Haryanvi Bible
यशायाह 34
राष्ट्रों कै खिलाफ परमेसवर का छो
हे जात्ति-जात्ति के माणसों, सुणण खात्तर धोरै आओ, अर हे राज्य-राज्य के माणसों, ध्यान तै सुणो! धरती भी, अर जो कुछ उस म्ह सै, जगत अर जो कुछ उस म्ह पैदा होवै सै, सब सुणो। यहोवा सारी जातियाँ पै छो करण लाग रहया सै, अर उनकी सारी सेना पै उसकी जळजळाहट भड़की होई सै1, उसनै उन ताहीं सत्यानाश होण, अर संहार होण खात्तर छोड़ दिया सै। उनके मारे होए फेंक दिये जावैंगे, अर उनकी लाशां की दुर्गन्ध उठैगी; उनके लहू तै पहाड़ गळ जावैंगे। अकास2 के सारे गण जान्दे रहवैंगे अर अकास कागज की तरियां लपेट्या जावैगा। अर जिस तरियां दाखलता या अंजीर के पेड़ के पत्ते मुर्झाकै गिर जावै सैं, उस्से तरियां उसके सारे गण धुँधळे होकै जान्दे रहवैंगे।
क्यूँके3 मेरी तलवार अकास म्ह पीकै छिकगी सै; देक्खो, वो न्याय करण ताहीं एदोम पै, अर जिनपै मेरा श्राप सै उनपै पड़ैगी। यहोवा की तलवार लहू तै भरगी सै4, वो चर्बी तै अर भेड्डां के बच्चयां अर बकरयां के लहू तै, अर मिंढयाँ के गुर्दे की चर्बी तै छिकी होई सै। क्यूँके बोस्रा शहर म्ह यहोवा का एक यज्ञ अर एदोम देश म्ह बड़ा संहार होया सै। एदोमियां म्ह रहण आळा की गैल जंगळी सांड अर बाछड़े अर बळध वध होवैंगें, अर उनकी धरती लहू तै भीग जावैगी अर ओड़ै की माट्टी चर्बी तै सुन्न हो जावैगी।
क्यूँके बदला लेण खात्तर यहोवा का एक दिन अर सिय्योन का मुकद्दमा चुकाण का एक साल ठहराया सै। अर एदोम की नदियाँ राल तै अर उसकी माट्टी गन्धक तै बदल जावैगी; उसकी धरती जळदी होई राल बण जावैगी। वो5 रात-दिन ना बुझैगी; उसका धुम्मा सदा उठदा रहवैगा। युग-युग वो उजाड़ पड़या रहवैगा; कोए उस म्ह तै होकै कदे न्ही चाल्लैगा। उस6 म्ह धनेश पक्षी अर साही पाए जावैंगे अर वो उल्लू अर काग का बसेरा होगा। वो उसपै गड़बड़ की डोरी अर सुनसान्नी का साहुल ताणैगा। ओड़ै7 ना तो रईस होवैंगें अर ना इसा कोए होगा जो राज्य करण ताहीं ठहराया जावै; उसके सारे हाकिमां का अन्त होगा।
उसके महल्लां म्ह कटिले दरखत, गढां म्ह बिच्छु पौधे अर झाड़ उगैंगे। वा गादड़ां के रहण की जगहां अर शुतुर्मुर्गों का आँगण हो जावैगा। एदोम8 म्ह निर्जल देश के जन्तु गादड़ां कै गैल मिलकै बसैंगे अर जंगळी बकरी एक दुसरे नै बुलावैंगे; ओड़ै कोतरी नाम का जन्तु रहण की जगहां पाकै चैन तै रहवैगा।
ओड़ै मादा उल्लू घोंसला बणावैगी; वे अण्डे देकै उननै सेवैगी अर अपणी छाया म्ह बटोर लेंगी; ओड़ै गिद्ध अपणी साथ्थण कै गैल कठ्ठे रहवैंगे। यहोवा की किताब म्ह ढूँढ कै पढ़ो: इन म्ह तै एक भी बात बिना पूरा होए ना रहवैगी; कोए बिना जोड़ा ना रहवैगा। क्यूँके मन्नै अपणे मुँह तै यो हुकम दिया सै अर उसे की आत्मा नै उन ताहीं कठ्ठा करया सै। यहोवा नै उनकै खात्तर चिट्ठी गेरी, उस्से नै अपणे हाथ तै डोरी डालकै उस देश ताहीं उनकै खात्तर बाँट दिया सै; वो सदा उनका ए बण्या रहवैगा अर वे पीढ़ी तै पीढ़ी ताहीं उस म्ह बसे रहवैंगे।
Source notes (8)
- Footnote यहोवा अपणी प्रजा के सारे बिरोधी देशां पै अपणा छो प्रगट करैगा।
- Footnote अकास मत्ती 24:29; मर. 13:25; लूका. 21:26; 2 पत. 3:12; प्रका. 6:13,14
- Footnote क्यूँके एदोमियां म्ह रहण आळा का यहूदा म्ह रहण आळा के गैल झगड़ा रहवै था
- Footnote उरै संकेत पापबलियाँ का सै जिन म्ह लहू अर चर्बी परमेसवर ताहीं चढ़ाई जाया करदी।
- Footnote वो प्रका. 14:11; प्रका. 19:3
- Footnote उस प्रका. 18:2; सप. 2:14
- Footnote ओड़ै प्रका. 6:15
- Footnote एदोम प्रका. 18:2
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.