Haryanvi Bible
यिर्मयाह 41
गदल्याह के खिलाफ बिद्रोह
साल के सातवें महिन्ने म्ह इसा होया के इश्माएल जो नतन्याह का बेट्टा अर एलीशामा का पोत्ता अर राजवंश का अर राजा के प्रधान माणसां म्ह तै था, वो दस आदमी गैल लेकै मिस्पा म्ह अहीकाम के बेट्टे गदल्याह कै धोरै आया। ओड़ै मिस्पा म्ह उननै एक साथ भोजन करया। फेर नतन्याह के बेट्टे इश्माएल अर उसके गैल के दस जण्या नै उठकै गदल्याह ताहीं, जो अहीकाम का बेट्टा अर शापान का पोत्ता था, अर जिस ताहीं बाबेल के राजा नै देश का अधिकारी ठहराया था, उसनै तलवार तै इसा मारया के वो मर ग्या। इश्माएल नै गदल्याह कै गैल जितने यहूदी मिस्पा म्ह थे, अर जो कसदी योद्धा ओड़ै मिले, उन सारया ताहीं मार दिया।
गदल्याह ताहीं मार गेरण कै दुसरे दिन जिब कोए इस ताहीं ना जाणै था, फेर शेकेम अर शीलो अर सामरिया तै अस्सी माणस दाढ़ी मुँण्डवाए, कपड़े पाड़े, शरीर चीरे होए अर हाथ म्ह अन्नबलि अर लोबान लिए होए, यहोवा के भवन म्ह जान्दे दिखाई दिए। फेर नतन्याह का बेट्टा इश्माएल उनतै मिलण नै मिस्पा तै लिकड़या, अर रोन्दा होया चल्या। जिब वो उनतै मिल्या, फेर कह्या, “अहीकाम के बेट्टे गदल्याह कै धोरै चलो।” जिब वे उस नगर म्ह आए फेर नतन्याह के बेट्टे इश्माएल नै अपणे गैल के साथियाँ समेत उन ताहीं घात करकै खड्डे म्ह फेंक दिया। पर उन म्ह तै दस माणस इश्माएल तै कहण लाग्गे, “म्हारे ताहीं ना मार; क्यूँके म्हारे धोरै मैदान म्ह धरया होया कणक, जौ, तेल अर मधु सै।” इस करकै उसनै उन ताहीं छोड़ दिया अर उनके भाईयाँ के गैल न्ही मारया।
जिस खड्डे म्ह इश्माएल नै उन माणसां की सारी लाश जिननै उसनै मारया था, गदल्याह की लाश कै धोरै फेंक दी थी1, (यो वोए खड्डा सै जिसनै आसा राजा नै इस्राएल के राजा बाशा के डरकै मारे खुदवाया था), उस ताहीं नतन्याह के बेट्टे इश्माएल नै मारे होया तै भर दिया। फेर जो माणस मिस्पा म्ह बचे होए थे, यानिके राजकुमारियाँ अर जितने और माणस मिस्पा म्ह रहगे थे जिननै अंगरक्षकां के प्रधान नबूजरदान नै अहीकाम के बेट्टे गदल्याह ताहीं सौंप दिया था, उन सारया नै नतन्याह का बेट्टा इश्माएल कैदी बणाकै अम्मोनियाँ के धोरै ले जाण नै चल्या।
जिब कारेह के बेट्टे योहानान नै और योद्धा के दलां के उन सारे प्रधानां नै जो उसके गैल थे, सुण्या के नतन्याह के बेट्टे इश्माएल नै या सारी बुराई करी सै, फेर वे सारे जण्या नै लेकै नतन्याह के बेट्टे इश्माएल तै लड़ण नै लिकड़े अर उस ताहीं उस महा कुण्ड के धोरै पाया जो गिबोन म्ह सै2। कारेह के बेट्टे योहानान नै, अर दलां के सारे प्रधानां नै देखकै जो उसकै गैल थे, इश्माएल कै गैल जो माणस थे, वे सारे आनन्दित होए। जितने माणस नै इश्माएल मिस्पा तै कैदी बणाकै लिए जावै था, वे पलटकै कारेह के बेट्टे योहानान कै धोरै चले आये। पर नतन्याह का बेट्टा इश्माएल आठ माणस समेत योहानान कै हाथ तै बचकै अम्मोनियाँ के धोरै चल्या गया। फेर प्रजा म्ह तै जितने बचगे थे, यानिके जिन योद्धा, जनानियाँ, बाल-बच्यां अर खोज्यां नै कारेह का बेट्टे योहानान, अहीकाम के बेट्टे गदल्याह के मिस्पा म्ह मारे जाणकै बाद नतन्याह के बेट्टे इश्माएल कै धोरै तै छुड़ाकै गिबोन तै फेर ले आया था, उननै वो अपणे सारे गैल के दलां के प्रधानां समेत लेकै चाल पड्या। बैतलहम कै धोरै जो किम्हाम की सराय सै, उस म्ह वे इस करकै टिक ग्ये के मिस्र म्ह जावै।3 क्यूँके वे कसदियाँ तै डरै थे; इसका कारण यो था के अहीकाम का बेट्टा गदल्याह जिसनै बाबेल के राजा नै देश का अधिकारी ठहराया था, उसनै नतन्याह के बेट्टे इश्माएल ताहीं मार दिया था।
Source notes (3)
- Footnote गदल्याह की लाश कै धोरै फेंक दी थी यानिके जिब गदल्याह ताहीं मारया था फेर इश्माएल नै गदल्याह की मृतक देह के गैल दुसरे तीर्थ यात्रियाँ ताहीं भी मारकै गेर दिया था।
- Footnote महा कुण्ड के धोरै पाया जो गिबोन म्ह सै यो खुल्या तालाब इब भी गिबोन म्ह सै ओड़ै एक बड़ा भूमध्य महा कुण्ड सै जिसके प्राकृतिक चोयां म्ह तै पाणी आवै सै। गिबोन मिस्पा के जवाब म्ह तीन किलोमीटर दूरी पै था।
- Footnote 2 शमू. 19:31-40
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.