Haryanvi Bible
सपन्याह 2
हे बेशर्म जात के माणसों, कठ्ठे हो! इसतै पैहल्या के सजा का हुकम पूरा हो अर बचाव का दिन भूसी की तरियां लिकड़ै, अर यहोवा का भड़कदा होया छो थारे पै आण पड़ै, अर यहोवा के छो का दिन थारे पै आवै, थम कठ्ठे हो। हे धरती के सारे नम्र माणसों, हे यहोवा के नियम नै मान्नण आळेयो, उसनै ढूँढ़दे रहो; धार्मिकता तै ढूँढ़ो, नम्रता तै ढूँढ़ो; हो सकै सै थम यहोवा के छो कै दिन म्ह शरण पाओ।
क्यूँके गाज़ा शहर तो निर्जन अर अश्कलोन शहर उजाड़ हो जावैगा; अश्दोद शहर के बासिन्दे दिन-दोफारी लिकाड़ दिए जावैंगे, अर एक्रोन शहर उखाड़या जावैगा।
समुन्दर तट के रहण आळयां पै हाय; करेती1 जात पै हाय; हे कनान, हे पलिश्तियाँ के देश, यहोवा का वचन तेरै खिलाफ सै; अर मै तेरे ताहीं इसा नाश करुँगा के तेरै म्ह कोए न्ही बचैगा। अर उसे समुन्दर तट पै पाळीयाँ के घर होवैंगें अर बाड़याँ समेत चराई ए चराई होवैगी। यानिके वोए समुन्दर तट यहूदा के घरान्ने के बचे होया नै मिलैगा, वे उसपै चरावैंगे; वे अश्कलोन के छोड्डे होए घरां म्ह साँझ ताहीं बोहड़ैगें, क्यूँके उनका परमेसवर यहोवा उनकी सुधि लेकै उनकी समृद्धि नै लौटा ले जावैगा।
“मोआब नै जो मेरी प्रजा की बदनाम्मी अर अम्मोनियाँ नै जो उसकी निन्दा करकै उसके देश की हद पै चढ़ाई करी, वो मेरे कान्नां ताहीं पोहची सै।” इस करकै इस्राएल के परमेसवर, सेनाओं के यहोवा की या वाणी सै, “मेरे जीवन की कसम, जरुर मोआब सदोम2 की तरियां, अर अम्मोनी गमोरा की तरियां बिच्छु दरखत्तां की जगहां अर नूण की खान हो जावैंगे, अर सदा उजड़े रहवैंगे। मेरी प्रजा के बचे होए उननै लूटैंगे, अर मेरी जात्ति के बाकी माणस उननै अपणे हिस्से म्ह पावैंगें।” यो उनके गर्व का बदला होगा, क्यूँके उननै सेनाओं के यहोवा की प्रजा की बदनाम्मी करी, अर उसपै बड़ाई मारी सै। यहोवा उननै डरावणा दिखाई देवैगा3, वो धरती भर के देवत्यां नै भूखा मार देगा, अर जात्ति-जात्ति के सारे द्वीपां के बासिन्दे अपणी-अपणी जगहां तै उस ताहीं दण्डवत करैगें।
हे कूशियों4, थम भी मेरी तलवार तै मारे जाओगे। वो5 अपणा हाथ उत्तर दिशा की और बढ़ाकै अश्शूर के देश नै नाश करैगा, अर नीनवे की राजधानी ताहीं उजाड़ कै जंगळ की तरियां निर्जल कर देवैगा। शहर कै बीच म्ह सारी ढाळ के जंगळी-पशु झुण्ड के झुण्ड बैठेंगे; उसके खम्भ्यां की कँगणियाँ पै धनेश अर साही दोन्नु रात नै बसेरा करैंगे अर उसकी खिड़कियाँ म्ह बोल्या करैंगे; उसकी देहळी सून्नी पड़ी रहवैंगी, अर देवदार की लाकड़ी उघाड़ी जावैगी। या वाए नीनवे का नगर सै जो मगन रहया करदी अर निडर बैठ्ठी रहवै थी, अर सोच्चै थी के मै ए सूं, अर मेरे ताहीं छोड़ और कोए सै ए न्ही। पर इब या उजाड़ अर जंगळी-पशुआं के बैठण की जगहां बणगी सै, उरै ताहीं के जो कोए इसकै धोरै होकै चाल्लै, वो ताळी बजावैगा अर हाथ हिलावैगा।
Source notes (5)
- Footnote करेती पलिश्तियाँ माणसां की एक जात सै।
- Footnote परमेसवर नै सदोम अर अमोरा नै ज्वालामुखी की तरियां फटण आळी चीज तै नाश करया क्यूँके उननै बुराई करी थी। ( उत्प. 19:23-29)
- Footnote यहोवा उननै डरावणा दिखाई देवैगा यानिके यहोवा के न्यायोचित सजा की घटनावां जरिये मोआब अर अम्मोन पै।
- Footnote इस पद म्ह कूशी 25 वे राजवंश (ईसा पूर्व) तै मिस्री माणसां खात्तर खड़े होवैंगे अर सिंहासन कूशियाँ कै जरिये ले लिया गया होगा। इस भविष्यवाणी तै तीस साल पैहला ही उनका राज खतम होग्या था।
- Footnote इतिहास कै मुताबिक 612 ईसा पूर्व म्ह मिद्दियाँ अर बाबेलवासियाँ नै नीनवे पै कब्जा कर लिया था। हो सकै सै के सपन्याह इस भविष्यवाणी नै पूरा होन्दे देखण खात्तर जिन्दा रह्या होवैगा। नहूम की किताब म्ह इस आनन्द नै दिखाया गया सै जिस म्ह नीनवे के गिरण की खबर पै अश्शूरी राज के जरिये सताव दिखाया गया सै। वो शहर पूरी तरियां खतम हो गया था जिब यात्री जेनोफोन 401 ईसा पूर्व म्ह आया था पर उसनै इसका कोए सबूत ना मिल्या।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.