Haryanvi Bible
भजन संहिता 9
जीत कै खात्तर धन्यवाद
प्रधान बजाण आळे कै खात्तर मुतलबैयन की राग पै दाऊद का भजन
हे यहोवा परमेसवर मै अपणे पूरे मन तै तेरा धन्यवाद करुँगा;
मै तेरे सारे अचम्भे के काम्मां का जिक्र करुँगा।
मै तेरे कारण राज्जी अर फुल्या न्ही समाऊँगा,
हे परमप्रधान, मै तेरे नाम का भजन गाऊँगा।
मेरे दुश्मन हार कै पाच्छै हटै सै,
वे तेरे स्याम्ही ठोक्कर खाकै नाश होवै सै।
तन्नै मेरे मुकद्दमें का न्याय मेरे हक म्ह करया सै;
तन्नै सिंहासन पै विराजमान हो कै धार्मिकता तै न्याय करया।
तन्नै जात्ति-जात्ति ताहीं झिड़क्या अर दुष्ट का नाश करया सै;
तन्नै उनका नाम सदा काल खात्तर मिटा दिया सै।
दुश्मन अनन्त काल ताहीं उजड़ लिये सै;
उनके नगरां ताहीं तन्नै ढ़ा दिया,
अर उनका नामो-निशान भी मिट ग्या सै।
पर यहोवा सदा सिंहासन पै विराजमान सै,
उसनै अपणा सिंहासन न्याय खात्तर सिध्द करया सै।
अर वो आप्पे दुनिया का न्याय धर्म तै करैगा;
वो देश-देश के माणसां का मुकद्दमा खराई तै निपटावैगा।
यहोवा पईसे होया खात्तर ऊँच्चा गढ़ ठहरैगा,
वो मुसीबत के बखत म्ह भी ऊँच्चा गढ़ ठहरैगा।
अर तेरे नाम के जाणण आळे तेरे पै भरोस्सा राक्खैंगें;
क्यूँके हे यहोवा जो तन्नै टोहवै सै उननै तू त्यागै कोन्या।
यहोवा जो सिय्योन म्ह विराजमान सै, उसका भजन गाओ!
जात्ति-जात्ति के माणसां म्ह उसके बड़े-बड़े काम्मां का प्रचार करो!
क्यूँके खून का पलटा लेण आळा उसनै याद करै सै;
वो पिसे होए माणसां की दुहाई नै न्ही भूलदा।
हे यहोवा, मेरै पै दया कर। देख, मेरे बैरी मेरे पै जुल्म करण लागरे सै,
तू ए मन्नै मौत के दरबाजे तै बचा सकै सै।
ताके मै सिय्योन के दरवाज्यां कै धोरै तेरे सारे गुणा का जिक्र करुँ,
अर तेरे करे होए उद्धार तै मगन होऊँ।
दुसरी जात आळयां नै जो खड्डा खोद्या था, उस्से म्ह वे आप गिरगे;
जो जाळ उननै लगाया था, उन म्ह उनका ए पैर फँस ग्या।
यहोवा नै अपणे-आप ताहीं उजागर करया, उसनै न्याय करया सै;
दुष्ट अपणे करे होए काम्मां म्ह फँस जावै सै। (सेला)
दुष्ट अधोलोक म्ह चले जावैंगे,
अर वे सारी जात भी जो परमेसवर नै भूल जावै सै।
क्यूँके दरिन्द्र माणस अनन्त काल तक बिसरे होए न्ही रहवैंगे,
अर ना ए नम्र माणसां की आस सदा खात्तर नाश होवैगी।
उठ, हे परमेसवर, माणस हावी ना होण पावै!
जातियाँ का न्याय तेरे स्याम्ही करया जावै।
हे यहोवा, उनकै डर बिठा!
जातियाँ अपणे आप नै सिर्फ माणस ए जाणै। (सेला)
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.