन दीकळोद अराबा, अदिक दक्षिण इन दी पिसगा अन ढलान इन ल्यालमा अन द्याश मा प्रभुता ईटतान. बाक मीग्दव रपाईयो नगर दा टु बाशान इन राजा ओग इन द्याश ईरोद, जो अश्तारोत नगर अदिक एद्रेई नगर दा ईरतोगोन, अदिक हेर्मोन पर्वत सल्का, अदिक गशूरीगोळ, अदिक माकिगोळ्द सीमा ताका कुल बाशान दा, अदिक हेशबोन इन राजा सीहोन इन सीमा ताका आरदा गिलाद दा भी शासन माळतोगोन. इस्त्राएलगोळ अदिक यहोवा अन दास मूसा ईंदरी कोंद बुट्टुन; अदिक यहोवा अन दास मूसा आंदुर्द द्याश रूबेनिगोळ अदिक गादीगोळ अदिक मनश्शे अन आरधा गोत्र अन लॉकुरी कोट्ट बुट्टुन.
यहोशू द्वारा राजागोळ मा विजय
यरदन इन पश्चिम इन दी, लबानोन इन मैदान दाकळोद बालगाद नगर टु हुडुकु सेईर इन ऊचाई इन हालाक पहाळी ताका द्याश इन याता राजागोळी यहोशू अदिक इस्त्राएलगोळ कोंदकु आंदुर द्याश इस्त्राएल उन गोत्र अदिक कुलगोळ अनुसार भाग माळकु कोटीदुन अव ईव हुव हित्ती, अदिक एमोरी, अदिक कनानी, अदिक परिज्जी, अदिक हिब्बी, अदिक यबूसी, जो पहाळी द्याश दा, अदिक ल्यालमागोळ द्याश दा, अदिक अराबा दा, अदिक उतार द्याश दा अदिक आळी दा, अदिक दक्षिणी द्याश दा ईरतोगोर. ऊंद यरीहो अन राजा; ऊंद बेतेल इन हाती आई नगर इन राजा; ऊंद यरूशलेम उन राजा; ऊंद हेब्रोन उन राजा; ऊंद, यर्मूत इन राजा; ऊंद, लाकीश उन राजा; ऊंद, एग्लोन उन राजा; ऊंद, गेजेर उन राजा; ऊंद, दबीर उन राजा; ऊंद, गेदेर उन राजा; ऊंद, होर्मा अन राजा; ऊंद, अराद उन राजा; ऊंद, लिब्ना अन राजा; ऊंद अदुल्लाम उन राजा; ऊंद, मक्केदा अन राजा; ऊंद बेतेल उन राजा; ऊंद, तप्पूह अन राजा; ऊंद हेपेर उन राजा; ऊंद अपेक उन राजा; ऊंद, लश्शारोन उन राजा; ऊंद मादोन उन राजा; ऊंद, हासोर उन राजा; ऊंद, शिम्रोन्मरोन उन राजा; ऊंद, अक्षाप उन राजा; ऊंद तानाक उन राजा; ऊंद, मगिद्दो अन राजा; ऊंद, केदेश उन राजा; ऊंद, कर्मेल दा योकनाम उन राजा; ऊंद, दोर हेसुर ईनव धोळ्द द्याश इन दोर इन राजा, ऊंद, गिलगाल इन गोयीन इन राजा; अदिक ऊंद तिर्सा अन राजा; ई प्रकार सप्पा राजा इकतीस आदुर.
Source notes (1)
- Cross-reference गिनती 21:21-35; व्यवस्थाविवरण 2:26; 3:11
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.