Haryanvi Bible
लैव्यव्यवस्था 16
पाप तै छुटकारै का दिन
जिब हारुन के दो बेट्टे यहोवा कै स्याम्ही धोरै जाकै मरगे, उसकै बाद यहोवा नै मूसा तै बात करी; अर यहोवा नै मूसा तै कह्या, “अपणे भाई हारुन तै कह के सन्दूक कै उप्पर कै प्रायश्चित आळे ढक्कण कै आग्गै, बीचआळे पड़दे कै भित्तर, अति पवित्र स्थान म्ह हर बखत दाखल ना होया करै, न्ही तो वो मर ज्यागा; क्यूँके मै प्रायश्चित आळे ढक्कण कै उप्पर बाद्दळ म्ह दिखाई दियुँगा। जिब हारुन अति पवित्र स्थान म्ह दाखल होवै फेर इस तरियां तै जाया करै, यानिके पापबलि कै खात्तर एक बाछड़े नै अर होमबलि कै खात्तर एक मिंढे नै लेकै आवै। वो सणी के कपड़े का पवित्र अंगरखा, अर अपणे तन पै सणी के कपड़े का जाँघिया पहरे होए, अर सणी के कपड़े का कटिबन्ध, अर सणी के कपड़े की पगड़ी बाँधे होए दाखल हो; ये पवित्र कपड़े सैं, अर वो पाणी तै नहाकै इननै पहरै। फेर वो इस्राएल की मण्डळी कै धोरै तै पापबलि कै खात्तर दो बकरे अर होमबलि कै खात्तर एक मिंढा ले। अर हारुन उस पापबलि कै बाछड़े नै जो उस्से कै खात्तर चढ़ाकै अपणे अर अपणे कुण्बे कै खात्तर प्रायश्चित करै। अर उन दोन्नु बकरयां नै लेकै मिलापआळे तम्बू के दरबाजे पै यहोवा कै स्याम्ही खड्या करै; अर हारुन दोन्नु बकरयां पै चिट्ठी गेरै, एक चिट्ठी यहोवा कै खात्तर अर दुसरी अजाजेल कै खात्तर हो। अर जिस बकरे पै यहोवा कै नाम की चिट्ठी लिकड़ै उसनै हारुन पापबलि कै खात्तर चढ़ावै; पर जिस बकरे पै अजाजेल कै खात्तर चिट्ठी लिकड़ै वो यहोवा कै स्याम्ही जिन्दा खड्या करया जावै के उसतै प्रायश्चित करया जावै, अर वो अजाजेल कै खात्तर जंगळ-बियाबान म्ह छोड्या जावै।”
“हारुन उस पापबलि के बाछड़े नै, जो उस्से कै खात्तर होवैगा, धोरै ले आवै, अर उसनै बलिदान करकै अपणे अर अपणे कुण्बे कै खात्तर प्रायश्चित करै। अर जो वेदी यहोवा कै स्याम्ही सै, उसपै के जळदे होए कोयला तै भरे होए धूपदान नै लेकै, अर अपणी दोन्नु मुट्ठियाँ नै कूटे होए खुशबुदार धूप तै भरकै, बीच आळे पड़दे कै भित्तर ल्याकै उस धूप नै यहोवा कै स्याम्ही आग म्ह गेरै, जिसतै धूपदान का धुम्मा साक्षीपत्र कै उप्पर के प्रायश्चित कै ढक्कण के उप्पर छा जावै, न्ही तो वो मर ज्यागा; फेर वो बाछड़े कै लहू म्ह तै कुछ लेकै पूरब की ओड़ प्रायश्चित कै ढक्कण कै उप्पर अपणी आन्गळी तै छिड़कै, अर फेर उस लहू म्ह तै कुछ आंगळी कै जरिये उस ढक्कण कै स्याम्ही भी सात बार छिड़क दे। फेर वो उस पापबलि कै बकरे नै जो साधारण जनता कै खात्तर होवैगा बलिदान करकै उसकै लहू नै बीचआळे पड़दे कै भित्तर ले आवै, अर जिस तरियां बाछड़े कै लहू तै उसनै करया था ठीक उस्से तरियां ए वो बकरे कै लहू तै भी करै, यानिके उसनै प्रायश्चित कै ढक्कण कै उप्पर अर उसकै स्याम्ही छिड़कै। अर वो इस्राएलियाँ की कई ढाळ की अशुद्धता, अर अपराध्धां, अर उनके सारे पापां के कारण पवित्र स्थान कै खात्तर प्रायश्चित करै; अर मिलापआळा तम्बू जो उनकै गैल उनकी कई ढाळ की अशुद्धता के बिचाळै रहवै सै उसकै खात्तर भी वो उस्से तरियां ए करै। जिब हारुन प्रायश्चित करण कै खात्तर अति पवित्र स्थान म्ह दाखल हो, जिब तक वो अपणे अर अपणे कुण्बे अर इस्राएल की सारी मण्डळी कै खात्तर प्रायश्चित करकै बाहर ना लिकड़ै तब ताहीं कोए माणस मिलापआळे तम्बू म्ह ना रहवै। फेर वो लिकड़कै उस वेदी कै धोरै जो यहोवा कै स्याम्ही सै जावै अर उसकै खात्तर प्रायश्चित करै, यानिके बाछड़े कै लहू अर बकरे कै लहू दोनुआं म्ह तै कुछ लेकै उस वेदी कै च्यांरु कुण्यां कै सीन्गां पै लगावै। अर उस लहू म्ह तै कुछ अपणी आंगळी कै जरिये सात बार उसपै छिड़क कै उसनै इस्राएलियाँ की कई ढाळ की अशुद्धता तै छुड़ाकै शुद्ध अर पवित्र करै।”
प्रायश्चित का बकरा
“जिब वो पवित्र स्थान अर मिलापआळे तम्बू अर वेदी कै खात्तर प्रायश्चित कर ले, तो फेर वो जिन्दा बकरे नै आग्गै ल्यावै; अर हारुन अपणे दोन्नु हाथ्थां नै जिन्दा बकरे पै धरकै इस्राएलियाँ के सारे अधर्म के काम्मां, अर उनके सारे अपराध्धां, यानिके उनके सारे पापां नै मानकै, अर उन ताहीं बकरे कै सिर पै धरकै उसनै किसे माणस कै हाथ जो इस काम कै खात्तर त्यार हो जंगळ-बियाबान म्ह भेजकै छुड़वा दे। वो बकरा उनके सारे अधर्म के काम्मां नै अपणे उप्पर लादे होए किसे निर्जन देश म्ह ठा ले जावैगा; ज्यांतै वो माणस उस बकरे नै जंगळ-बियाबान म्ह छोड़ दे।”
“फेर हारुन मिलापआळे तम्बू म्ह आवै, अर जिस सणी की पोशाक नै पहरे होए वो अति पवित्रस्थान म्ह दाखल होया था उननै तारकै उड़ैए धरदे। फेर वो किसे पवित्र स्थान म्ह पाणी तै नहाकै अपणे कपड़े पैहर ले, अर बाहर जाकै अपणे होमबलि अर साधारण जनता कै होमबलि नै चढ़ाकै अपणे अर जनता कै खात्तर प्रायश्चित करै। अर पापबलि की चर्बी नै वो वेदी पै जळावै। अर जो माणस बकरे नै अजाजेल कै खात्तर छोड़कै आये वो भी अपणे कपड़ेयां नै, धोवै पाणी तै नहावै, अर फेर वो छावणी म्ह दाखल होवै। अर पापबलि का बाछड़ा अर पापबलि का बकरा भी जिनका लहू पवित्र स्थान म्ह प्रायश्चित करण कै खात्तर पोहचाया जावै वे दोन्नु छावणी तै बाहर भेज्जे जावै; अर उनका चमड़ा, माँस, अर गोबर आग म्ह जळा दिए जावै। अर जो उन ताहीं जळावै वो अपणे कपड़ेयां नै धोवै, अर पाणी तै नहावै, अर इसकै बाद वो छावणी म्ह दाखल हो पावै।”
पाप तै प्रायश्चित का दिन मानणा
“थारा खात्तर न्यू सदा की विधि होवैगी के सातमै महिन्ने कै दसवें दिन म्ह थम उपवास करियो, अर उस दिन कोए भी, चाहे वो थारे अपणे देश का हो चाहे थारै बिचाळै रहणआळे कोए परदेशी हो, कोए भी किसे ढाळ का काम-काज ना करै; क्यूँके उस दिन थमनै शुद्ध करण कै खात्तर थारै करकै प्रायश्चित करया जावैगा; अर थम अपणे सारे पापां तै यहोवा कै स्याम्ही पवित्र ठहरोगे। यो थारे खात्तर परमविश्राम का दिन ठहरै, अर थम उस दिन उपवास करियो अर किसे ढाळ का काम-काज ना करियो; यो सदा की विधि सै। अर जिसका अपणे पिता कै जगहां पै याजक पद कै खात्तर अभिषेक अर संस्कार करया जावै सै वो याजक प्रायश्चित करया करै, यानिके वो सणी के पवित्र कपड़ेयां नै पैहरकै, पवित्र स्थान, अर मिलापआळे तम्बू, अर वेदी कै खात्तर प्रायश्चित करै; अर याजकां कै अर मण्डळी के सारे माणसां कै खात्तर भी प्रायश्चित करै। अर यो थारै खात्तर आग्गै तक की विधि होवैगी, के इस्राएलियाँ कै खात्तर हरेक साल एक बार थारे सारे पापां कै खात्तर प्रायश्चित करया जावै।” यहोवा के इस हुकम कै मुताबिक जो उसनै मूसा तै दिया था, हारुन नै करया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.