Haryanvi Bible
भजन संहिता 118
जीत खात्तर धन्यवाद
यहोवा का धन्यवाद करो, क्यूँके वो भला सै;
अर उसकी करुणा सदा की सै!
इस्राएल कहवै,
उसकी करुणा सदा की सै।
हारुन का कुण्बा कहवै,
उसकी करुणा सदा तक की सै।
यहोवा तै डरण आळे कहवै,
उसकी करुणा सदा की सै।
मन्नै मुसीबत म्ह परमेसवर ताहीं पुकारया,
परमेसवर नै मेरी सुणकै, मेरे ताहीं खुल्ली जगहां म्ह पोहचाया।
यहोवा मेरी ओड़ सै, मै ना डरुँगा।
माणस मेरा के बिगाड़ सकै सै?
यहोवा मेरी ओड़ मेरा मददगार सै,
मै अपणे दुश्मनां पै निगांह करकै सन्तुष्ट होऊँगा।
यहोवा की शरण म्ह जाणा,
माणसां पै भरोस्सा राक्खण तै आच्छा सै।
यहोवा की शरण लेणा,
प्रधानां पै भी भरोस्सा राक्खण तै आच्छा सै।
सारी जात्तां नै मेरे ताहीं घेर लिया सै;
पर यहोवा कै नाम तै मै उननै जरुर नाश कर दियुँगा।
उननै मेरै ताहीं घेर लिया सै, बेशक, घेर लिया सै;
पर यहोवा के नाम तै मै उननै जरुर नाश कर दियुँगा।
उननै मै म्हाळ की माक्खियां की तरियां घेर लिया,
पर काँड्या की आग की तरियां वे बुझगे;
यहोवा के नाम तै मै जरुर उननै नाश कर दियुँगा!
तन्नै मेरै ताहीं बड़ा धक्का दिया तो था, के मै पड़ जाऊँ,
पर यहोवा नै मेरी मदद करी।
परमेसवर मेरा जोर अर गीतां का कारण सै;
वो मेरा उद्धार बण्या सै।
धर्मियाँ के तम्बू म्ह जयजयकार अर उद्धार की आवाज होरी सै,
यहोवा के सोळे हाथ तै पराक्रम के काम होवै सै।
यहोवा का सोळा हाथ महान होया सै,
यहोवा के सोळे हाथ तै पराक्रम के काम होवै सै!
मै ना मरुँगा पर जिन्दा रहूँगा,
अर परमेसवर के काम्मां का जिक्र करदा रहूँगा।
परमेसवर नै मेरी बड़ी ताड़ना तो करी सै
पर मेरे ताहीं मौत कै बस म्ह न्ही छोड्या।
मेरै खात्तर धर्म के दरवाज्जे1 खोल्लो,
मै भित्तर जाकै यहोवा का धन्यवाद करुँगा।
यहोवा का दरवाज्जा योए सै,
इस म्ह धर्मी भित्तर जाण पावैगें।
हे यहोवा, मै तेरा धन्यवाद करुँगा,
क्यूँके तन्नै मेरी सुण ली सै,
अर तू मेरा उद्धार बण्या सै।
राजमिस्त्रियाँ नै जो पत्थर निकम्मा ठहराया था
वोए कुणे का सिरा बणग्या सै।
यो तो यहोवा की ओड़ तै होया सै,
वो म्हारी नजर म्ह अदभुत सै।
आज वो दिन सै जो यहोवा नै बणाया सै;
हम इस म्ह मगन अर आनन्दित होवांगे।
हे यहोवा बिनती सुण, उद्धार कर!
हे यहोवा, बिनती सुण, कामयाबी दे।
धन्य सै वो जो यहोवा कै नाम तै आवै सै!
हमनै थारे ताहीं यहोवा के घर तै आशीर्वाद दिया सै।
यहोवा परमेसवर सै, अर उसनै म्हारे ताहीं चान्दणा दिया सै।
यज्ञपशु नै वेदी के खम्बा तै रस्सियाँ कै गैल बाँधो!
हे यहोवा, तू मेरा परमेसवर सै, मै तेरा धन्यवाद करुँगा;
तू मेरा परमेसवर सै, मै तेरी स्तुति करुँगा।
यहोवा का धन्यवाद करो, क्यूँके वो भला सै;
अर उसकी करुणा सदा बणी रहवैगी!
Source notes (1)
- Footnote धर्म के दरवाज्जे वे दरबाजे जिस म्ह धर्मी माणस दाखल होवैगें यानी आराधनालय
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.