Haryanvi Bible
गिनती 30
मन्नत मानण की विधि
फेर मूसा नै इस्राएली गोत्रां के खास-खास माणसां तै कह्या, “यहोवा नै यो हुकम दिया सै: जिब कोए आदमी यहोवा की मन्नत मान्नै, या अपणे-आप तै करार करण कै खात्तर कसम खावै, तो वो अपणा वचन ना टाळै; जो कुछ उसकै मुँह तै लिकड़या हो उसे कै मुताबिक वो करै। अर जिब कोए जनान्नी अपणी कुँवारी अवस्था म्ह, अपणे बाप कै घर म्ह रहन्दे होए, यहोवा की मन्नत मान्नै, वो अपणे-आप तै करार करै, तो जै उसका पिता उसकी मन्नत या उसका वो करार का वचन सुणकै, जो उसनै अपणे-आप ताहीं करया हो, उसतै कुछ न्ही कहवै; फेर तो उसकी सारी मन्नतें मजबूत बणी रहवैं, अर कोए बन्धन क्यूँ ना हो, जिसतै उसनै अपणे-आप ताहीं बाँधया हो, वो भी स्थिर रहवै। पर जै उसका पिता उसकी बात सुणकै उस्से दिन उस ताहीं मना करै, तो उसकी मन्नतें या और ढाळ के बन्धन, जिनतै उसनै अपणे-आप ताहीं बाँधया हो, उन म्ह तै एक भी स्थिर ना रहवै, अर यहोवा यो जाणकै, के उस जनान्नी कै पिता नै उस ताहीं मना कर दिया सै, उसका यो पाप माफ करैगा। फेर जै वो पति कै अधीन हो अर मन्नत मान्नै, या बिना सोच विचार करे इसा कुछ कहवै जिसतै वो बन्धन म्ह पड़ै, अर जै उसका पति सुणकै उस दिन उसतै कुछ न्ही कहवै; फेर तो उसकी मन्नतें बणी रहवैं, अर जिन बन्धनां तै उसनै अपणे-आप ताहीं बाँधया हो वो भी बणी रहवैं। पर जै उसका पति सुणकै उस्से दिन उस ताहीं मना करदे, तो जो उसनै मन्नत मान्नी सै, अर जो बात बिना सोच विचार करे कहण तै उसनै अपणे-आप तै करार करया हो, वो टूट जावैगा; अर यहोवा उस जनान्नी का पाप माफ करैगा। फेर बिधवा या छोड्डी होई जनान्नी की मन्नत, या किसे ढाळ के करार की क्यूँ ना हो, जो उसनै अपणे-आप तै करया हो, तो वो बण्या ए रहवै। फेर जै कोए जनान्नी अपणे पति कै घर म्ह रहन्दे होए मन्नत मान्नै, या कसम खाकै अपणे-आप तै करार करै, अर उसका पति सुणकै कुछ न्ही कहवै, अर ना उस ताहीं मना करै; फेर तो उसकी सारी मन्नतें मजबूत बणी रहवैं, अर हरेक बन्धन क्यूँ ना हो, जो उसनै अपणे-आप तै करया हो, वो बण्या रहवै। पर जै उसका पति उसकी सारी मन्नत सुणकै उस्से दिन पूरी तरियां तै तोड़दे, तो उसकी सारी मन्नतें, जो कुछ उसकै मुँह तै अपणे बन्धन कै बारै म्ह लिकड़या हो, उस म्ह तै एक बात भी बणी ना रहवै; उसकै पति नै सारी तोड़ दी सै; इस करकै यहोवा उस जनान्नी का वो पाप माफ करैगा। कोए भी मन्नत या कसम क्यूँ ना हो, जिसतै उस जनान्नी नै अपणे जी तै दुख देण का करार करया हो, उस ताहीं उसका पति चाहवै तो मजबूत करै, अर चाहवै तो तोड़दे; यानिके जै उसका पति हर रोज उसतै कुछ भी न्ही कहवै, तो वो उस ताहीं सारी मन्नतें सारे बन्धनां ताहीं जिनतै वो बंधी हो मजबूत करदे सै; उसनै उन ताहीं पक्का करया सै, क्यूँके सुणण कै दिन उसनै कुछ न्ही कह्या। अर जै वो उननै सुणकै घणे दिन बाद तोड़दे, तो अपणी जनान्नी के अधर्म का बोझ वोए ठावैगा।”
पति-पत्नी कै बीच, अर पिता अर उसके घर म्ह रहन्दी होई कुँवारी बेट्टी के बीच, जिन नियमां का हुकम यहोवा नै मूसा तै दिया सै वे येए सैं।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.