Haryanvi Bible
भजन संहिता 40:1
Verse 1 is marked below, with the whole chapter around it. Read from the start
स्तुति का एक गीत
प्रधान बजाण आळे खात्तर दाऊद का भजन
मै धीरज धरकै यहोवा की बाट देखदा रह्या;
अर उसनै मेरी ओड़ झुककै मेरी दुहाई सुणी।
उसनै मेरै ताहीं सत्यानाश के खड्डे
अर दलदल की गार म्ह तै लिकाड्या,
अर मेरे ताहीं चट्टान पै खड्या करकै
मेरे पैरां ताहीं मजबूत करया सै।
उसनै मेरै ताहीं एक नया गीत सिखाया
जो म्हारे परमेसवर की स्तुति का सै।
घणखरे लोग यो देक्खैंगे अर उसकी महिमा करैंगे,
अर यहोवा पै भरोस्सा राक्खैंगे।
कितना धन्य सै वो माणस,
जो यहोवा पै भरोस्सा करै सै,
अर अभिमानियाँ1 अर झूठ्या की
ओड़ मुड़ण आळयां की ओड़ मुँह न्ही फेरदा हो।
हे मेरे परमेसवर यहोवा, तन्नै भोत-से काम करे सै!
जो अचम्भे काम अर कल्पना तू म्हारै खात्तर करै सै
वे घणीए सै; तेरै बराबर कोए कोन्या!
मै तो चाहूँ सूं के दिल खोल कै उनकी चर्चा करुँ,
पर उनकी गिणती न्ही हो सकदी।
मेलबलि अर अन्नबलि तै तू खुश न्ही होन्दा
तन्नै मेरे कान खोल्ले सै।
होमबलि अर पापबलि तन्नै न्ही चाहिए।
फेर मन्नै कह्या,
“देख, मै आया सूं; क्यूँके इस किताब म्ह
मेरै बारै म्ह इसाए लिख्या होया सै।
हे परमेसवर,
मै तेरी इच्छा पूरी करण तै राज्जी सूं;
अर तेरे नियम-कायदे मेरे भित्तर म्ह बसे सै।”
मन्नै बड़ी सभा म्ह धार्मिकता के शुभ समाचार का प्रचार करया सै;
देख, मन्नै अपणा मुँह बन्द न्ही करया, हे यहोवा,
तू इस ताहीं जाणै सै।
मन्नै तेरी धार्मिकता मन म्ह ए न्ही राक्खी;
मन्नै तेरी सच्चाई
अर तेरे करे होए उद्धार की चर्चा करी सै;
मन्नै तेरी करुणा अर सच्चाई बड़ी सभा तै गुप्त न्ही राक्खी।
हे यहोवा, तू भी अपणी बड़ी दया मेरे पै तै ना हटावै,
तेरी करुणा अर सच्चाई तै हमेशा
मेरी हिफाजत होन्दी रहवै!
क्यूँके मै अनगिणत बुराईयाँ तै घिरया होया सूं;
मेरे अधर्म के काम्मां नै मेरे ताहीं पकड़ लिया सै
अर मै निगांह न्ही ठा सकदा;
वे गिणती म्ह मेरे सिर के बाळां तै भी घणे सै;
इस करकै मेरा मन टूट ग्या।
हे यहोवा, कृपा करकै मन्नै छुड़ाले!
हे यहोवा, मेरी मदद खात्तर फुर्ती कर!
जो मेरी जान के प्यासे सै,
वे सारे शर्मसार हो; अर उनके मुँह काळे हों
अर वे पाच्छै हटाए अर निरादर करे जावै
जो मेरे नुकसान तै राज्जी होवै सै।
जो मेरे तै, “आहा, आहा,” कहवै सै,
वे अपणी शर्म के मारे अचम्भित हों।
पर जितने तन्नै ढूँढ़ै सै,
वे सब तेरे कारण खुश
अर आनन्दित हों; जो तेरा करया होया उद्धार चाहवै सै,
वे सदा कहन्दे रह, “यहोवा की बड़ाई हो!”
मै तो दीन अर दरिद्र सूं,
तोभी प्रभु मेरी चिन्ता करै सै।
तू मेरा मददगार अर छुड़ाण आळा सै;
हे मेरे परमेसवर देर ना कर।
Source notes (1)
- Footnote अभिमानियाँ मूर्तियाँ
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.