Haryanvi Bible
भजन संहिता 130
करुणामय परमेसवर
यात्रा का गीत
हे यहोवा, मन्नै मुसीबतां म्ह ढुंघी जगहां म्ह तै तेरे ताहीं पुकारया सै।
हे प्रभु, मेरी सुण!
तेरे कान मेरे गिड़गिड़ाण की ओड़ ध्यान तै लाग्गे रहवै!
हे यहोवा, जै तू अधर्म के काम्मां का लेखा ले,
तो हे प्रभु कौण खड्या रह पावैगा?
पर तू माफ करण आळा सै?
जिसतै तेरा भय मान्या जावै।
मै यहोवा की बाट देक्खूँ सूं, मै जी तै उसकी बाट देक्खूँ सूं,
अर मेरी आस उसकै वचन पै सै;
रुखाळी करण आळे जितना सबेरै नै चाहवै सै, हाँ
रुखाळी करण आळे जितना सबेरै नै चाहवै सै,
उसतै भी घणा मै यहोवा नै अपणे जी तै चाहूँ सूं।
इस्राएल यहोवा पै आस लगाऐ रहवै!
क्यूँके यहोवा करुणा करण आळा
अर पूरा छुटकारा देण आळा सै।
इस्राएल नै उसके सारे अधर्म के काम्मां तै वोए छुड़ावैगा।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.