Haryanvi Bible
गिनती 36
सलोफाद की बेटियाँ का हिस्सा
एक दिन यूसुफियाँ कै खानदान म्ह तै गिलाद, जो माकीर का बेट्टा अर मनश्शे का पोत्ता था, उसकै वंश के कुण्बे के पितरां कै घरान्यां के खास-खास आदमी मूसा कै धोरै जाकै उन प्रधानां कै स्याम्ही, जो इस्राएलियाँ के पितरां कै घरान्यां के खास आदमी थे, कहण लाग्गे, “यहोवा नै म्हारै अगुवें तै हुकम दिया था, के इस्राएलियाँ नै चिट्ठी गेर कै देश बाँट दिये; अर फेर यहोवा का यो भी हुकम म्हारै अगुवें नै मिल्या, के म्हारै सगोत्री सलोफाद का हिस्सा उसकी बेटियाँ तै देणा। पर जै वे इस्राएलियाँ के और किसे गोत्र के माणसां तै ब्याही जावैं, तो उनका हिस्सा म्हारै पितरां के हक तै छूट ज्यागा, अर जिस गोत्र म्ह तै ब्याही जावैं उस्से गोत्र कै हिस्से म्ह मिल ज्यागा; फेर म्हारा हिस्सा घट ज्यागा। अर जिब इस्राएलियाँ की जुबली होवैगी, फेर जिस गोत्र म्ह वे ब्याही जावैं उसकै हिस्से म्ह उनका हिस्सा पक्की तरियां तै मिल ज्यागा; अर वो म्हारै पितरां कै गोत्र का हिस्सा म्ह तै सदा कै खात्तर छूट ज्यागा।” फेर यहोवा तै हुकम पाकै मूसा नै इस्राएलियाँ तै कह्या, “यूसुफियाँ कै गोत्र सही कहवै सैं। सलोफाद की बेटियाँ कै बारै म्ह यहोवा नै यो हुकम दिया सै, के जो वर जिसकी निगांह म्ह आच्छा लाग्गै वो उस्से तै ब्याही जावै; पर वे अपणे मूलपुरुष ए कै गोत्र के कुण्बे म्ह ब्याही जावै। अर इस्राएलियाँ कै किसे गोत्र का हिस्सा दुसरे कै गोत्र कै हक म्ह ना मिलण पावै; इस्राएली अपणे-अपणे मूलपुरुष कै गोत्र कै हिस्सा म्ह बणे रहवैं। अर इस्राएलियाँ कै किसे गोत्र म्ह तै किसे की बेट्टी हो जो हिस्सा पाणआळी हो, वो अपणे ए मूलपुरुष कै गोत्र के किसे आदमी तै ब्याही जावै, इस करकै के इस्राएली अपणे-अपणे मूलपुरुष कै हिस्सा के हकदार रहवैं। किसे गोत्र का हिस्सा दुसरे गोत्र कै हिस्से म्ह मिलण ना पावै; इस्राएलियाँ कै एक-एक गोत्र के माणस अपणे-अपणे हक म्ह बणे रहवैं।” यहोवा के हुकम कै मुताबिक जो उसनै मूसा तै दिया सलोफाद की बेटियाँ नै करया। यानिके महला, तिर्सा, होग्ला, मिल्का, अर नोवा, जो सलोफाद की बेट्टी थी, उननै अपणे चचेरे भाईयाँ तै ब्याह करया। वे यूसुफ के बेट्टे मनश्शे के वंश कै खानदान म्ह ब्याही गई, अर उनका हिस्सा उनके मूलपुरुष कै कुण्बे के गोत्र कै हक म्ह बण्या रह्या।
जो हुकम अर नियम यहोवा नै मोआब कै अराबा म्ह यरीहो नगर कै धोरै की यरदन नदी कै तट पै मूसा कै जरिये इस्राएलियाँ तै दिए वे येए सैं।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.