Haryanvi Bible
गिनती 3
हारुन के बेट्टे
जिस बखत यहोवा नै सीनै पर्वत कै धोरै मूसा तै बात करी उस बखत हारुन अर मूसा की पीढ़ी इस तरियां थी।
हारुन के बेट्याँ के नाम ये सैं नादाब जो उसका जेठ्ठा था, अर अबीहू, एलीआजर अर ईतामार;
हारुन के बेट्टे, जो अभिषिक्त याजक थे, अर उनका संस्कार याजक का काम करण कै खात्तर होया था, उनके नाम ये सैं।
नादाब अर अबीहू जिस बखत सीनै कै जंगळ-बियाबान म्ह यहोवा कै स्याम्ही गलत आग लेगे उस्से बखत यहोवा कै स्याम्ही मरगे थे; अर वो बे-ऊलाद भी थे। एलीआजर अर ईतामार अपणे पिता हारुन कै गेल्या याजक का काम करदे रहे।
लेवियाँ का याजकां की सेवा खात्तर नियुक्ति
फेर यहोवा नै मूसा तै कह्या, “लेवी गोत्र आळयां नै धोरै ले आकै हारुन याजक कै स्याम्ही खड्या कर के वे उसकी मदद करैं। जो कुछ उसकी ओड़ तै अर सारी मण्डळी की ओड़ तै सै उन ताहीं सौप्या जावै उसकी देखभाळ वे मिलापआळे तम्बू कै स्याम्ही करैं, इस तरियां वे तम्बू की सेवा करैं; वे मिलापआळे तम्बू के पूरे सामान की अर इस्राएलियाँ की सौंपी होई चिज्जां की भी देखभाळ करैं, इस तरियां वे निवास-स्थान की सेवा करैं। अर तू लेवियाँ नै हारुन अर उसके बेट्याँ ताहीं सौंप दे; अर वे इस्राएल के माणसां की ओड़ तै हारुन तै पूरी तरियां तै अर्पण करें होए हों। अर हारुन अर उसके बेट्याँ नै याजक कै ओद्दा पै नियुक्त कर, अर वे अपणे याजक पद नै सम्भाळै; अर जै कोए परदेशी धोरै आवै, तो वो मार दिया जावै।”
फेर यहोवा नै मूसा तै कह्या, “सुण इस्राएलियाँ के सारे जेठ्यां कै बदले, मै इस्राएल के माणसां म्ह तै लेवियाँ नै ले लेऊँ सूं; इस करकै लेवीय मेरै ए हों। सारे जेठ्ठे मेरे सैं; क्यूँके जिस दिन मन्नै मिस्र देश के सारे जेठ्यां ताहीं मारया, उस्से दिन मन्नै के माणस के पशु इस्राएलियाँ के सारे जेठ्यां ताहीं अपणे खात्तर पवित्र ठहराया; इस करकै वे मेरे ए ठहरैगें; मै यहोवा सूं।”
लेवियाँ की गिणती
फेर यहोवा नै सीनै के जंगळ-बियाबान म्ह मूसा तै कह्या, “लेवियाँ म्ह तै जितने आदमी एक महिन्ने या उसतै घणी उम्र कै हों उन ताहीं उनके पितरां कै घरान्यां अर उनके खानदान्ना कै मुताबिक गिण ले।” यो हुकम पाकै मूसा नै यहोवा के कहे मुताबिक उन ताहीं गिण लिया। लेवी कै बेट्याँ कै नाम ये सैं, यानिके गेर्शोन, कहात, अर मरारी। अर गेर्शोन के बेट्टे जिनतै उसके कुल चाल्ले उनके नाम ये सैं, यानिके लिब्नी अर शिमी। कहात के बेट्टे जिनतै उसके कुल चाल्ले उनके नाम ये सैं, यानिके अम्राम, यिसहार, हेब्रोन, अर उज्जीएल। अर मरारी के बेट्टे जिनतै उसके कुल चाल्ले ये सैं, यानिके महली अर मूशी। ये लेवियाँ के कुल अपणे पितरां कै घरान्यां कै मुताबिक सैं।
गेर्शोन तै लिब्नायाँ अर शिमियाँ के कुल चाल्ले; गेर्शोनवंशियाँ के कुल येए सैं। इन म्ह तै जितने माणसां की उम्र एक महिन्ने की या उसतै घणी थी, उन सारया की गिणती साढ़े सात हजार थी। गेर्शोन आळे कुल निवास के पाच्छै पश्चिम कान्ही अपणे डेरे गेरया करैं; अर गेर्शोनियाँ के मूलपुरुष तै कुण्बे का प्रधान लाएल का बेट्टा एल्यासाप हो। अर मिलापआळे तम्बू की जो चिज्जां गेर्शोनवंशियाँ ताहीं सौंपी जावै वे ये हों, यानिके निवास अर तम्बू, अर उसका आवरण, अर मिलापआळे तम्बू के दरबाजे का पड़दा, अर जो आँगण निवास अर वेदी कै चौगरदे सै उसके पड़दे, अर उसके दरबाजे का पड़दा, अर सारी डोरी जो उस म्ह काम आवै सैं।
फेर कहात तै अम्रामियाँ, यिसहारियाँ, हेब्रोनियाँ, अर उज्जीएलियाँ के कुल चाल्ले; कहातियाँ के कुल येए सैं। उन म्ह तै जितने माणसां की उम्र एक महिन्ने की या उसतै घणी थी उनकी गिणती आठ हजार छः सौ थी। उनपै पवित्रस्थान की देखभाळ का जिम्मा था। कहातियाँ के कुल निवास स्थान की ओड़ अपणे डेरे गेरया करैं जो दक्षिण की ओड़ सै; अर कहातियाँ के मूलपुरुष के कुण्बे का प्रधान उज्जीएल का बेट्टा एलीसापान हो। अर जो चिज्जां उन ताहीं सौंपी जावै वे सन्दूक, मेज, दीवट, वेदियाँ, अर पवित्रस्थान का वो सामान जिसतै सेवा-पाणी होवै सै, अर पड़दा; यानिके पवित्रस्थान के काम म्ह आणआळा सारा सामान हो। अर लेवियाँ के प्रधानां का प्रधान हारुन याजक का बेट्टा एलीआजर हो, अर जो माणस पवित्रस्थान की सौंपी होई चिज्जां की देखभाळ करैगें उनपै वोए मुखिया ठहरै।
फेर मरारी तै महलियाँ अर मूशियाँ के कुल चाल्ले; मरारी कै कुल येए सैं। इन म्ह तै जितने माणसां की उम्र एक महिन्ने की या उसतै घणी थी उन सारया की गिणती छः हजार दो सौ थी। अर मरारी के खानदान्ना के मूलपुरुष के कुण्बे का प्रधान अबीहैल का बेट्टा सूरीएल हो; ये माणस निवास की उत्तर की ओड़ अपणे डेरे खड़े करैं। अर जो चीज मरारी वंशियाँ तै सौंपी जावै के वे उनकी देखभाळ करैं, वे निवास के तख्ते, बेंड़े, खम्भे, कुर्सी, अर सारा सामान; यानी जो कुछ उसकै लाण म्ह काम आवै; अर चौगरदे के आँगण के खम्भे, अर उनकी कुर्सी, खूँटे अर डोरी हों।
अर जो मिलापआळे तम्बू कै स्याम्ही, यानिके निवास कै स्याम्ही, पूरब कान्ही जित्त तै सूर्योदय होवै सै, अपणे डेरे गेरया करैं, वे मूसा अर हारुन अर उसके बेट्याँ के डेरे हों, अर पवित्रस्थान की देखभाळ इस्राएलियाँ कै बदलै वेए करया करैं, अर दूसरा जो कोए उसकै धोरै आवै वो मार दिया जावै। यहोवा के इस हुकम नै पाकै एक महिन्ने के या उसतै घणी उम्र आळे जितने लेवी माणसां ताहीं मूसा अर हारुन नै उनके खानदान्ना के मुताबिक गिण्या, वे सारे के सारे बाईस हजार थे।
लेवियाँ का जेठ्यां की जगहां लेणा
फेर यहोवा नै मूसा तै कह्या, “इस्राएलियाँ के जितने जेठ्ठे माणसां की उम्र एक महिन्ने की या उसतै घणी सै, उन सारया नै नाम ले-लेकै गिण ले। अर मेरै खात्तर इस्राएलियाँ के सारे जेठ्यां कै बदलै लेवियाँ ताहीं, अर इस्राएलियाँ कै पशुआं के सारे जेठ्यां कै बदलै लेवियाँ के डान्गरां ताहीं ले; मै यहोवा सूं।” यहोवा के इस हुकम कै मुताबिक मूसा नै इस्राएलियाँ के सारे जेठ्यां ताहीं गिण लिया। अर सारे जेठ्ठे आदमी जिनकी उम्र एक महिन्ने की या उसतै घणी थी, उनके नाम्मां की गिणती बाईस हजार दो सौ तिहत्तर थी।
फेर यहोवा नै मूसा तै कह्या,
“इस्राएलियाँ के सारे जेठ्यां कै बदलै लेवियाँ ताहीं, अर उनके डान्गरां कै बदलै लेवियाँ के डान्गरां ताहीं ले; अर लेवी मेरै ए हों; मै यहोवा सूं। अर इस्राएलियाँ कै जेठ्यां म्ह तै जो दो सौ तिहत्तर की गिणती म्ह लेवियाँ तै घणी सैं, उनकै छुड़ाण के खात्तर, आदमी पाँच शेकेल ले; वे पवित्रस्थान के शेकेल कै हिसाब तै हों, यानिके बीस गेरा का शेकेल हो। अर जो रुपया उन घणे जेठ्यां की छुड़ाण का होवैगा उसनै हारुन अर उसके बेट्याँ तै दे दियो।” इस करकै जो इस्राएली जेठ्ठे लेवियाँ कै जरिये छुड़ौती आळयां तै घणे थे उनके हाथ्थां तै मूसा नै छुड़ौती का रुपया लिया। अर एक हजार तीन सौ पैंसठ शेकेल रुपया पवित्रस्थान के शेकेल कै हिसाब तै वसूल होया। अर यहोवा के हुकम कै मुताबिक मूसा नै छुटाये होयां का रुपया हारुन अर उसकै बेट्याँ तै दे दिया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.