Holiya Bible
सभोपदेशक 11
बुद्धिमान मंळसा अन आचरण
नेकी माळ अदिक दरिया दा हाक्क, हापाळ दिनगोळ बाद्दा भी नी प्रतिफल प्राप्त माळ सकत्या. येळ, ईला येठ्ठ मंळसागोळ इक भाग कोळी, यतिकी नी जानसाल्द, कि ई पृथ्वी दा याग नीन मा विपत्ति होट बरूल. अगर बादल नीर देल तुमकु आव, रा अव खुद भूमी मा बरसुस्याव. चाहे मार्र दक्षिण इन दी बिळुल, चाहे अव उत्तर इन दी बिळुल, अव या जागा मा बिदकु आव, अव अल्या बिदकु ईत्ताव. जो किसान हवा अक ताक्सतान, आव बींजा बोऊस सकालुन, जो बादल इन अच विचार माळतान, आव फसल कडु सकालुन. जसा नीव जानसालीर कि गर्भवती इन व्हाट्टा अन चिग्द दा जीव ह्यांग बिळतद, हांग अच नीव परमेश्वर उन क्याल्सागोळ इन सम्स सकालीर, जो सप्पा मुंदरी माळतान. प्रांत: काल दा तान बींजा बोऊसोद शुरू माळी, अदिक द्यावगा भी तान कय रोक्स बाळी, अदिक क्याल्सा माळतेला ईरी, यतिकी नीव जानसालीर कि नीम इक याता क्याल्सा दा सफलता सिक्कीत ई क्याल्सा दा या आ क्याल्सा दा, या येढ्ढु दा.
सूर्य अन्द प्रकाश प्रिय हततद, बिसुल कण्णगोळ इक सुख पहुचुसतद. अगर मंळसा हापाळ वर्ष ताका जीत्ता ईरतान रा आऊक चाहास पायजे कि आव तान उमर इन सप्पा वर्षगोळ दा जीवन इन आनन्द ताकोमुल, लेकीन आव याद ईटुल कि अंधकार इन दिन भी कम आगतीदील. अत: जो येनारा आगतद, अद व्यर्थ आद.
हारोदव उक सलाह
ओ हारोदवा, तान जवानी तीम आनन्द मनुस, तान जवानी इन दिनगोळ दा तान दिल आनन्द देल तुम कोमुल. या हादी मा नीन दिल नीन इक ओईल, जो हादी नीन कण्णगोळ दा उचित हतुल, अदुर मा नळु. लेकीन ईद मात जान्स कोमुल, नीन सप्पा क्याल्सागोळ्द बारा दा स्पष्टीकरण इन साटी परमेश्वर नीन इक कटघरा दा नीदरूस्यान. ओ हारोदवा! तान दिल टु परेशानी इक तेगुबुळ, मय दा दुख आगगोळ बाळ; यतिकी नीन हारोदपण, अदिक बचपन येढ्ढु व्यर्थ आव.
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.