Haryanvi Bible
यशायाह 11
यिशै के वंश का शासनकाल
फेर यिशै1 के ठूँठ म्ह तै एक डाळी फूट लिकड़ैगी अर उसकी जड़ म्ह तै एक डाळी लिकड़कै फलवन्त होवैगी। अर2 यहोवा की आत्मा, बुद्धि अर समझ की आत्मा, युक्ति अर पराक्रम की आत्मा, अर ज्ञान अर यहोवा के भय का आत्मा नए राजा पै ठैहरा रहवैगा। अर3 उसनै यहोवा का भय सुगन्ध जिसा भावैगा।
वो मुँह देख्या न्याय न्ही करैगा अर ना अपणे कान्नां के सुणण कै मुताबिक फैसला करैगा; पर4 वो कंगालां का न्याय धार्मिकता तै, अर धरती के नम्र माणसां का फैसला खराई तै करैगा; अर वो धरती नै अपणी आदेश के सोंटे तै मारैगा, अर अपणी फूँक के झोंके तै दुष्टां नै मिटा देगा। उसकी5 कमर का फेंटा धार्मिकता अर उसकी कमर का फेंटा सच्चाई होवैगी।
उस दिन भेड़िया भेड़ के बच्चे कै गैल रहवैगा, अर चीता बकरी के बच्चे कै गैल बैठ्या रहवैगा, अर बाछड़ा अर जवान शेर अर पाळ्या पोस्या होया बळध तीन्नु कठ्ठे रहवैंगे, अर एक छोट्टा छोरा उनकी अगुवाई करैगा। गां अर रीछणी मिलकै चरैंगी6, अर उनके बच्चे कठ्ठे बेठैगें; अर शेर बळध की तरियां घास खाया करैगा। दूध पीन्दा बाळक करैत कै बिल पै खेलैगा, अर दूध छुड़ाया होया बाळक नाग कै बिल म्ह हाथ डालैगा। मेरे7 सारे पवित्र पर्वत पै ना तो कोए दुःख देवैगा अर ना नुकसान करैगा; क्यूँके धरती यहोवा कै ज्ञान तै इस तरियां भर ज्यागी जिसा पाणी समुन्दर म्ह भरया रहवै सै।
इस्राएलियाँ का दोबारा कठ्ठा होणा
उस बखत यिशै की जड़ देश-देश कै माणसां कै खात्तर एक झण्डा होवैगी;8 सारे राज्य के माणस उसनै ढूँढैंगे, अर उसका विश्रामस्थान तेजोमय होवैगा।
उस बखत प्रभु अपणा हाथ दुसरी बार बढ़ाकै बचे होया ताहीं, जो उसकी प्रजा के रहगे सैं, अश्शूर तै, मिस्र तै, पत्रोस तै, कूश तै, एलाम तै, शिनार तै, हमात तै, अर समुन्दर के द्वीपां तै मोल लेकै छुड़ावैगा। वो गैरजात्तां कै खात्तर झण्डा खड्या करकै इस्राएल के सारे लिकाड़े होया ताहीं, अर यहूदा के सारे बिखरे होया ताहीं धरती की च्यांरु दिशा तै कठ्ठा करैगा। एप्रैम फेर जळण न्ही करैगा अर यहूदा के तंग करण आळे काट दिये जावैंगे; ना तो एप्रैम यहूदा तै जळण करैगा अर ना यहूदा एप्रैम ताहीं तंग करैगा। पर वे पश्चिम की ओड़ पलिश्तियाँ के कंधे पै झपट्टा मारैंगे, अर मिलकै पूर्वियाँ ताहीं लूटैंगे। वे एदोम अर मोआब पै हाथ बढ़ावैंगे, अर अम्मोनी उनके अधीन हो जावैंगे। यहोवा मिस्र के समुन्दर की खाड़ी ताहीं सूखा देवैगा, अर फरात पै अपणा हाथ बढ़ाकै प्रचण्ड लू तै इसा सुखावैगा के वो सात धार हो जावैगी, अर माणस जूत्ते पैहरे होए भी पार हो जावैंगे। उसकी प्रजा के बचे होया कै खात्तर अश्शूर तै एक इसा राजमार्ग होवैगा जिसा मिस्र देश तै चाल्ले आण कै बखत इस्राएल कै खात्तर होया था।
Source notes (8)
- Footnote यिशै दाऊद का पिता यानिके जिसका जिक्र करया जा रहया सै वो यिशै के कुण्बा या दाऊद के वंश का सै जो यरुशलेम के राजा होया करदे।
- Footnote अर इफि. 1:17; यशा. 42:1; यूह. 14:17
- Footnote अर यूह. 8:15-16; 7:24
- Footnote पर 2 थिस्स. 2:8; प्रका. 19:15
- Footnote उसकी यशा. 59:17; इफि. 6:14
- Footnote गां अर रीछणी मिलकै चरैंगी यानिके एक गैल ये पशु स्वभाव तै ही संगति न्ही करदे क्यूँके एक दुसरे का शिकार होवै सै, वे एक साथ रहवैंगे।
- Footnote मेरे सिय्योन की पहाड़ी, जो आराधनालय की जगहां
- Footnote दाऊद के घरान्ने का नया राजा
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.