Haryanvi Bible
यशायाह 13
बाबेल कै खिलाफ घोषणा
बाबेल कै बारै म्ह करी भारी भविष्यवाणी जिस ताहीं आमोस के बेट्टे यशायाह नै परमेसवर की और तै दर्शन म्ह पाया। मुंडे पहाड़ पै एक झण्डा खड्या करो, हाथ तै इशारा करो अर सैनिकां नै ऊँच्ची आवाज तै पुकारो के वे सरदारां के बाबेल शहर के फाटकां म्ह प्रवेश करैं।1 मै यहोवा खुद अपणे पवित्र करे होया ताहीं हुकम दिया सै, मन्नै अपणे छो खात्तर अपणे वीरां ताहीं बुलाया सै जो मेरे प्रताप कै कारण खुश सैं।
पहाड़ां पै एक बड़ी भीड़ के जिसा शोर-सराबा होण लागरया सै, मान्नो एक बड़ी फौज की हलचल हों। राज्य-राज्य की कठ्ठी करी होई जातियाँ हलचल मचा रह्यी सैं। सेनाओं का यहोवा युद्ध कै खात्तर अपणी सेना कठ्ठी करण लागरया सै। वे दूर देश तै, अकास के छोर तै आए सैं, हाँ, यहोवा अपणे छो के हथियारां समेत सारे देश ताहीं नाश करण खात्तर आया सै।
हाय-हाय करो, क्यूँके यहोवा के न्याय का दिन धोरै सै; वो सर्वशक्तिमान की और तै मान्नो सत्यानाश करण कै खात्तर आवै सै। इस कारण सारया के हाथ ढील्ले पड़ैंगे, अर हर एक माणस का हृदय पिंघळ जावैगा, अर वो2 लोग घबरा जावैंगे। उननै पीड़ा अर शोक होवैगा; उननै जच्चा की जिसी पीड़ उठैंगी। वे हैरान होकै एक दुसरे नै देखैगें; उनके मुँह जळ जावैंगे।
देक्खो, यहोवा का वो नाश आळा दिन रोष अर छो अर निर्दयता कै गैल आवै सै के वो धरती नै उजाड़ देवै अर पापियाँ ताहीं उस म्ह तै नाश करै। क्यूँके अकास के तारागण अर बड़े-बड़े नक्षत्र अपणी रोशनी ना देवैंगे, अर सूरज लिकड़दे-लिकड़दे अँधेरा हो जावैगा, अर चाँद अपणी रोशनी ना देवैगा। मै जगत के माणसां ताहीं उनकी बुराई कै कारण, अर दुष्टां ताहीं उनके अधर्म की सजा देऊँगा; मै घमण्डियाँ के घमण्ड नै नाश करुँगा अर हुड़दंग करण आळयां के घमण्ड नै तोड़ूँगा। मै आदमी नै कुन्दन तै, अर माणस नै ओपीर के खरे सोन्ने तै भी घणा महँगा करुँगा। इस करकै मै अकास नै कँपाऊँगा, अर धरती अपणी जगहां तै टळ जावैगी;3 यो सेनाओं के यहोवा के रोष कै कारण अर उसके भड़के होए छो कै दिन होवैगा। अर बाबेल म्ह रहण आळे परदेशी खदेड़े होए हिरण, या बिन पाळी की भेड्डां की तरियां अपणे-अपणे माणसां की और फिरैंगे, अर अपणे-अपणे देश म्ह भाज जावैंगे। जो कोए मिलै वो बेध्या जावैगा, अर जो कोए पकड्या जावै, वो तलवार तै मार दिया जावैगा। उनके बाल-बच्चे उनके स्याम्ही पटक दिए जावैंगे; अर उनके घर लूटे जावैंगे, अर उनकी बिरबानियाँ भ्रष्ट करी जावैंगी।
यहोवा न्यू कहवै सै, देक्खो! मै बाबेल खिलाफ मादी माणसां नै उभारूँगा जो ना तो चाँदी का कुछ विचार करैंगे अर ना सोन्ने का लालच करैंगे। वे तीरां तै जवान्नां नै मारैंगे, अर बाळकां पै कुछ दया ना करैंगे, वे लड़क्यां पै कुछ तरस न्ही खावैंगे। बाबेल जो सारे राज्य का शिरोमणि सै, अर जिसकी शोभा पै कसदी माणस फूलै सैं, वो इसा हो जावैगा जिस तरियां सदोम अर गमोरा शहर4, जिब परमेसवर नै उन ताहीं उलट दिया था। बाबेल फेर कदे ना बसैगा अर युग-युग उस म्ह कोए वास ना करैगा; अरबी माणस भी बाबेल म्ह डेरा खड़या ना करैंगे, अर ना पाळी उस म्ह अपणे पशु बैठावैंगे। ओड़ै जंगळी जन्तु बैठेंगे, अर उल्लू उनके घरां म्ह भरे रहवैंगे; ओड़ै शुतुर्मुर्ग बसैंगे, अर जंगळी बकरे ओड़ै नाचैगें। उस नगर के राज-भवनां म्ह लकड़बग्घे, अर उसके सुखविलास के मन्दरां म्ह गाद्दड़ बोल्या करैंगे; उसके नाश होण का बखत धोरै आ ग्या सै, अर उसके दिन इब ज्यादा न्ही रहे।
Source notes (4)
- Footnote महान बाबेल शहर
- Footnote 1 थिस्स. 5:3
- Footnote यो परमेसवर के छो का महान प्रभाव दर्शावै सै, जिस तरियां के उसकी मौजूदगी तै धरती नै भी डरणा अर काँम्बणा अर उसके छो के भय तै दूर भाजणा जरूरी सै।
- Footnote उत्प. 19:23-29
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.