यशायाह 16

मोआब की निराशा जनक हालत

1जंगळ1 की ओड़ तै सेला शहर तै सिय्योन के रहण आळे पहाड़ पै देश के हाकिम खात्तर भेड्डां के बच्‍चयां ताहीं भेज्जो। 2मोआब के रहण आळे अर्नोन नदी के घाट पै उजाड़े होए घोसले के पक्षी अर उनके भटके होए बच्यां की तरियां सैं। 3मोआब के रहण आळे यहूदा के रहण आळा ताहीं न्यू कहवैं सै, सलाह2 करो, न्याय चुकाओ; दोपहर ए म्ह अपणी छाया ताहीं रात की तरियां करो; घर तै लिकाड़े होया ताहीं छिपा राक्खो, जो मारे-मारे फिरैं सैं उननै ना पकड़वाओ। 4मेरे माणस जो लिकाड़े होए सैं वे तेरे बीच म्ह रहवैं; नाश करण आळे तै मोआब नै बचाओ। पिस्सण आळा न्ही रह्या, लूट-पाट फेर न्ही होवैगी; क्यूँके देश म्ह तै अंधेर करण आळे नाश होगे सैं। 5फेर दया कै गैल एक सिंहासन स्थिर करया जावैगा अर उसपै दाऊद के तम्बू म्ह सच्‍चाई कै गैल एक विराजमान होवैगा जो सोच विचार कै सच्‍चा न्याय करैगा अर धार्मिकता के काम पै तैयार रहवैगा।

6यहूदा ले रहण आळे कहवैं सैं हमनै मोआब के गर्व कै बारै म्ह सुण्या सै के वो भोत घमण्डी था; उसके घमण्ड अर गर्व अर रोष के सम्बन्ध म्ह भी सुण्या सै पर उसका बड़ा बोल बेकार सै। 7क्यूँके मोआब हाय! हाय! करैगा; सारे के सारे मोआब कै खात्तर हाहाकार करैंगे। कीरहरासत नगर की दाख की टिकियाँ खात्तर वे घणी निराश होकै लाम्बी-लाम्बी साँस लिया करैंगे।

8क्यूँके हेशबोन के खेत अर सिबमा नगर की दाखलता मुरझागी; जात्ति-जात्ति के अधिकारियां नै उनकी बढ़िया-बढ़िया बेलां ताहीं काट-काटकै गिरा दिया सै, वे याजेर नगर ताहीं पोहची अर जंगळ म्ह भी फैलदी गई; अर बढ़दे-बढ़दे ताल के पार दूर ताहीं बढ़गी थी। 9मै याजेर कै गैल सिबमा की दाखलता कै खात्तर भी रोऊँगा3; हे हेशबोन अर एलाले, मै थमनै अपणे आँसू तै सींचूँगा; क्यूँके थारी धूपकाल के फळां की अर नाज की कटणी कै बखत की ललकार सुणाई पड़ी सै। 10फळदाई बारियाँ म्ह तै आनन्द अर मगनता जान्दी रही; दाख की बारियाँ म्ह गीत न्ही गाया जावैगा, ना खुशी का शब्द सुणाई देवैगा; अर दाखरस के कुण्डां म्ह कोए दाख न्ही रौंदैगा, क्यूँके मै उनके खुशी के शब्द ताहीं बन्द करुँगा। 11इस करकै मेरा मन मोआब कै कारण अर मेरा हृदय कीरहेरेस कै कारण वीणा का जिसा क्रन्दन करै सै।

12अर जिब मोआब ऊँच्‍ची जगहां के मन्दर पै मुँह दिखान्दे-दिखान्दे थक जावै, अर प्रार्थना करण नै अपणे मन्दर म्ह आवै, तो उसनै किमे फायदा ना होवैगा। 13याए वा बात सै जो यहोवा नै इसतै पैहले मोआब के बारै म्ह कही थी। 14पर इब यहोवा नै न्यू कह्या सै4, “मजदूरां की तरियां गिणकै तीन साल कै भित्तर मोआब का वैभव अर उसकी भीड़-भाड़ सारी निकम्मी ठहरैगी; अर थोड़े जो बचैगें उनका कोए जोर न्ही होवैगा।”