Haryanvi Bible
विलापगीत 5
दोबारा बणाण की प्रार्थना
हे यहोवा, याद कर के हम पै के-के बित्या सै;
म्हारी ओड़ निगांह करकै म्हारी बदनाम्मी नै देख!
म्हारा हिस्सा परदेशियाँ का होग्या अर म्हारे घर दुसरयां के होगे सै।
हम अनाथ अर बिना बाप के होगे;
म्हारी माँ बिधवा जिसी होगी सै।
हम मोल लेकै पाणी पीवां सां,
म्हारे ताहीं लाकड़ी भी दाम तै मिलै सै।
भगाण आळे म्हारी नाड़ पै टूट पड़े सै;
हम थकगे सां, म्हारे ताहीं आराम न्ही मिलदा।
हम खुद, आप मिस्र के अधीन होगे,
अर अश्शूर के भी, ताके हम पेट भर सकां।
म्हारे पुरखां नै पाप करया, अर मर मिटे सै;
पर उनकै अधर्म के काम्मां का भार म्हारे ताहीं उठाणा पड़या सै।
म्हारे उप्पर दास हक राक्खैं सै;
उनकै हाथ तै कोए म्हारे ताहीं न्ही छुड़ान्दा।
जंगल म्ह की तलवार के कारण हम अपणे प्राण मुसीबत म्ह डाल कै खाण-पीण की चीज ले आवां सै।
भूख की झुलसाण आळी आग कै कारण,
म्हारा चमड़ा तंदूर की तरियां काळा होग्या सै।
सिय्योन म्ह जनान्नी,
अर यहूदा के नगरां म्ह कुवारियाँ भ्रष्ट करी गई सै।
हाकिम हाथ के बल टाँगें गए सै;
अर पुरनियां का कुछ भी आदर न्ही करया गया।
जवान्नां नै चाक्की चलाणी पड़ै सै;
अर बाल-बच्चे लाकड़ी का बोझ ठान्दे होए लड़खड़ावै सै।
इब फाट्टक पै पुरनिये न्ही बैठदे, ना जवान्नां का गीत सुणाई पड़ै सै।
म्हारे मन की खुशी जान्दी रही,
म्हारा नाचणा बिलाप म्ह बदल ग्या सै।
म्हारे सिर पै का मुकुट गिर पड़या सै;
म्हारे पै हाय, क्यूँके हमनै पाप करया सै!
इस कारण म्हारा मन कमजोर होग्या सै,
इन बात्तां तै म्हारी आँखां धुँधळी पड़गी सै,
क्यूँके सिय्योन पर्वत उजाड़ पड़या सै;
उस म्ह गाद्दड़ घूम्मै सै।
पर हे यहोवा, तू तो सदा तक विराजमान रहवैगा;
तेरा राज्य पीढ़ी-पीढ़ी बण्या रहवैगा।
तन्नै क्यूँ म्हारे ताहीं सदा कै खात्तर भूला दिया सै,
अर क्यूँ भोत घणे काल कै खात्तर म्हारे ताहीं छोड़ दिया सै?
हे यहोवा, म्हारे ताहीं अपणी ओड़ मोड़, फेर हम सुधर जावैंगे।
पुराणे बखत की तरियां म्हारे दिन बदलकै ज्यों के त्यों कर दे!
के तन्नै म्हारे ताहीं बिल्कुल त्याग दिया सै?
के तू म्हारे तै भोत घणा छो म्ह सै?
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.