Haryanvi Bible
न्यायियों 20
इस्राएलियाँ के जरिये युद्ध की त्यारी
फेर दान नगर तै लेकै बेर्शेबा नगर ताहीं के सारे इस्राएली अर गिलाद परदेस के माणस भी लिकड़े, अर उनकी मण्डळी एकमत होकै मिस्पा नगर म्ह यहोवा कै धोरै कठ्ठी होई। अर सारी प्रजा के प्रधान माणस, बलके सारे इस्राएली गोत्रां के माणस जो च्यार लाख तलवार चलाण आळे प्यादे थे, परमेसवर की प्रजा की सभा म्ह उपस्थित होए। (बिन्यामीनियाँ गोत्र के माणसां नै तो सुण्या के बाकी इस्राएली मिस्पा म्ह आए सैं।) अर इस्राएली पूछण लाग्गे, “म्हारै तै कहो, या बुराई किस तरियां अर कित्त होई?” उस मार डाली होई जनान्नी के लेवीय पति नै जवाब दिया, “मै अपणी रखैल समेत बिन्यामीन के गिबा म्ह रात बिताण खात्तर गया था। फेर गिबा के माणसां नै मेरे पै चढ़ाई करी, अर रात के बखत घर नै घेर कै मेरे ताहीं घात करणा चाह्या; अर मेरी रखैल तै इतणा कुकर्म करया के वा मरगी। फेर मन्नै अपणी रखैल ताहीं लेकै टुकड़े-टुकड़े करया, अर इस्राएलियाँ के हिस्से के सारे देश म्ह भेज दिया, उन ताहीं तो इस्राएल म्ह महापाप अर मूर्खता का काम करया सै। सुणो, हे इस्राएलियों, सारे के सारे देक्खो, अर उरैए अपणी सलाह द्यो।”
फेर सारे माणस एक मन होकै, उठकै कहण लाग्गे, “ना तो म्हारै म्ह तै कोए अपणे डेरयां म्ह जावैगा, अर ना कोए अपणे घर की और मुड़ैगा। पर इब हम गिबा नगर तै यो करागें, यानिके हम चिट्ठी डाल-डालकै उसपै चढ़ाई करांगे, अर हम सारे इस्राएली गोत्रां म्ह सौ माणसां म्ह तै दस, अर हजार माणसां म्ह तै एक सौ, अर दस हजार म्ह तै एक हजार माणसां नै ठहरावां, के वे सेना कै खात्तर भोजनवस्तु पोहचावै; ज्यांतै के हम बिन्यामीन के गिबा म्ह पोहचकै उसनै उस बेकूफी का पूरा फळ भुगता सकां जो उननै इस्राएल म्ह करी सै।” फेर सारे इस्राएली आदमी उस नगर कै बिरुध्द एक मकसद कै साथ मिलकै कठ्ठे होगे।
अर इस्राएली गोत्रियाँ नै बिन्यामीन के सारे गोत्रियाँ म्ह माणस ताहीं यो, पूछण नै भेज्जे, “यो के बुराई सै जो थारै म्ह करी गई सै? इब उन गिबावासी दुष्टां नै म्हारे हाथ कर द्यो, के हम उननै जान तै मारकै इस्राएल म्ह तै बुराई का नाश करां।” पर बिन्यामीनियाँ नै अपणे भाई इस्राएलियाँ की मानण तै इन्कार करया। अर बिन्यामीन अपणे-अपणे नगर म्ह तै आकै गिबा नगर म्ह ज्यांतै कठ्ठे होए, के बाकी इस्राएलियाँ तै लड़ण नै लिकड़ै। अर उसे दिन गिबावासी माणसां नै छोड़, जिनकी गिणती सात सौ चुणे होए माणस ठैहरी, अर नगरां तै आए होए तलवार चलाण आळे बिन्यामीनियाँ की गिणती छब्बीस हजार माणस ठैहरी। इन सारे माणसां म्ह तै सात सौ चुणे होए माणस थे, जो सारे के सारे खब्बे हाथ तै चलाण आळे थे के गोफन तै पत्थर मारण म्ह बाल भर भी ना चुके थे। अर बिन्यामीनियाँ नै छोड़ इस्राएली माणस च्यार लाख तलवार चलाण आळे थे; यो सारे के सारे योद्धा थे। सारे इस्राएली उठकै बेतेल म्ह गए, अर यो कहकै परमेसवर तै सलाह ली, अर इस्राएलियाँ नै पूच्छया, “म्हारै म्ह तै कौण बिन्यामीनियाँ तै लड़ण नै पैहले चढ़ाई करै?” यहोवा नै कह्या, “यहूदा का गोत्र पैहले चढ़ाई करै।” फेर इस्राएलियाँ नै सबेरै नै उठकै गिबा नगर कै स्याम्ही डेरे डाले। अर इस्राएली माणस बिन्यामीनियाँ तै लड़ण नै लिकड़गे; अर इस्राएली आदमियाँ ताहीं उसतै लड़ण नै गिबा कै बिरुध्द पाँति बाँधी फेर बिन्यामीनियाँ नै गिबा तै लिकड़ उसे दिन बाईस हजार इस्राएली आदमियाँ नै मारकै माट्टी म्ह मिल्या दिया। फेर भी इस्राएली आदमियाँ नै हियाव बाँधकै के उसे जगहां म्ह जित्त उननै पैहले दिन पाँति बाँधी थी, फेर पाँति बाँधी अर इस्राएली जाकै साँझ ताहीं यहोवा के स्याम्ही रोन्दे रहे; अर यो कहकै यहोवा तै पूच्छया, “के हम अपणे भाई बिन्यामीनियाँ तै लड़ण नै फेर धोरै जावां?” यहोवा नै कह्या, “हाँ, उनपै चढ़ाई करो।”
फेर दुसरे दिन इस्राएली बिन्यामीनियाँ कै उप्पर चढ़ाई करकै गये। फेर बिन्यामीनियाँ नै दुसरे दिन उनका सामना करण नै गिबा नगर तै लिकड़कै फेर अठारह हजार इस्राएली आदमियाँ नै मारकै, जो सारे के सारे तलवार चलाण आळे थे, माट्टी म्ह मिल्या दिया। फेर सारे इस्राएली, बलके सारे माणस बेतेल नगर म्ह गए; अर रोन्दे होए यहोवा कै स्याम्ही बैठ्ठे रहे, अर उस दिन साँझ ताहीं उपवास करया, अर यहोवा तै होमबलि अर मेलबलि चढ़ाए। अर इस्राएलियाँ नै यहोवा तै सलाह ली (उस बखत परमेसवर का वाचा का सन्दूक ओड़ैए था, अर पीनहास, जो हारुन का पोत्ता, अर एलीआजर का बेट्टा था उन दिनां म्ह उसके स्याम्ही हाजिर रह्या करै था।) उननै पूच्छया, “के हम एक और बार अपणे भाई बिन्यामीनियाँ तै लड़ण नै लिकड़या, या उननै छोड़ दें?” यहोवा नै कह्या, “चढ़ाई कर; क्यूँके कल मै उननै तेरे हाथ म्ह कर दियुँगा।” फेर इस्राएलियाँ नै गिबा के च्यांरु और माणसां ताहीं घात म्ह बैठाया।
तीसरी बार इस्राएलियाँ नै बिन्यामीनियाँ पै फेर चढ़ाई करी, अर पैहले की तरियां गिबा के बिरुध्द पाँति बाँधी फेर बिन्यामीन उन माणसां का सामना करण नै लिकड़े, अर नगर कै धोरै तै खींचे गए; अर जो दो सड़क, एक बेतेल नै अर दुसरी गिबा नगर म्ह गई सै, उन म्ह माणसां नै पैहले की तरियां मारण लाग्गे, अर मैदान म्ह कोए तीस इस्राएली मारे गए। बिन्यामीन कहण लाग्गे, “वे पैहले की तरियां म्हारै तै मारे जावैं सैं।” पर इस्राएलियाँ नै कह्या, “हम भाजकै उननै नगर म्ह तै सड़कां म्ह खींच ले आवां।” फेर सारे इस्राएली माणसां नै अपणे जगहां तै उठकै बालतामार नगर म्ह पाँति बाँधी; अर घात म्ह बैठ्ठे होए इस्राएली अपणे जगहां तै, यानिके मारेगेवा तै चाणचक लिकड़े। फेर सारे इस्राएलियाँ म्ह तै छाँटे होए दस हजार माणस गिबा कै स्याम्ही आए, अर घोर लड़ाई होण लाग्गी; पर वे ना जाणै थे के म्हारे पै विपत्ति इब्बे पड़णा चाहवै सै। फेर यहोवा नै बिन्यामीनियाँ ताहीं इस्राएल तै हरवा दिया, अर उस दिन इस्राएलियाँ नै पच्चीस हजार एक सौ बिन्यामीन माणसां नै नाश करया, जो सारे के सारे तलवार चलाण आळे थे। फेर बिन्यामीनियाँ नै देख्या के हम हारगे। अर इस्राएली माणस उन छिपे होए लोगां का भरोस्सा करकै जिननै उन ताहीं गिबा कै धोरै बैठाया था बिन्यामीनियाँ के स्याम्ही तै चले गए। पर घातक माणस फुर्ती करकै गिबा पै झपटे; अर घातकां नै आग्गै बढ़कै सारे नगर ताहीं तलवार तै मारया। इस्राएली आदमियाँ अर सारी जगहां लुह्के होए माणसां कै बीच तो यो निशान ठहराया गया था, के वे नगर म्ह तै घणा बड़ा धुएँ का खम्बा उठावै। इस्राएली माणस तो लड़ाई म्ह तै हटण लाग्गे, अर बिन्यामीनियाँ नै यो कहकै के पक्का वे पैहली लड़ाई की तरियां म्हारै तै हारे जावैं सैं, इस्राएलियाँ नै मार गेरण लाग्गे, अर तीस एक माणसां ताहीं घात करया। पर जिब वो धुएँ का खम्बा नगर म्ह तै उठण लाग्या, फेर बिन्यामीनियाँ नै अपणे पाच्छै जो नजर करी तो के देख्या, के नगर का नगर धुआँ होकै अकास की और उड़ण लाग रह्या सै। फेर इस्राएली माणस घूम्मे, अर बिन्यामीन माणस यो देखकै घबरागे, के म्हारै पै विपत्ति आ पड़ी सै। ज्यांतै उननै इस्राएली आदमियाँ तै पीठ दिखाकै जंगळ का राह लिया; पर लड़ाई उनतै होन्दी ए रही, अर जो और नगरां म्ह तै आए थे उन ताहीं इस्राएली रास्ते म्ह नाश करदे गए। उननै बिन्यामीनियाँ ताहीं घेर लिया, अर उननै खदेड़ा, वे मनुहा नगर म्ह बलके गिबा के पूर्व की ओड़ ताहीं उननै लताड़न्दे गए। अर बिन्यामीनियाँ म्ह तै अठारह हजार माणस जो सारे के सारे शूरवीर थे मारे गए। फेर वे घूमकै बियाबान म्ह की रिम्मोन नाम की चट्टान की और तो भाजगे; पर इस्राएलियाँ नै उन म्ह तै पाँच हजार ताहीं चुण-चुणकै सड़कां पै मार गेरया; फेर गिदोम ताहीं उनकै पाच्छै पड़कै उन म्ह तै दो हजार माणस मार गेरे। फेर बिन्यामीनियाँ म्ह तै जो उस दिन मारे गए वे पच्चीस हजार तलवार चलाण आळे माणस थे, अर यो सारे शूरवीर थे। पर छः सौ माणस घूमकै जंगळ की और भाग गये, अर रिम्मोन नाम की चट्टान म्ह पोहचगे, अर च्यार महिन्ने ओड़ैए रहे। फेर इस्राएली माणस बोहड़कै बिन्यामीनियाँ पै लपके अर नगरां म्ह के माणस, के पशु, जो किमे मिल्या, सारया ताहीं तलवार तै नाश कर डाल्या। अर जितने नगर उननै मिले उन सारया ताहीं आग लगाकै फूँक दिया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.