Haryanvi Bible
गिनती 1
इस्राएलियाँ की गिणती
इस्राएलियाँ कै मिस्र देश तै लिकड़ जाण के दुसरे साल के दुसरे महिन्ने के पैहले दिन म्ह, यहोवा नै सीनै के जंगळ-बियाबान म्ह मिलापआळे तम्बू म्ह, मूसा तै कह्या, “इस्राएलियाँ की सारी मण्डळी के खानदान्ना अर पितरां के घरान्यां कै मुताबिक, एक-एक आदमी की गिणती नाम ले-लेकै करिये। जितने इस्राएली बीस साल या उसतै घणी उम्र के हों, अर जो युद्ध करण कै लायक हों, उन सारया नै उनके दलां कै मुताबिक तू अर हारुन गिण ले। अर थारे गेल्या हरेक गोत्र का एक आदमी भी हो जो अपणे पितरां के कुण्बे का खास आदमी हो। थारे उन साथियाँ के नाम ये सैं: रूबेन कै गोत्र म्ह तै शदेऊर का बेट्टा एलीसूर; शिमोन कै गोत्र म्ह तै सूरीशद्दै का बेट्टा शलूमीएल; यहूदा कै गोत्र म्ह तै अम्मीनादाब का बेट्टा नहशोन; इस्साकार कै गोत्र म्ह तै सूआर का बेट्टा नतनेल; जबूलून कै गोत्र म्ह तै हेलोन का बेट्टा एलीआब; यूसुफ वंशियाँ म्ह तै ये सैं, यानिके एप्रैम कै गोत्र म्ह तै अम्मीहूद का बेट्टा एलीशामा, अर मनश्शे कै गोत्र म्ह तै पदासूर का बेट्टा गम्लीएल; बिन्यामीन कै गोत्र म्ह तै गिदोनी का बेट्टा अबीदान; दान कै गोत्र म्ह तै अम्मीशद्दै का बेट्टा अहीएजेर; आशेर कै गोत्र म्ह तै ओक्रान का बेट्टा पगीएल; गाद कै गोत्र म्ह तै दूएल का बेट्टा एल्यासाप; नप्ताली कै गोत्र म्ह तै एनान का बेट्टा अहीरा।” मण्डळी म्ह तै जो आदमी अपणे-अपणे पितरां कै गोत्रां के प्रधान होकै बुलाए गए, वे येए सैं, अर ये इस्राएलियाँ के हजारां म्ह खास प्रधान थे।
जिन माणसां के नाम उप्पर लिक्खे सैं उन ताहीं गैल लेकै मूसा अर हारुन नै, दुसरे महिन्ने के पैहले दिन सारी मण्डळी कठ्ठी करी, फेर इस्राएलियाँ नै अपणे-अपणे खानदान अर अपणे-अपणे पितरां के घरान्यां कै मुताबिक बीस साल या उसतै घणी उम्र आळयां के नाम्मां की गिणती करा कै अपणी-अपणी पीढ़ी इस तरियां लिखवाई; जिस तरियां यहोवा नै मूसा तै हुकम दिया था उस्से कै मुताबिक उसनै सीनै के जंगळ-बियाबान म्ह उनकी गिणती करी।
अर इस्राएल के जेठ्ठे रूबेन कै वंश के जितने आदमी अपणे कुल अर अपणे पितरां कै घरान्यां के मुताबिक बीस साल या उसतै घणी उम्र के थे अर युद्ध करण कै लायक थे, वे सारे अपणे-अपणे नाम तै गिणे गए: अर रूबेन के गोत्र के गिणे होए आदमी साढ़े छियालिस हजार थे।
शिमोन कै वंश के लोग जितने माणस अपणे कुल अर अपणे पितरां के घरान्यां कै मुताबिक बीस साल या उसतै घणी उम्र के थे, अर जो युद्ध करण कै लायक थे वे सारे अपणे-अपणे नाम तै गिणे गए।
अर शिमोन कै गोत्र के गिणे होए आदमी उणसठ हजार तीन सौ थे।
गाद कै वंश के जितने आदमी अपणे कुल अर अपणे पितरां कै घरान्यां के मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए: अर गाद कै गोत्र के गिणे होए आदमी पैंताळीस हजार साढ़े छः सौ थे।
यहूदा कै वंश के जितने आदमी अपणे कुल अर अपणे पितरां कै घरान्यां के मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर यहूदा कै गोत्र के गिणे होए आदमी चौहत्तर हजार छः सौ थे।
इस्साकार कै वंश के जितने आदमी अपणे कुल अर अपणे पितरां कै घरान्यां के मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर इस्साकार कै गोत्र के गिणे होए आदमी चौवन हजार च्यार सौ थे।
जबूलून कै वंश के जितने आदमी अपणे कुल अर अपणे पितरां कै घरान्यां के मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर जबूलून कै गोत्र के गिणे होए आदमी सत्तावन हजार च्यार सौ थे।
यूसुफ कै बेट्याँ म्ह तै एप्रैम कै वंश के जितने आदमी अपणे कुल अर अपणे पितरां कै घरान्यां कै मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर एप्रैम गोत्र के गिणे होए आदमी साढ़े चाळीस हजार थे।
मनश्शे कै वंश के जितने आदमी अपणे कुल अर अपणे पितरां के घरान्यां कै मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर मनश्शे कै गोत्र के गिणे होए आदमी बत्तीस हजार दो सौ थे।
बिन्यामीन के वंश के जितने आदमी अपणे कुल अर अपणे पितरां कै घरान्यां कै मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर बिन्यामीन कै गोत्र के गिणे होए आदमी पैंतीस हजार च्यार सौ थे।
दान कै वंश के जितने आदमी अपणे कुल अर अपणे पितरां कै घरान्यां कै मुताबिक बीस साल या उसतै घणी उम्र के थे अर जो युद्ध करण कै लायक थे, वे अपणे-अपणे नाम तै गिणे गए:
अर दान कै गोत्र के गिणे होए आदमी बासठ हजार सात सौ थे।
आशेर के वंश कै जितने आदमी अपणे कुल अर अपणे पितरां कै घरान्यां कै मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर आशेर कै गोत्र के गिणे होए आदमी साढ़े इकताळीस हजार थे।
नप्ताली कै वंश के जितने आदमी अपणे कुल अर अपणे पितरां कै घरान्यां कै मुताबिक बीस साल या उसतै घणी उम्र के थे अर जो युद्ध करण कै लायक थे, वे सारे अपणे-अपणे नाम तै गिणे गए:
अर नप्ताली कै गोत्र के गिणे होए आदमी तरेपन हजार च्यार सौ थे।
इस तरियां मूसा अर हारुन अर इस्राएल के बारहा प्रधानां ताहीं, जो अपणे-अपणे पितरां के घरान्यां के प्रधान थे, उन सारया ताहीं गिण लिया अर उनकी गिणती याए थी।
इस करकै जितने इस्राएली बीस साल या उसतै घणी उम्र के होण कै कारण युद्ध करण कै लायक थे वे अपणे पितरां के घरान्यां कै मुताबिक गिणे गए,
अर वे सारे गिणे होए आदमी मिलाकै छः लाख तीन हजार साढ़े पाँच सौ थे।
लेवी गोत्र आळयां का न्यारा करया जाणा
इन म्ह लेवी अपणे पितरां कै गोत्र के मुताबिक न्ही गिणे गए।
क्यूँके यहोवा नै मूसा तै कह्या था, “लेवी गोत्र की गिणती इस्राएलियाँ कै गैल ना करिये; पर तू लेवियाँ नै गवाही कै तम्बू पै, अर उसकै सारे सामान पै, यानिके जो कुछ उसतै सम्बन्ध राक्खै सै उसपै हकदार नियुक्त करिये; अर सारे सामान समेत निवास नै वेए ठाया करैं, अर वेए उस म्ह सेवा-पाणी भी करया करैं, अर तम्बू कै लोवै-धोरै वेए अपणे डेरे गेरया करैं। अर जिब-जिब निवास ताहीं आग्गै ले जाणा हो तब-तब लेवी उसनै पाड़या करैं, अर जिब-जिब निवास ताहीं खड्या करणा हो तब-तब लेवी उसनै खड्या करया करैं; अर जै कोए दूसरा धोरै आवै तो वो मार दिया जावै। अर इस्राएली अपणा-अपणा डेरा अपणी-अपणी छावणी म्ह अर अपणे-अपणे झण्डे कै धोरै खड्या करया करैं; पर लेवीय अपणे डेरे वाचा के तम्बू ए कै चौगरदे खड्या करया करैं, कदे इसा ना हो के इस्राएलियाँ की मण्डळी पै मेरा प्रकोप भड़कै; अर लेवी साक्षी के तम्बू की रुखाळ करया करैं।” जो हुकम यहोवा नै मूसा तै दिए थे, इस्राएलियाँ नै उन्हे कै मुताबिक करया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.