Haryanvi Bible
यिर्मयाह 38
जेळ म्ह यिर्मयाह ताहीं गेरया जाणा
एक दिन जो वचन यिर्मयाह सारे माणसां तै कहवै था, उननै मत्तान के बेट्टे शपत्याह, पशहूर के बेट्टे गदल्याह, शेलेम्याह के बेट्टे यहूकल अर मल्किय्याह के बेट्टे पशहूर नै सुणा, “यहोवा न्यू कहवै सै के जो कोए इस यरुशलेम नगर म्ह रहवैगा वो तलवार, काळ अर मरी तै मरैगा; पर जो कोए कसदियाँ कै धोरै लिकड़ जावै वो अपणी जान बचाकै जिन्दा रहवैगा। यहोवा न्यू कहवै सै, यो नगर बाबेल के राजा की सेना कै बस म्ह कर दिया जावैगा अर वो इसनै ले लेवैगा।” इस करकै उन हाकिमां नै सिदकिय्याह राजा तै कह्या, “उस माणस ताहीं मरवा गेर, क्यूँके वो जो इस नगर म्ह बचे होए योद्धा अर दुसरे सारे माणसां तै इसे-इसे वचन कहवै सै जिसतै उनके हाथ-पैर ढील्ले हो जावै सैं। क्यूँके वो माणस इस प्रजा के माणसां की भलाई न्ही बलके बुराई ए चाहवै सै।” सिदकिय्याह राजा नै कह्या, “सुणो, वो तो थारे बस म्ह सै; क्यूँके इसा न्ही हो सकदा के राजा थारे खिलाफ कुछ कर सकै1।” फेर उननै यिर्मयाह ताहीं लेकै राजपुत्र मल्किय्याह के उस खड्डे म्ह जो पहरे कै आँगण म्ह था, रस्सियाँ तै तारकै गेर दिया। अर उस खड्डे म्ह पाणी न्ही सिर्फ दलदल थी, अर यिर्मयाह कीचड़ म्ह धस ग्या।
उस बखत राजा बिन्यामीन कै फाटक कै धोरै बैठ्या था फेर जिब एबेदमेलेक कूशी नै जो राजभवन म्ह एक खोजा था, सुणा, के उननै यिर्मयाह ताहीं खड्डे म्ह गेर दिया सै। फेर एबेदमेलेक राजभवन तै लिकड़कै राजा तै कहण लाग्या, “हे मेरे माल्लिक, हे राजा, उन माणसां नै यिर्मयाह नबी तै जो कुछ करया सै वो बुरा करया सै, क्यूँके उननै उस ताहीं खड्डे म्ह गेर दिया सै; ओड़ै वो भूख तै मर जावैगा क्यूँके नगर म्ह कुछ रोट्टी न्ही रही सै।” फेर राजा नै एबेदमेलेक कूशी ताहीं या हुकम दिया, “उरै तै तीस माणस गैल लेकै यिर्मयाह नबी ताहीं मरण तै पैहले खड्डे म्ह तै लिकाड़।” आखर म्ह एबेदमेलेक उतने माणसां ताहीं गैल लेकै राजभवन के भण्डार कै जेळ म्ह गया; अर ओड़ै तै पाट्टे-पुराणे लत्ते अर चिथड़े लेकै यिर्मयाह के धोरै उस खड्डे म्ह रस्सियाँ तै तार दिए। फेर एबेदमेलेक कूशी नै यिर्मयाह तै कह्या, “ये पुराणे लत्ते अर चिथड़े अपणी कांख म्ह रस्सियाँ के नीच्चै रख ले।” यिर्मयाह नै उसाए करया। फेर उननै यिर्मयाह ताहीं रस्सियाँ तै खींचकै, खड्डे म्ह तै लिकाड़या। अर यिर्मयाह पहरे कै आँगण म्ह रहण लाग्या।
सिदकिय्याह का भय अर यिर्मयाह की सलाह
सिदकिय्याह राजा नै यिर्मयाह नबी ताहीं यहोवा कै भवन के तीसरे द्वार म्ह अपणे धोरै बुलावा भेज्या। अर राजा नै यिर्मयाह तै कह्या, “मै तेरै तै एक बात पूच्छ सूं; मेरे तै कुछ ना छिप्या।” यिर्मयाह नै सिदकिय्याह तै कह्या, “जै मै तेरे तै बताऊँ, तो के तू मेरे ताहीं मरवा ना देवैगा? अर चाहे मै तेरे ताहीं सलाह भी दियुँ, तोभी तू मेरी ना मान्नैगा।” फेर सिदकिय्याह राजा नै एक्ले म्ह यिर्मयाह तै कसम खाई, “यहोवा जिसनै म्हारा यो जीव रच्या सै, उसके जीवन की कसम ना मै तो तेरे ताहीं मरवा देऊँगा, अर ना उन माणसां कै बस म्ह कर देऊँगा जो तेरे जान की खोज म्ह सैं।”
यिर्मयाह नै सिदकिय्याह तै कह्या, “सेनाओं का परमेसवर यहोवा जो इस्राएल का परमेसवर सै, वो न्यू कहवै सै, जै तू बाबेल के राजा के हाकिमां कै धोरै सचमुच चल्या जावै, फेर तो तेरी जान बचैगी, अर यो नगर फूँक्या न्ही जावैगा, अर तू अपणे घराने समेत जिन्दा रहवैगा। पर, जै तू बाबेल के राजा के हाकिमां कै धोरै ना चल्या जावै, तो या नगर कसदियाँ के बस म्ह कर दिया जावैगा, अर वे इसनै फूँक देवैंगे, अर तू उनकै हाथ तै बच ना सकैगा।” राजा सिदकिय्याह नै यिर्मयाह तै कह्या, “जो यहूदी माणस कसदियाँ कै धोरै भाजगे सैं, मै उनतै डरु सूं, इसा ना हो के मै उनकै बस म्ह कर दिया जाऊँ अर वे मेरे तै मजाक करै।” यिर्मयाह नै कह्या, “तू उनकै बस म्ह ना कर दिया जावैगा; जो कुछ मै तेरै तै कहूँ सूं उसनै यहोवा की बात समझकै मान ले फेर तेरा भला होवैगा, अर तेरी जान बचैगी। पर जै तू चल्या जाणा मान ना लेवै तो जो बात यहोवा नै मेरे तै दर्शन कै जरिये बताई सै, वो या सै: देख, यहूदा के राजा कै रणवास म्ह जितनी जनानियाँ रहगी सैं, वे बाबेल के राजा के हाकिमां के धोरै लिकाड़कै पोहचाई जावैगी, अर वे तेरै तै कहवैंगी, ‘तेरे दोस्तां नै तेरे ताहीं बहकाया, अर उनकी इच्छा पूरी होगी; अर जिब तेरे पैर कीचड़ म्ह धस गये तो वे पाच्छै हट ग्ये सैं।’ तेरी सारी जनान्नी अर बाल-बच्चे कसदियाँ के धोरै लिकाड़कै पोहचाये जावैंगे; अर तू भी कसदियाँ कै हाथ तै ना बचैगा, बलके तेरे ताहीं पकड़कै बाबेल के राजा कै बस म्ह कर दिया जावैगा अर इस नगर के फूँके जाणे का कारण तू ए होवैगा।”
फेर सिदकिय्याह नै यिर्मयाह तै कह्या, “इन बात्तां ताहीं कोए ना जाणण पावै, तो तू मारया ना जावैगा। जै हाकिम माणसां या सुणकै के मन्नै तेरै तै बातचीत करी सै तेरै धोरै आकै कहण लाग्गे, ‘हमनै बता के तन्नै राजा तै के कह्या, म्हारै तै कोए बात ना छिप्या, अर हम तेरे ताहीं ना मरवा देवांगे; अर न्यू भी बता, के राजा नै तेरै तै के कह्या,’ तो तू उनतै कहणा, ‘मन्नै राजा तै गिड़गिड़ाकै बिनती करी थी के मेरे ताहीं योनातान के घर म्ह फेर दोबारा ना भेज न्ही तो ओड़ै मर जाऊँगा।’” फेर सारे हाकिमां नै यिर्मयाह के धोरै आकै पूच्छया, अर जिसा राजा नै उस ताहीं हुकम दिया था, ठीक उसाए उसनै उन ताहीं जवाब दिया। इस करकै वे उसतै और कुछ ना बोल्ले अर ना वो भेद खुल्या। इस तरियां जिस दिन यरुशलेम ले लिया गया उस दिन ताहीं वो पहरे के आँगण ए म्ह रह्या।
Source notes (1)
- Footnote इसा न्ही हो सकदा के राजा थारे खिलाफ कुछ कर सकै वास्तविक सत्ता तो उनके हाथां म्ह ए थी अर जिब उननै यिर्मयाह खात्तर मृत्युदण्ड तय करया फेर राजा म्ह इन्कार करण की हिम्मत न्ही थी।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.