भजन संहिता 24

महिमामय राजा अर उसका राज

दाऊद का भजन

1धरती अर जो किमे उस म्ह सै यहोवा का ए सै;

दुनिया अर उस म्ह रहण आळे भी।

2क्यूँके उस्से नै उसकी नींव समुन्दरां कै उप्पर मजबूत करकै धरी,

अर बड़ी-बड़ी नदियाँ कै उप्पर स्थिर करया सै।

3यहोवा के पर्वत1 पै कौण चढ़ सकै सै?

अर उसकी पवित्र जगहां म्ह कौण बड़ सकै सै?2

4जिसके काम निर्दोष अर मन साफ सै,

जिसनै अपणे मन ताहीं बेकार की बात्तां की ओड़ न्ही लगाया,

अर ना कपट तै कसम खाई।

5वो यहोवा की ओड़ तै आशीष पावैगा,

अर अपणे उद्धार करण आळे परमेसवर की

ओड़ तै धर्मी ठहरैगा।

6इसेए माणस उसके खोजी सै,

याकूब के परमेसवर तेरे दर्शन के टोह्ण आळे याकूबवंशी सै3। (सेला)

7हे फाटकों, अपणे सिर ऊँच्‍चे करो,

हे सनातन के दरबाज्यों, ऊँच्‍चे हो जाओ।

क्यूँके प्रतापी राजा आण आळा सै।

8वो प्रतापी राजा कौण सै,

यहोवा जो ताकतवर अर पराक्रमी सै,

परमेसवर जो युद्ध म्ह पराक्रमी सै!

9हे फाटकों, अपणे सिर ऊँच्‍चे करो

हे सनातन के दरबाज्यों थम भी खुल जाओ!

क्यूँके प्रतापी राजा आवैगा!

10वो प्रतापी राजा कौण सै?

सेनाओं का यहोवा, वोए प्रतापी राजा सै। (सेला)