यशायाह 27

इस्राएल का उद्धार

1उस1 बखत यहोवा अपणी कड़ी, बड़ी, अर मजबूत तलवार तै लिव्यातान नाम का तेज अर टेढ़े चाल्‍लण आळे साँप नै सजा देवैगा, अर जो अजगर समुन्दर म्ह रहवै सै उस नै भी घात करैगा।

2उस बखत एक सुन्दर दाख की बारी होवैगी, थम उसका गुणगान गाईयो! 3मै यहोवा उसकी हिफाजत करुँ सूं; मै पल-पल उस नै सींचदा रहूँगा।2 मै रात-दिन उसकी हिफाजत करदा रहूँगा इसा ना हो के कोए उसका नुकसान करै। 4मेरे मन म्ह जळजळाहट न्ही सै। जै कोए ढाळ-ढाळ के कटिले दरखत मेरै तै लड़ण नै खड़े करदा, तो मै उनपै पाँव बढ़ाकै उननै पूरी तरियां तै भस्म कर देन्दा। 5या बैरी मेरे गैल मेल करण नै वे मेरी शरण लें, वे मेरै साथ मेल कर लें।

6भविष्य म्ह याकूब जड़ पकड़ैगा, अर इस्राएल फुल्‍लै-फळैगा, अर उसके फळां तै जगत भर जावैगा।

7के उसनै उस ताहीं मारया जिस तरियां उसनै उसके मारण आळयां ताहीं मारया था? के वो घात करया गया जिस तरियां उसके घात करे होए घात होए? 8जिब तन्‍नै उस (इस्राएल) ताहीं देश तै लिकाड़या, फेर सोच विचार कै उस ताहीं दुःख दिया: उसनै पुरवाई के दिन उस ताहीं घणी तेज आन्धी तै उड़ा दिया सै। 9इसतै याकूब के अधर्म का प्रायश्चित करया जावैगा अर उसके पाप के दूर होण का प्रतिफळ या होवैगा के वे वेदी के सारे पत्थरां ताहीं चुन्‍ना बणाण के पत्थरां की तरियां चकणाचूर करैंगे, अर अशेरा देवी अर सूरज की मूर्ति फेर खड़ी ना रहवैंगी। 10क्यूँके गढ़आळा नगर3 निर्जन होया सै, वो छोड्डी होई बस्ती की तरियां निर्जन अर बियाबान होग्या सै; ओड़ै बाछड़े चरैंगे अर ओड़ैए बैठेंगे, अर दरखतां की डालियाँ की फुंगळ ताहीं खा लेवैंगे। 11जिब उसकी डाळी सूख जावैं फेर तोड़ी जावैंगी4; अर जनान्‍नी आकै उन ताहीं तोड़कै जळा देवैगी। क्यूँके ये माणस निर्बुध्दि सैं; इस करकै उनका कर्ता इब उनपै और दया न्ही करैगा, अर उनका रचणआळा उनपै अनुग्रह न्ही करैगा।

12उस बखत यहोवा फरात नदी तै लेकै मिस्र के नाळे ताहीं अपणे अन्‍न नै फटकैगा, अर हे इस्राएलियों थम एक-एक करकै कठ्ठे करे जावैंगे। 13उस बखत5 बड़ा नरसिंगा फूँक्या जावैगा, अर जो अश्शूर देश म्ह नाश हो रहे थे अर जो मिस्र देश म्ह जबरदस्ती बसाए होए थे वे यरुशलेम म्ह आकै पवित्र पर्वत पै यहोवा नै दण्डवत करैगें।