Solomona 9

1KUKULU ae la ka naauao i kona hale, Kalai iho la oia i kona mau kia ehiku.

2Kalua oia i kana mau mea momona; Kawili ae la oia i kona waina; Hoomakaukau no i kana papaaina.

3Hoouna aku la oia i kana poe kauwawahine, E hea aku maluna o na wahi kiekie o ke kulanakauhale,

4Owai ka mea naaupo? e huli mai ia io'u nei: I ka mea noonoo ole hoi, olelo ae la oia ia ia,

5Ina, e ai mai oukou i ka'u berena, E inu hoi i ka waina a'u i kawili ai.

6E haalele i ka poe manao ole, i ola oukou, E hele hoi ma ke ala o ka naauao.

7O ka mea e ao aku i ke kanaka aia, E loaa ia ia ka hilahila; O ka mea e ao aku i ka mea hewa, e loaa ia ia ka palahea.

8Mai ao aku i ke kanaka aia, O hoowahawaha mai oia ia oe; E ao aku i ka mea naauao, A e aloha mai oia ia oe.

9E haawi na ka mea naauao, A e oi mau ka naauao; E ao hoi i ka mea hoopono, A e mahuahua ae la kona ike.

10O ka mole o ka naauao, Oia ka makau ia Iehova; O ka ike i ka Mea hemolele, Oia ka noonoo ana,

11No ka mea, ma o'u nei, e mahuahua ae ai kou mau la, A e nui ai hoi na makahiki o kou ola ana.

12Ina e naauao oe, e naauao no oe nou iho; Ina e hoowahawaha oe, maluna ou wale no ia mea.

13O ka wahine naaupo, he walaau kona; Ua manao ole, aole oia i ike i kekahi mea.

14Noho no oia ma ka puka o kona hale, Ma ka noho hoi ma kahi kiekie o ke kulanakauhale,

15E hea aku i ka poe hele ma ke ala, Ka poe hele pololei ma ke alanui;

16Owai ka mea manao ole? e huli mai i o'u nei; I ka mea naaupo, olelo aku la oia ia ia,

17Ua ono no na wai i aihueia, Ua mananalo hoi ka berena ke ai malu.

18Aole nae i ike kela, malaila ka poe make, Aia kona poe hoaai ilalo loa i ka malu make.