Haryanvi Bible
न्यायियों 18
दानियां का मीका की मूर्तिपूजा नै अपणाणा
उन दिनां म्ह इस्राएलियाँ का कोए राजा ना था। अर उन दिनां म्ह दानियां के गोत्र के माणस रहण कै खात्तर कोए हिस्सा ढूँढ़ण लागरे थे; क्यूँके इस्राएली गोत्रां के बिचाळै उनका हिस्सा उस बखत ताहीं ना मिल्या था। फेर दानियां नै अपणे सारे कुल म्ह तै पाँच शूरवीरां ताहीं सोरा नगर अर एश्ताओल नगर तै देश का भेद लेण अर उस म्ह छाणबीन करण खात्तर यो कहकै भेज दिया, “जाकै देश म्ह छाणबीन करो।” ज्यांतै वे एप्रैम की पहाड़ी देश म्ह मीका के घर म्ह जाकै ओड़ै रात बिताई। जिब वे मीका के घर कै धोरै आए, फेर उस जवान लेवीय का बोल पिच्छाण्या; ज्यांतै ओड़ै मुड़कै उसतै पूछ्या, “तन्नै उरै कौण ले आया? अर तू उरै के करै सै? अर उरै तेरे धोरै के सै?” उसनै उनतै कह्या, “मीका नै मेरे तै इसा-इसा बरताव करया सै, अर मेरै ताहीं काम पै राख्या सै, अर मै उसका पुरोहित होग्या सूं।” उननै उसतै कह्या, “परमेसवर तै सलाह ले, के हम जाण लेवां के जो यात्रा हम करां सां वो सफल होवैगी या न्ही।” पुरोहित नै उनतै कह्या, “बेफिकर होकै चले जाओ। जो यात्रा थम करो सो उसपै यहोवा की कृपादृष्टि सै।”
फेर वे पाँच माणस चाल पड़े, अर लैश नगर म्ह जाकै ओड़ै के माणसां ताहीं देख्या के सीदोनियां नगर के बराबर निडर, बेखटके, अर शान्ति तै रहवैं सैं; अर इस देश का कोए अधिकारी न्ही सै, जो उननै किसे काम म्ह रोकै, अर ये सीदोनियां तै दूर रहवैं सैं, अर दुसरे माणसां तै कोए बरताव न्ही राखदे। फेर वे सोरा अर एश्ताओल नगर म्ह अपणे भाईयाँ कै धोरै गए, अर उनके भाईयाँ नै उनतै पूच्छया, “थम के खबर ल्याए सों?” उननै कह्या, “आओ, हम उन माणसां पै चढ़ाई करां; क्यूँके हमनै उस देश ताहीं देख्या के वो घणा आच्छा सै। थम क्यूँ चुपचाप रह्यो सो? ओड़ै चालकै उस देश नै अपणे वश म्ह कर लेण म्ह आलस ना करो। ओड़ै पोहचकै थम निडर रहन्दे होए माणसां नै, अर लाम्बा-चौड़ा देश पाओगे; अर परमेसवर नै उस ताहीं थारे हाथ म्ह दे दिया सै। वो इसी जगहां सै जिस म्ह धरती भर के किसे पदार्थ की घटी न्ही सै।”
फेर ओड़ै तै यानिके सोरा अर एश्ताओल नगर तै दानियां के कुल के छः सौ माणसां नै युद्ध के हथियार बाँधकै प्रस्थान करया। उननै जाकै यहूदा देश के किर्यत्यारीम नगर म्ह डेरे खड़े करे। इस कारण उस जगहां का नाम महनेदान आज ताहीं पड़या सै, वो तो किर्यत्यारीम नगर के पश्चिम की ओड़ सै। ओड़ै तै वे आग्गै बढ़कै एप्रैम की पहाड़ी देश म्ह मीका के घर कै धोरै आए।
फेर जो पाँच माणस लैश नगर के देश का भेद लेण गए थे, वे अपणे भाईयाँ तै कहण लाग्गे, “के थम जाणो सो के इन घरां म्ह एक एपोद, कई एक गृहदेवता, एक खुदी अर एक ढळी होई मूर्ति सै? इस करकै इब सोच्चो, के करणा चाहिये।” वे औड़ै मुड़कै उस जवान लेवीय के घर गए, जो मीका का घर था, अर उसका हाल-चाल पूच्छया। अर वे छः सौ दानी माणस फाटक म्ह हथियार बाँधे होए खड़े रहे। अर जो पाँच माणस देश का भेद लेण गए थे, उननै ओड़ै घुसकै उस खुदी होई मूर्ति, अर एपोद, अर गृहदेवत्यां, अर ढळी होई मूर्ति ताहीं ले लिया, अर वो पुरोहित फाटक म्ह उन हथियार बाँधे होए छः सौ माणसां कै गैल खड़या था। जिब वे पाँच माणस मीका के घर म्ह घुसकै खुदी होई मूर्ति, एपोद, गृहदेवता, अर ढळी होई मूर्ति नै ले आए थे, फेर पुरोहित नै उनतै पूच्छया, “यो थम के करो सो?” उननै उसतै कह्या, “चुप रह, अपणे मुँह नै हाथ तै बन्द कर, अर म्हारै गैल चालकै, म्हारे खात्तर पिता कै समान अर पुरोहित बण। तेरे खात्तर के आच्छा सै? यो, के एक ए माणस के घराने का पुरोहित हो, या यो, के इस्राएलियाँ के एक गोत्र अर कुल का पुरोहित हो?” फेर पुरोहित खुश होया, ज्यांतै वो एपोद, गृहदेवता, अर खुदी होई मूर्ति नै लेकै उन माणसां के गैल चल्या गया।
फेर वे मुड़े, अर बाल-बच्यां, पशुआं, अर सामान नै अपणे आग्गै करकै चाल पड़े। जिब वे मीका के घर तै दूर लिकड़गे थे, फेर जो माणस मीका के घर कै धोरै आळे घरां म्ह रहवैं थे उननै कठ्ठे होकै दानियां ताहीं जा लिया। अर दानियां नै पुकारया, फेर उननै मुँह फेरकै मीका तै कह्या, “तेरै के होया के तू इतणा बड़ा दल लिए आवै सै?” उसनै कह्या, “थम तो मेरे बणवाए होए देवत्यां अर पुरोहित नै ले चाल्ले सो; फेर मेरै धोरै के रहग्या? तो थम मेरे ताहीं क्यूँ पूच्छो सो के तेरै के होया सै?” दानियां नै उसतै कह्या, “तेरा बोल हम माणसां म्ह सुणाई ना दे, कदे इसा ना हो के क्रोधी माणस थारै पै प्रहार करैं अर तू अपणा अर अपणे घर के माणसां के भी प्राण नै खो देवै।” फेर दानियां नै अपणा राह लिया; अर मीका यो देखकै के वे मेरे तै घणे बलवन्त सैं मुड़कै अपणे घर बोहड़ ग्या।
फेर वे मीका की बणवाई होई चिज्जां अर उसके पुरोहित नै गैल ले लैश कै धोरै आए, जिसके माणस शान्ति तै अर बेफिकर रहवैं थे, अर उननै उन ताहीं तलवार तै मार गेरया, अर नगर ताहीं आग लगाकै जळा दिया। अर कोए बचाण आळा ना था, क्यूँके वो सीदोन नगर तै दूर था, अर वे और माणसां तै कोए बरताव ना राक्खै थे। अर वो बेत्रहोब नगर की तराई म्ह था। फेर उन ताहीं नगर नै दृढ़ करया, अर उस म्ह रहण लाग्गे। अर उन ताहीं उस नगर का नाम इस्राएल के एक बेट्टे अपणे मूलपुरुष दान के नाम पै दान धरया; पर पैहले तो उस नगर का नाम लैश था। फेर दानियां नै उस खुदी होई मूर्ति ताहीं खड़या कर लिया; अर देश की गुलाम्मी के बखत वो यहोनातान जो गेर्शोम का बेट्टा अर मूसा का पोत्ता था, वो अर उसके वंश के माणस दान गोत्र के पुरोहित बणे रहे। अर जिब ताहीं शीलो नगर म्ह परमेसवर की आराधना होन्दी रही, तब ताहीं वे मीका की खुदवाई होई मूर्ति नै स्थापित करे रहे।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.