Holiya Bible
याकूब 4
नीम दा लळाई झगळागोळ यल टु होटबंदव? येन ईद नीम इच्छागोळ देल आगाल्द जो नीम मय दा लळाई-झगळा माळताव? नीव चाहासतीर, लेकीन नीमी सिकाल; इदुरसाटी नीव हत्या माळतीर. नीव पुरा रीति देल इच्छा ईटतीर, अदिक येनु हासिल माळ सकालीर; इदुरसाटी नीव लळाई अदिक झगळा माळतीर. जो नीव चाहासतीर नीमी सिकाल यतिकी नीव परमेश्वर से बेळालीर. नीव बेळतीर लेकीन नीमी सिकाल, इदुरसाटी कि बेकार इच्छा माळकु बेळतीर, कि तान भोग-विलास दा हार्स बुळी. हे विश्वासहीन लॉकुरा, येन नीव जान्सालीर कि दुनिया से संगीपना माळोद परमेश्वर से दुश्मनी माळोद हुन? जो यावारा दुनिया अन्द संगी आगोद चाहासतान, आव तान तान इक परमेश्वर उन दुश्मन माळतान. येन नीव ईद सम्सतीर कि पवित्रशास्त्र बेकार अनतद, “याता आत्मा अक आव नाम बुळ्क घळुस्यान, येन अद हिंग लालसा माळतद यदुर्द प्रतिफल इर्ष्या आगुल?” आव रा मात्त यक्कुल अनुग्रह कोळतान; ई कारण ईद शास्त्र दा लिख्सकु आद, “परमेश्वर अभिमानीगोळ्द विरोध माळतान लेकीन गरीबगोळ मा अनुग्रह माळतान.” इदुरसाटी परमेश्वर उन हात्ती आगेगी; अदिक शैतान उन सामना माळी, रा अद नीम्द हात्ती टु ओळकु होदित. परमेश्वर उन हात्ती बरी रा आव भी नीम्द हात्ती बंदान. हे पापीगोळा, तान कय तोळ कोमी; अदिक हे पाखंडी लॉकुरा, तान मन इक शुद्ध माळी. दुखी आगी, अदिक शोक माळी, अदिक वर्ली. नीम्द नेग्गोद शोक दा, अदिक नीम्द खुशी उदासी दा बदलुसुल. प्रभु उन मुंद नम्र बन्सी रा आव नीमी म्याकुच नेगदान.
हे वार्टुरा अदिक आकतींगेरा, आबुर दाबुर अपमान माळबाळी. जो तान मसीह वार्ट उन अपमान माळतान या मसीह वार्टुन मा दोष हचतान, आव व्यवस्था अन्द अपमान माळतान अदिक व्यवस्था मा दोष हचतान; अदिक अगर नी व्यवस्था मा दोष हचत्या, रा नी व्यवस्था मा नळावाळा ईला पर अदुर मा न्याय माळावाळा ठहरुस्द. व्यवस्था कोळावाळा अदिक न्याय माळावाळा रा ऊंद अच परमेश्वर आन, आव आबना अच ऊळ्स सकतान या नाश माळ सकतान. नीव याव आगतीर तान मान्ना हातळोर न्याय माळावाळेर?
केळी, नीव जो ईद अनतीर, “ईंद या नाळ नाव यातोदारा अदिक नगर दा होगकु अल ऊंद वर्ष बितुसेव, अदिक व्यापार माळकु पैस्या कमुसेव.” अदिक ईद जान्सालेव कि नाळ येन आदीत. केळ रा कोमी, नीम्द जीवन आद अच येन? नीव रा भाप इन घाई आईर, जो घळीतीम कांळ्सतद बाक गायब आगेगतद. इदुर उलटा नीमी ईद अनली पायजे, “अगर प्रभु चाहास्यान रा नाव जित्ता ईत्तेव, अदिक ईद क्याल्सा या अद क्याल्सा भी माळेव.” लेकीन ईग नीव तान डींग होडुतीर अदिक घमण्ड माळतीर; हिंग सप्पा घमण्ड बेकार आगतद.
इदुरसाटी जो यावारा भलाई माळोद जान्सतान लेकीन माळालुन, आव पाप इन दोषी आन.
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.