Haryanvi Bible
नीतिवचन 31
राजा नै सलाह
लमूएल राजा के असरदार वचन, जो उसकी माँ नै उस ताहीं सिखाए।
हे मेरे बेट्टे, हे मेरे अपणे बेट्टे!
हे मेरी मन्नतां के बेट्टे!
अपणी ताकत जनानियाँ नै ना दिये,
अर ना अपणा जीवन उनके बस म्ह करिये, जो राजयां की ताकत खां जावै सै।
हे लमूएल, राजा नै दाखमधु पीणा शोभा न्ही देन्दा,
अर मदिरा चाह्णा, अमीरां नै न्ही फाब्दा;
इसा ना होवै के वे पीकै नियम-कायदा नै भूल जावै
अर किसे दुखी के हक नै मारै।
मदिरा उसनै पीयाओ जो मरण पै सै,
अर दाखमधु उदास मन आळा ताहीं दियो;
जिसतै वे पी कै अपणी गरीबी नै भूल जावै,
अर अपणे कड़ी मेहनत नै फेर याद न्ही करै।
गूँगे खात्तर अपणा मुँह खोल,
अर सारे अनाथ्थां का न्याय ठीक तरियां तै करया कर।
अपणा मुँह खोल अर धर्म तै न्याय कर,
अर गरीब का न्याय कर।
भली पत्नी
भली पत्नी कौण पाँ सकै सै?
क्यूँके उसका मोल तो मूँगों1 तै बाध सै।
उसकै पति कै मन म्ह उसके प्रति बिश्वास सै,
अर उसनै लाभ की कमी न्ही होन्दी।
वो अपणी जिन्दगी के सारे दिनां म्ह उसतै बुरा कोनी,
बल्के भलाए बरताव करै सै।
अर वा ऊन और सण ढूँढ़-ढूँढ़ कै,
अपणे हाथ्थां तै खुशी के गैल काम करै सै।
वो अपणे कारोबार के जहाज के समान अर अपणी खाण-पीण की चिज्जां बड़ी दूर तै मँगवावै सै।
वा सबेरै बखत तै उठै सै,
अर अपणे परिवार ताहीं खाणा बणावै सै,
अर अपणी नौकराणियाँ नै अलग-अलग काम देवै सै।
वा किसे खेत कै बारै म्ह सोच्चै सै
अर उसनै मोल ले लेवै सै; अर अपणी मेहनत तै अंगूर का बाग लगावै सै।
वा अपणी कमर नै ताकत तै कस लेवै सै,
अर अपणी बाजुआं नै मजबूत करै सै।
वो जाण ले सै के मेरा व्यापार फायदेमन्द सै।
वो देर रात ताहीं काम करै सै।
वा अटेरन म्ह हाथ लगावै सै,
अर चरखै नै पकड़ै सै।
वा दीन के खात्तर मुट्ठी खोल्लै सै,
अर कंगालां नै सम्भाळण खात्तर अपणा हाथ बढ़ावै सै।
वा अपणे घराने खात्तर बर्फ तै न्ही डरदी,
क्यूँके उसके घर के सारे माणस लाल कपड़े पैहरै सै।
वा तकिये बणा लेवै सै;
उसके लत्ते छोट्टे सण अर बैंगनी रंग के होवै सै।
जिब उसका पति सभा म्ह देश के बुजुर्गां के गैल बैठ्ठै सै,
तो उसका सम्मान होवै सै।
वा सूत के लत्ते बणा के बेच्चै सै;
अर व्यापारियाँ नै कमरबन्द देवै सै।
वा शक्ति अर प्रताप का पहरावा पहरे रहवै सै,
अर आण आळे बखत पै हाँस्सै सै।
वा बुद्धि की बात बोल्लै सै,
अर उसके शब्द कृपा की शिक्षा के मुताबिक होवै सै।
वा अपणे सारे घराने के चाल-चलण नै ध्यान तै देक्खै सै,
अर अपणी रोट्टी बिना मेहनत के न्ही खान्दी।
उसके बेट्टे उठ-उठकै उस ताहीं धन्य कहवै सै,
उसका पति भी उसकी उठकै उसकी इसी बड़ाई करै सै:
“भोत सी बिरबानियाँ नै आच्छे-आच्छे काम तो करे पर तू उन सब तै बढ़कै सै।”
शोभा तो झूठ्ठी अर सुन्दरता बेकार सै,
पर जो बिरबान्नी यहोवा का भय मान्नै सै, उसकी बड़ाई करी जावैगी।
उसके मेहनत का फळ उस ताहीं द्यों,
अर उसके काम्मां तै सभा म्ह उसकी बड़ाई होवैगी।
Source notes (1)
- Footnote मूँगों मूँगा एक बेशकीमती रत्न सै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.