Haryanvi Bible
नहेम्याह 4
यहूदियाँ के दुश्मनां का बिरोध करणा
जिब सामरिया के शासक सम्बल्लत नै सुण्या के यहूदी माणस शहरपनाह नै बणावै सैं, फेर वो घणा छो म्ह होग्या, अर चिढ़कै यहूदियाँ नै मजाक म्ह उड़ाण लाग्या। वो अपणे भाईयाँ के अर सामरिया की सेना कै स्याम्ही न्यू कहण लाग्या, “वे कमजोर यहूदी के करणा चावै सैं? के वे वो काम अपणे बल तै करैगें? के वे अपणी जगहां मजबूत करैगें? के वे यज्ञ करैगें? के वे आज ए सारै नै निपटा देवैंगे? के वे माट्टी के ढेरां म्ह के जळे होए पत्थरां नै फेर नये सिरे तै बणावैगें?” उसकै धोरै तो अम्मोनी तोबियाह था, अर वो कहण लाग्या, “जो कुछ वे बणावै सैं, जै कोए लोमड़ी भी उसपै चढ़ै, तो वो उनकी बणाई होई पत्थर की शहरपनाह नै तोड़ देवैगा।” हे म्हारे परमेसवर सुण ले, के म्हारा अपमान हो रह्या सै; अर उनका करया होया अपमान उन्हे के सिर पै बोहड़ा दे, अर उननै गुलाम्मी के देश म्ह बोहड़ा दे। अर उनके अधर्म तू ना माफ कर, अर ना उनका पाप तेरे स्याम्ही तै मिटाया जावै; क्यूँके उननै तेरे ताहीं शहरपनाह बणाण आळयां कै स्याम्ही छो दुवाया सै।
हमनै शहरपनाह ताहीं बणाया; अर सारी शहरपनाह आध्धी ऊँचाई ताहीं बणगी सै। क्यूँके माणसां का मन उस काम म्ह रोज लाग्या रह्या।
जिब सम्बल्लत अर तोबियाह अर अरबियां, अम्मोनियाँ अर अश्दोदियाँ नै सुण्या, के यरुशलेम की शहरपनाह की मरम्मत होन्दी जावै सै, अर उस म्ह के नाके बन्द होण लाग्गे सैं, फेर वे घणे छो म्ह आए; अर सारया नै एक मन तै सलाह करी, के जाकै यरुशलेम तै लड़ै, अर उस म्ह गड़बड़ी करैं। पर हमनै अपणे परमेसवर तै प्रार्थना करी, अर उनके डर के मारे उनके खिलाफ दिन-रात के रुखाळे ठहरा दिए।
पर यहूदी दुख भरया गीत गाण लाग्गे, “ढोण आळयां का बल घट ग्या, अर माट्टी घणी पड़ी सै, ज्यांतै शहरपनाह म्हारे पै तै न्ही बण सकदी।” अर म्हारे दुश्मन कहण लाग्गे, “जिब ताहीं हम उनकै बीच म्ह ना पोहचे, अर उन ताहीं घात करकै वो काम बन्द ना करां, जिब ताहीं उननै ना किमे बेरा लागैगा, अर ना किमे दिखाई पड़ैगा।” फेर जो यहूदी उनके आस्सै-पास्सै रह्या करदे, उननै सारी जगहां तै दस बार आ आकै, म्हारे तै कह्या, “थमनै म्हारे धोरै बोहड़ आणा चाहिये।” इस कारण मन्नै माणसां ताहीं तलवार, बर्छी अर धनुष देकै शहरपनाह कै पाच्छै सबतै नीच्चै की खुली जगहां म्ह कुण्बे-कुण्बे कै मुताबिक बिठा दिया। फेर मै देखकै उठ्या, अर रईसां अर हाकिमां अर सारे माणसां तै कह्या, “उनतै ना डरो; प्रभु जो महान अर भययोग्य सै, उस्से नै याद करकै, अपणे भाईयाँ, बेट्यां, बेट्टियाँ, जनानियाँ अर घरां खात्तर लड़ाई करियो।”
जिब म्हारे दुश्मनां नै सुण्या, के या बात हमनै बेरा होगी सै अर परमेसवर नै उनकी योजना निष्फल करी सै, फेर हम सारे के सारे शहरपनाह कै धोरै अपणे-अपणे काम पै बोहड़गे। अर उस दिन तै मेरे आध्धे सेवक तो उस काम म्ह लाग्गे रहे अर आध्धे बर्छी, तलवार, धनुष अर झिलम नै धारण करे रह्या करदे; अर यहूदा के सारे घराने के पाच्छै हाकिम रह्या करदे। शहरपनाह नै बणाण आळे अर बोझ के ढोणआळे दोन्नु भार उठाया करदे, यानिके एक हाथ तै काम करया करदे अर दुसरे हाथ तै हथियार पकड़े रहवैं थे। राजमिस्त्री अपणी-अपणी जाँघ पै तलवार लटकाए होए बणाया करदे। अर नरसिंगे का फूँकण आळा मेरे गैल रह्या करदा1। ज्यांतै मन्नै रईसां, हाकिमां अर सारे माणसां तै कह्या, “काम तो बड़ा अर फैल्या होया सै, अर हम शहरपनाह पै न्यारे-न्यारे एक दुसरे तै दूर रहवां सां। ज्यांतै जित्त तै नरसिंगा थमनै सुणाई दे, उड़ैए म्हारे धोरै कठ्ठे हो जाईयो। म्हारा परमेसवर म्हारी और तै लड़ैगा।”
आखर हम काम म्ह लाग्गे रहे, अर उन म्ह आध्धे, दिन लिकड़ण तै तारयां के लिकड़ण ताहीं बर्छी लिये रह्या करदे। फेर उसे बखत मन्नै माणसां तै यो भी कह्या, “एक-एक माणस अपणे दास समेत यरुशलेम कै भित्तर रात बिताया करै, के वे रात नै तो म्हारी रुखाळी करैं, अर दिन म्ह काम पै लाग्गे रहवैं।” इस तरियां ना तो मै अपणे कपड़े तारया करदा, अर ना मेरे भाई, ना मेरे सेवक, ना वे रुखाळे जो मेरे साथी थे, अपणे कपड़े तारया करदे रात नै भी अपणे कपड़े पैहरे होए सोया करदे; हर कोए पाणी कै धोरै भी हथियार लिये होए जाया करदे।
Source notes (1)
- Footnote करदा इस यंत्र का काम चेतावनी या युद्ध का आह्वान करणा था।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.