Isaia 6

1I KA makahiki i make ai ke alii, o Uzia, ike aku la au i ka Haku, e noho ana ma ka nohoalii kiekie, i hapaiia, a piha ka luakini i kona hua lole.

2Ku mai la maluna, ma o na la, na Serapima; he paono, he paono na eheu ia lakou a pau. Me na mea elua ia i uhi ai i kona maka, me na mea elua ia i uhi ai i kona mau wawae, a me na mea elua ia i lele ai.

3A hea ae la kekahi i kekahi, Ihiihi, ihiihi, ihiihi no o Iehova o na kaua. Ua piha ka honua i kona nani.

4Haalulu na paepaepuka, i ka leo o ka mea nana i hea, a piha iho la ka hale i ka uwahi.

5Alaila, olelo iho la au, Auwe au! ua make au; no ka mea, he kanaka lehelehe haumia au, a ke noho nei au iwaena o ka lahuikanaka lehelehe haumia; no ka mea, na ike ko'u mau maka i ke alii, ia Iehova o na kaua.

6A lele mai la kekahi o na Serapima io'u nei, aia ma kona lima ka pohaku enaena, ana i lawe ai, mai ke kuahu mai, me na upa ahi.

7A hoopa mai la ma kuu waha, i mai la, Aia hoi, ua hoopa keia ma kou mau lehelehe, ua laweia kou hewa, ua kalaia kou hala.

8A lohe iho la no hoi au i ka leo o ka Haku, i ka i ana mai, Iawai la wau e hoouna aku ai? A owai ka mea nana e hele no kakou? Alaila, i aku la au, Eia no wau, e hoouna ia'u.

9I mai la ia, O hele, e olelo aku i keia poe kanaka,

I ka lohe ana, e lohe no oukou, aole nae e hoomaopopo,

I ka ike ana, e ike no, aole nae e akaka ka ike ana.

10E hoopalaka i ka naau o keia poe kanaka,

E hookuli i ko lakou pepeiao,

A e hoopaa i ko lakou maka;

O ike ko lakou mau maka,

A lohe hoi ko lakou mau pepeiao,

A hoomaopopo ko lakou naau,

A huli lakou, a hoolaia mai lakou.

11Alaila, i aku la au, E ka Haku, pehea ka loihi?

I mai la ia, A neoneo na kulanakauhale, aohe mea noho iloko,

A kanaka ole ko lakou hale,

A anai loa ia'ku ka aina,

12A lawe loihi aku o Iehova i na kanaka,

A mahuahua ka olohelohe ana mawaenakonu o ka aina;

13Ina i koe kekahi hapaumi o na mea,

E anai loa ia'ku no ia.

Aka, e like me ka laau hukaa, a me ka oka,

I ka wa i kuaia, ua koe no ke kumu;

Pela no e lilo ai kekahi mamo hemolele,

I kumu hoolaha no lakou.