Haryanvi Bible
नीतिवचन 18
जो दुसरयां तै अलग हो जावै सै, वो अपणी ए इच्छा पूरी करण कै खात्तर इसा करै सै,
अर सब ढाळ की खरी बुद्धि तै बैर करै सै।
मूर्ख का मन समझ की बात्तां म्ह न्ही लागदा,
वो बस अपणे मन की बात जाहिर करणा चावै सै।
जड़ै दुष्टता आवै सै, ओड़ै अपमान भी आवै सै;
अर निरादर के गैल बुराई आवै सै।
माणसां के मुँह के वचन गहरा पाणी हो सै;
बुद्धि का चोवा बहन्दी होई धारा के जिसा सै।
दुष्ट का पक्ष करणा,
अर धर्मी का हक मारणा, आच्छा कोनी।
बात बढ़ाण तै मूर्ख मुकद्दमा खड्या करै सै,
अर खुद नै मार खाण कै जोग्गा दिखावै सै।
मूर्ख का विनाश उसकी बात्तां तै होवै सै,
अर उसकी बात उसकै प्राण कै खात्तर फंदा होवै सै।
कानाफूसी करण आळे की बात सुवाद खाणे की ढाळ लाग्गै सै;
वे पेट म्ह हजम हो जावै सै।
जो काम म्ह आलस करै सै,
वो बिगाड़ण आळे का भाई ठहरै सै।
यहोवा का नाम मजबूत गढ़ सै;
धर्मी उस म्ह भाग कै सारी मुसीबतां तै बच जावै सै।
धनी का धन उसकी नजर म्ह मजबूत नगर सै,
अर उसकी कल्पना ऊँच्ची शहरपनाह के समान सै।
नाश होण तै पैहला माणस कै मन म्ह घमण्ड,
अर महिमा पाण तै पैहल्या नम्रता होवै सै।
जो बिना बात सुणे जवाब देवै सै, वो बेकूफ ठहरै सै,
अर उसका अनादर होवै सै।
रोग म्ह माणस अपणी आत्मा तै सम्भलै सै;
पर जब आत्मा हार जावै सै जिब इसनै कौण सह सकै सै?
समझण आळे का मन ज्ञान पावै सै;
अर बुद्धिमान ज्ञान की बात की टोह् म्ह रहवै सै।
भेंट माणस कै खात्तर राह खोल देवै सै,
अर उसनै बड़े माणसां कै स्याम्ही पोहचावै सै।
मुकदमे म्ह जो पैहला बोल्लै, वोए बेकसूर लाग्गै सै,
पर बाद म्ह दुसरे पक्ष आळा आकै उसनै जाँच लेवै सै।
चिट्ठी डालण तै झगड़े बन्द होवै सै,
अर ताकतवर माणसां की लड़ाई का अन्त होवै सै।
नाराज होए भाई नै मनाणा मजबूत नगर कै ले लेण तै मुश्किल होवै सै,
अर झगड़े राजभवन कै बेडां कै जिसा सै।
माणस का पेट मुँह की बात्तां के फळ तै भरै सै,
अर बोलण तै जो कुछ उसनै मिलै सै, वो उसतै छिक्क जावै सै।
जीभ कै बस म्ह मरणा अर जीणा दोन्नु होवै सै,
अर जो उसनै काम म्ह लाणा जाणै सै, वो उसका फळ भोग्गैगा।
जिसनै जनान्नी ब्याह ली, उसनै उत्तम पदार्थ पाया,
अर यहोवा का अनुग्रह उसपै होया सै।
गरीब गिड़गिड़ाकै मदद माँग्गै सै,
अर धनी कड़ा जवाब देवै सै।
मित्तरां कै बढ़ाण तै तो नाश होवै सै,
पर इसा मित्तर होवै सै, जो भाई तै भी घणा मिल्या रहवै सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.