Haryanvi Bible
भजन संहिता 108
दुश्मनां पै विजय का आश्वासन गीत
दाऊद का भजन
हे परमेसवर, मेरा दिल मजबूत सै;
मै गाऊँगा, मै अपणी आत्मा तै भी भजन गाऊँगा।
हे सारंगी अर वीणा जाग्गो!
मै आप सबेरै-सबेरै जाग उठूँगा!
हे यहोवा, मै देश-देश के माणसां कै बीच म्ह तेरा धन्यवाद करुँगा,
अर राज्य-राज्य के माणसां कै बीच म्ह तेरा भजन गाऊँगा।
क्यूँके तेरी दया अकास तै भी ऊँच्ची सै,
अर तेरी सच्चाई आकाशमण्डल तक सै।
हे परमेसवर, तू सुर्ग कै उप्पर हो!
अर तेरी महिमा सारी धरती कै उप्पर हो!
इस करकै तेरे प्यारे माणस छुड़ाए जावै,
तू अपणे सोळे हाथ तै हमनै बचाले अर म्हारी बिनती सुण ले!
परमेसवर नै अपणी पवित्रता म्ह होकै कह्या सै,
“मै पूरा खुश होकै शेकेम नै बाँट ल्यूँगा,
अर सुक्कोत की तराई नै नपवाऊँगा।
गिलाद मेरा सै, मनश्शे भी मेरा सै;
अर एप्रैम मेरे सिर का ताज सै; यहूदा मेरा राजदण्ड सै।
मोआब मेरे धोणे का बरतन सै,
मै एदोम पै अपणा जूत्ता फेंक्कूँगा, पलिश्त पै मै जयजयकार करुँगा।”
मन्नै गढ़ आळे नगर म्ह कौण पोहचावैगा?
एदोम तक मेरी अगुवाई किसनै करी सै?
हे परमेसवर, के तन्नै म्हारे ताहीं न्ही छोड़ दिया?
अर हे परमेसवर, तू म्हारी सेना कै आग्गै-आग्गै न्ही चालदा।
दुश्मनां कै खिलाफ म्हारी मदद कर,
क्यूँके आदमी की मदद बेकार सै!
परमेसवर की मदद तै हम वीरता दिखावैगें,
म्हारे दुश्मनां नै वोए रौंदैगा।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.