Haryanvi Bible
गिनती 11
इस्राएलियाँ का कुढ़कुढ़ाणा अर इसकी सजा पाणा
फेर वे माणस बड़बड़ाण अर यहोवा कै सुणदे बुरा कहण लाग्गे; आखर म्ह यहोवा नै सुण्या, अर उसका छो भड़क ग्या, अर यहोवा की आग उनकै बीच म्ह जळ उठी, अर छावणी के एक किनारे तै कई माणसां नै भस्म करण लाग्गी। फेर माणस मूसा कै धोरै आकै मदद खात्तर चिल्लाए; अर मूसा नै यहोवा तै प्रार्थना करी, फेर वो आग बुझगी, अर उस जगहां का नाम तबेरा1 पड्या, क्यूँके यहोवा की आग उनकै बीच म्ह जळ उठी थी।
खाणे कै बारै म्ह शिकायत
फेर जो परदेशियाँ की भीड़ उनकै गेल्या थी, वो बढ़िया खाणा की लालसा करण लाग्गी; अर फेर इस्राएली भी रोण अर कहण लाग्गे, “म्हारे ताहीं माँस खाण नै कौण देवैगा? म्हारै ताहीं वो मच्छी याद सै जो हम मिस्र देश म्ह मुफ्त खाया करां थे, अर वे खीरे, खरबुज्जे, हरी प्याज, प्याज, अर लहसण भी; पर इब म्हारा जी घबराग्या सै, उरै इस मन्ना नै छोड़ और किमे कोनी दिखदा।” मन्ना तो धणिये की ढाळ था, अर उसका रंग-रूप मोत्ती की तरियां था। माणस आस्सै-पास्सै जाकै उस ताहीं कठ्ठा करदे, अर चाक्की म्ह पीसदे या ओखळी म्ह कूटदे, फेर तासळे म्ह पकान्दे, अर उसके फुलके बणावैं थे; अर उसका स्वाद तेल म्ह बणे होए पूड़े की ढाळ था। अर रात नै छावणी म्ह ओस पड़दी फेर उसकै गेल्या मन्ना भी पड़दा। अर मूसा नै सारे घरान्यां के माणसां ताहीं अपणे-अपणे डेरे के दरबाजे पै रोन्दे सुण्या; अर यहोवा का छो घणा भड़क ग्या, अर मूसा नै भी उनका बड़बड़ाणा बुरा लाग्या।
फेर मूसा नै यहोवा तै कह्या, “तू अपणे दास तै यो बुरा बरताव क्यूँ करै सै? और के कारण सै के मन्नै तेरी निगांह म्ह अनुग्रह न्ही पाया, के तन्नै इन सारे माणसां का बोझ मेरै पै गेरया सै? के ये सारे माणस मेरी ए कोख म्ह पड़े थे? के मन्नै ए उन ताहीं पैदा करया, जो तू मेरै तै कहवै सै, के जिस ढाळ पिता दूध पीते बाळक नै अपणी गोद्दी म्ह ठाए-ठाए फिरै सै, उस्से तरियां ए मै इन माणसां नै अपणी गोद्दी म्ह ठाकै उस देश म्ह ले जाऊँ, जिसकै देण की कसम तन्नै उनके पूर्वजां तै खाई सै? मन्नै इतणा माँस कित्त तै मिलैगा के इन सारे माणसां ताहीं दियुँ? ये तो न्यू कह-कहकै मेरै धोरै रोवै सैं, के तू म्हारै ताहीं माँस खाण नै दे। मै एक्ला इन सारे माणसां का बोझ न्ही सम्भाळ सकदा, क्यूँके यो मेरी ताकत तै बाहर सै। अर जै तन्नै मेरै गेल्या योए बरताव करणा सै, तो मेरै पै तेरा इतणा अनुग्रह कर, के तू मेरे प्राण एकदम ले ले, जिसतै मै अपणी बुरी हालत ना देखण पाऊँ।”
मूसा जरिये सत्तर अगुआँ का चुनाव
यहोवा नै मूसा तै कह्या, “इस्राएली बुजुर्गां म्ह तै सत्तर इसे आदमी मेरै धोरै कठ्ठे कर, जिननै तू जाणै सै के वे प्रजा के अगुवें अर उनके सरदार सै अर मिलापआळे तम्बू कै धोरै ले आ, के वे तेरै गेल्या उरै खड़े हो। फेर मै उतरकै तेरै तै ओड़ै बात करुँगा; अर जो परमेसवर का आत्मा तेरे म्ह सै उस म्ह तै कुछ लेकै उन म्ह उण्डेलुगा; अर वे इन माणसां का बोझ तेरै गैल ठाए रहवैंगे, अर तन्नै उस ताहीं एक्ले ठाणा ना पड़ैगा। अर माणसां तै कह, ‘कल कै खात्तर खुद नै पवित्र करो, फेर थमनै माँस खाण नै मिलैगा; क्यूँके थम यहोवा कै सुणदे होए न्यू कह-कहकै रोये सो, के म्हारै ताहीं माँस खाण नै कौण देवैगा? हम मिस्र देश म्ह ए भले थे। ज्यांतै यहोवा थारै ताहीं माँस खाण नै देवैगा, अर थम खाओगे। फेर थम एक दिन, या दो, या पाँच, या दस, या बीस दिन ए न्ही, पर महिन्ने भर उसनै खान्दे रहोगे, जिब तक वो थारे नाक तै लिकड़ण ना लाग्गै अर थारै ताहीं उसतै नफरत न्ही हो जावै, क्यूँके थमनै यहोवा ताहीं जो थारै बिचाळै सै तुच्छ जाण्या सै, अर उसकै स्याम्ही यो कहकै रोये सों के हम मिस्र देश तै क्यूँ लिकड़ आए?’”
फेर मूसा नै कह्या, “जिन माणसां कै बिचाळै मै सूं उन म्ह तै छः लाख तो प्यादे ए सैं; अर तन्नै कह्या सै के मै उननै इतणा माँस दियुँगा, के वे महिन्ने भर उसनै खान्दे ए रहवैंगे। के वे सारी भेड़-बकरी गां-बळध उनके खात्तर मारे जावैं के उन ताहीं माँस मिलै? या के समुन्दर की सारी मच्छी उनके खात्तर कठ्ठी करी जावैं, के उननै माँस मिलै?”
यहोवा नै मूसा तै कह्या, “के मेरा हाथ छोट्टा होग्या सै? इब तू देक्खैगा के मेरा वचन जो मन्नै तेरे तै कह्या सै वो पूरा होवै सै के न्ही।” फेर मूसा नै बाहर जाकै प्रजा कै माणसां तै यहोवा की बात कह सुणाई; अर उनके अगुवां म्ह तै सत्तर आदमी कठ्ठे करकै तम्बू कै चौगरदेकै खड़े करे। फेर यहोवा बाद्दळ म्ह होकै उतरया अर उसनै मूसा तै बात करी, अर जो आत्मा उस म्ह थी उस म्ह तै लेकै उन सत्तर अगुवां म्ह उण्डेल दी; अर जिब वो आत्मा उन म्ह आई फेर वे भविष्यवाणी करण लाग्गे। पर फेर और कदे न्ही करी। पर दो माणस छावणी म्ह रहगे थे, जिस म्ह तै एक का नाम एलदाद अर दुसरे का मेदाद था, उन म्ह भी आत्मा आई; ये भी उनै म्ह तै थे जिनके नाम लिख लिये गये थे, पर तम्बू कै धोरै कोनी गए थे, अर वे छावणी ए म्ह भविष्यवाणी करण लाग्गे। फेर किसे जवान नै भाजकै मूसा तै बताया, के एलदाद अर मेदाद छावणी म्ह भविष्यवाणी करैं सैं। फेर नून का बेट्टा यहोशू, जो मूसा का सेवादार अर उसके चुणे होए वीरां म्ह तै था, उसनै मूसा तै कह्या, “हे मेरे स्वामी मूसा, उननै रोक दे।” मूसा नै उनतै कह्या, “के तू मेरै कारण जळै सै? भला होंदा के यहोवा की सारी प्रजा के माणस नबी होन्दे, अर यहोवा अपणा आत्मा उन सारया म्ह उण्डेल देंदा!” फेर दोबारा मूसा इस्राएल के अगुवां सुधा छावणी म्ह चल्या गया।
छावणी म्ह बटेरें
फेर यहोवा की ओड़ तै एक बड़ी आँधी आई, अर वो समुंदर तै घणीए बटेर उड़ा कै छावणी पै अर उसकै चौगरदे नै इतणे ले आई, के वे आस्सै-पास्सै एक दिन कै2 राह ताहीं धरती पै दो हाथ के लगभग ऊँच्चे ताहीं छा गे। अर माणसां नै ठाकै उस दिन भर अर रात भर, अर दुसरे दिन भी दिन भर बटेरां नै कठ्ठे करदे रहे; जिसनै घाट तै घाट कठ्ठे करे उसनै दस होमेर बटोळे; अर उननै उन ताहीं छावणी कै चौगरदेकै सुखण खात्तर फैला दिया। माँस उनके मुँह म्ह ए था, अर वे उस ताहीं खाण न्ही पाए थे के यहोवा का छो उनपै भड़क उठ्या, अर उसनै उनतै घणी बड़ी मार तै मारया। अर उस जगहां का नाम किब्रोतहत्तावा3 पड्या, क्यूँके जिन माणसां नै माँस की लालसा करी थी उन ताहीं ओड़ै माट्टी दी गई। फेर इस्राएली किब्रोतहत्तावा तै चाल कै हसेरोत म्ह पोहचे, अर उड़ैए रहे।
Source notes (3)
- Footnote तबेरा बळदा होया
- Footnote एक दिन कै लगभग 4 किलोमीटर
- Footnote किब्रोतहत्तावा लालच की कब्र
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.